"კანონიერი ქურდების" ახალი დაპირისპირება აფხაზეთში - ვინ არის "დუკა", რომელიც რაულ ბარცბას წინააღმდეგ "კრიმინალურ თამაშებში" შემოდის
ომიკრონის აფეთქების კვალდაკვალ, ოკუპირებულ აფხაზეთში, ე.წ. კრიმინალური სამყაროს წევრების დაპირისპირების ახალი ტალღა დაიწყო. ადგილობრივების თქმით, მას შემდეგ, რაც რაულ ბარცბას კლანის გავლენით, ე.წ. ადგილობრივმა ხელმძღვანელობამ ჩირო შონიას ჭირისუფალს მისი გალში გადასვენების უფლება არ მისცა, ბარცბას დროებით თავის ციხესიმაგრეში შეკეტვას ურჩევენ.
ე.წ. კანონიერი ქურდის, ჩირო შონიას ოჯახის წევრები ენგურის საზღვართან რამდენიმე საათის განმავლობაში ბჟანიას გუნდის გადაწყვეტილებას ელოდნენ, თუმცა, საბოლოოდ, ისინი გალში არ შეუშვეს და შონია ზუგდიდში დაკრძალეს.
ბარცბას გავლენები მხოლოდ ბიზნესითა და ე.წ. კრიმინალურ სამყაროში გავლენებით არ შემოიფარგლება - მას პოლიტიკაშიც გავლენები აქვს. ამის მაგალითი იყო, გალის ე.წ. ადმინისტრაციის ყოფილი ხელმძღვანელი თემურ ნადარაია, რომელიც რაიონში მშვიდობის დამყარების სანაცვლოდ, ბარცბას ყველა მითითებას ასრულებდა.
სწორედ გუდაუთელი კრიმინალის დამოკიდებულების გამოძახილი იყო ნადარაიას ანტიქართული პოლიტიკა, სკოლებში ქართული ენის აკრძალვა, ქართულის მასწავლებლებზე ზეწოლა და დევნა. ბარცბამ ე.წ. კრიმინალურ სამყაროში მიუღებელი წესები შემოიღო - გადაწყვიტა, აფხაზეთში ქართველების გავლენები შეემცირებინა და ამის გამო არაერთხელ მოუწია ქართულ კლანთან შეტაკება, მაგრამ როგორც ადგილობრივები სოციალურ ქსელებში წერენ, ჯერჯერობით პოსტს ინარჩუნებს, ვინაიდან, ყველა სფეროსა და უწყებაში აქვს გავლენები.
ამჯერად ბარცბას ის აფხაზი კანონიერი ქურდებიც უტევენ, ვინც პროქართულ კლანში არიან და რეგიონშიც გუდაუთელი კრიმინალებთან დაუნდობელი დაპირისპირების მიუხედავად, ერთობლივ ბიზნესსა თუ სხვა სახის გავლენებსაც ინარჩუნებენ.
ბოლო დღეებია რეგიონში იქ დაბადებულ-გაზრდილი დაურ გუბლიას იგივე "დუკას" გვარ-სახელი აქტუალური გახდა. მის შესახებ აქტიურად წერდა რუსული მედიაც.
politika-v-rashke.ru-ს ცნობით, მისი წარსულის შესახებ ბევრი არაფერია ცნობილი გარდა იმისა, რომ 1972 წელს სოხუმში დაიბადა და ასევე სოხუმელი მერაბ ჯანგველაძის, იგივე "მერაბ სუხუმსკის" წრიდან არის. მან აფხაზეთი 2000-იანი წლების ბოლოს დატოვა და საცხოვრებლად მოსკოვში გადავიდა.
2006 წელს, მას აფხაზ ე.წ. კრიმინალურ ავტორიტეტთან, ბესიკ ჯონუასთან კონფლიქტი ჰქონდა. ჯონუას თქმით, ის ადრე სამხედრო სამსახურში მსახურობდა და კრიმინალის სტატუსს არ იმსახურებდა. ამის შემდეგ გუბლია, ქურდულ სამყაროში გავლენებით ცნობილი შაქრო კალაშოვისა და ედიკ ასატიანის თაოსნობით, კრიმინალური სამყაროდან გარიყეს.
თუმცა, "დუკა" მერაბ ჯანგველაძის დახმარებით 2013 წელს ისევ დაუბრუნდა ძველ სტატუსს. შესაბამისად, ადგილობრივების ცნობით, ამჯერად ბარცბას ჭკუაზე მოსაყვანად აფხაზეთის რეგიონის კრიმინალურ თამაშებში "დუკა" შემოდის.
"ყველაზე დიდი პრობლემა ის არის, რომ მაინინგ ბიზნესში სულ უფრო და უფრო ფართოდ შემოდის კრიმინალური კლანი. ბარცბამ იაფი ფულის გემო გაიგო, ადგილობრივებიც კი ერთმანეთს გადაჰკიდა, ვისაც ამ ბიზნესიდან შემოსავალი არ აქვს უშუქოდ ზის, პოლიტიკაში რომ გავლენები აქვს, ახალი არ არის, რუსეთის პენსიისა და ასევე რუსეთის ბიუჯეტიდან გადმორიცხული ხელფასის გარდა, ჩვენს პოლიტიკოსებს სწორედ ამ ბიზნესიდან აქვთ შემოსავალი ანუ წილი. ხელი ხელს ბანს - მათაც აწყობთ ბარცბას გავლენები და ისიც უხდის. ეს არის ჩვენი რეალობა..." - წერს ადგილობრივი ნატალია სმირი სოციალურ ქსელში.
"ფაქტობრივად, კრიმინალების ხელშია ტურისტული ბიზნესი, რომ არაფერი ვთქვათ, მაინინგ ბიზნესზე. ბარცბას, მატერიალურად უზრუნველი ცხოვრებისა და გავლენების გამო უამრავი მიმდევარი ჰყავს... მას ანგარიშს უწევენ ის რუსი ბიზნესმენები, ვისაც აფხაზეთში უკვე აქვს ბიზნესი ან დაწყება სურს. მისი მხარდამჭერთა წრე ფართოვდება, ისევე, როგორც მისი ბიზნესი. ასე თანდათან უფრო და უფრო ვემსგავსებით მაფიოზების ქვეყანას. ასე რომ, თუ "დუკას" უნდა, თავისი სიტყვა თქვას, ამისთვის "პიზას" რამდენიმე წევრი უნდა ჩამოაცილოს, რომ თავისი ძალა აგრძნობინოს" - მიაჩნია გენადი გულიას.