"ამ გადაწყვეტილებით მოსამართლემ Netflix-ს უთხრა, რომ დაჯდეს საჭადრაკო დაფასთან და ეს პარტია ნონა გაფრინდაშვილთან ითამაშოს" - ადვოკატი მაია მწარიაშვილი
"ამ გადაწყვეტილებით სასამართლომ Netflix-ი ფაქტობრივად დასვა საჭადრაკო დაფასთან, Netflix-ს არ უნდოდა ამ დავაში შესვლა და მოსამართლემ მას უთხრა, რომ უნდა დაჯდეს საჭადრაკო დაფასთან და ითამაშოს ეს პარტია ნონა გაფრინდაშვილთან" - ამის შესახებ მოჭადრაკე ნონა გაფრინდაშვილის ერთ-ერთმა ადვოკატმა მაია მწარიაშვილმა კალიფორნიის სასამართლოს მოსამართლის გადაწყვეტილების შესახებ განაცხადა, რომელმაც Netflix-ის შუამდგომლობა, გაეუქმებინა ნონა გაფრინდაშვილის მიერ შეტანილი სარჩელი, არ დააკმაყოფილა.
ადვოკატის შეფასებით, კალიფორნიის სასამართლოს მოსამართლემ ვირჯინია ფილიპსმა პრეცედენტული გადაწყვეტილება მიიღო და გაიზიარა მოსარჩელე მხარის ყველა არგუმენტაცია საქმესთან დაკავშირებით.
"თავისი არსით ეს გადაწყვეტილება ძალიან მნიშვნელოვანია. ამ გადაწყვეტილებით მოსამართლემ თქვა, რომ ასეთი პრეცედენტი არ არსებობს ამერიკის სასამართლო პრაქტიკაში, რომ რადგან ნაწარმოები მხატვრულია, ეს იყოს იმის მიზეზი, რომ ამ მხატვრული ნაწარმოების ქუდით დააზიანო რეალური ადამიანის პატივი, ღირსება და საქმიანი რეპუტაცია. სასამართლო ამ გადაწყვეტილებით პასუხობს Netflix-ის ყველა ძირითად არგუმენტს და აქარწყლებს. ფაქტობრივად, მთლიანად მიჰყვება ჩვენი შესაგებლის ხაზს, სრულად იზიარებს ყველა ჩვენს არგუმენტაციას. Netflix-ის ყველა არგუმენტი სასამართლომ გააბათილა. ძალიან საინტერესო მსჯელობებია ამ გადაწყვეტილებაში და სასამართლომ დაცვის მხარის არც ერთი არგუმენტი არ გაიზიარა და თქვა ძალიან მნიშვნელოვანი რამ, რომ Netflix-ის მტკიცებულებები, რომლებიც მას ჰქონდა წარმოდგენილი, პირიქით, დაცვის მხარის წინააღმდეგ მუშაობს და აჩვენებს იმას, რომ Netflix -მა განგებ აუარა გვერდი ნონა გაფრინდაშვილთან დაკავშირებით არსებულ გარემოებებს. სასამართლომ პრეცედენტული გადაწყვეტილება მიიღო“, - განაცხადა მაია მწარიაშვილმა.
შეგახსენებთ, რომ კალიფორნიის სასამართლოს მოსამართლემ არ დააკმაყოფილა Netflix-ის შუამდგომლობა, გაეუქმებინა ქართველი მოჭადრაკის, ნონა გაფრინდაშვილის მიერ შეტანილი სარჩელი.
Netflix-ი სამართალწარმოების შეწყვეტას ითხოვდა, რადგან ამტკიცებდა, რომ სერიალი არის მხატვრული ნაწარმოები და მის შემქმნელებს კანონი ფართო მხატვრულ ლიცენზიას ანიჭებს.
თუმცა, აშშ-ის კალიფორნიის შტატის რაიონული სასამართლოს მოსამართლე ვირჯინია ფილიპსი ამ მოთხოვნას არ დაეთანხმა.
“ის ფაქტი, რომ სერიალი გამოგონილია, არ იცავს Netflix-ს ცილისწამებისთვის პასუხისმგებლობისგან,” - ნათქვამია მოსამართლის გადაწყვეტილებაში.