მეცნიერებმა ირმის ნახტომში უჩვეულო რამ აღმოაჩინეს - ყოველ თვრამეტ წუთში ერთხელ, ერთი წუთის განმავლობაში "ირთვება" და ქრება: რას ამბობენ მეცნიერები იდუმალ ობიექტზე?

ავსტრალიელი მეცნიერები აცხადებენ, რომ ირმის ნახტომში უცნობი მბრუნავი და მანათობელი ობიექტი აღმოაჩინეს, რომელიც მათი მტკიცებით, განსხვავდება ადრე ნანახი სხვა ობიექტებისგან.. აღმოჩენა Curtin-ის უნივერსიტეტის სტუდენტს, ტაირონ ო’დოჰერტის ეკუთვნის.

როგორც დოჰერტიმ აღწერა, ობიექტი გამოყოფს უზარმაზარ რადიოენერგიას და ყოველ თვრამეტ წუთში ერთხელ, ერთი წუთის განმავლობაში "ირთვება", ანათებს, ეს არის ერთგვარი პულსაცია.

აღსანიშნავია, რომ მსგავსი პულსაციის მქონე ობიექტებიც არის აღწერილი, მაგრამ მკველვართა განმარტებით აქამდე არ უნახავთ შემთხვევა, როცა ობიექტი ერთი წუთის განმავლობაში ირთვებოდა და შემდეგ ქრებოდა.

ტაირონ ო’დოჰერტიმ ის ვარსკვლავებზე დაკვირვებისას, დასავლეთ ავტრალიის რეგიონში აღმოაჩინა - ტელესკოპისა და მის მიერვე შექმნილი ახალი ტექნიკის გამოყენებით. ო’დოჰერტი იყო გუნდის ნაწილი, რომელსაც რადიო ასტრონომიის კვლევის საერთაშორისო ცენტრის ასტროფიზიკოსი, დოქტორი ნატაშ ჰარლი-უოქერი ხელმძღვანელობდა.

"ის ჩნდებოდა და ისევ ქრებოდა. ობიექტს რამდენიმე საათის განმავლობაში ვაკვირდებოდით", - ამბობს ნატაშ ჰარლი-უოქერი.

"ობიექტები, რომლებიც ირთვება და შემდეგ ისევ ქრება, სამყაროში უცხო არ არის, ასტრონომებმა იციან ამ მოვლენის შესახებ და მათ "გარდამავალ“ ობიექტებს უწოდებენ. მაგრამ ობიექტი, რომელიც ჩართულია თითქმის მთელი ერთი წუთის განმავლობაში, არის ნამდვილად უცნაური“, - ამბობს ასტროფიზიკოსი ჯემა ანდერსონი.

მეცნიერებმა დაადგინეს, რომ ის დედამიწიდან დაახლოებით, 4000 სინათლის წელიწადის მანძილზეა, არის წარმოუდგენლად კაშკაშა და აქვს უკიდურესად ძლიერი მაგნიტური ველი.

ფიქრობენ, რომ შესაძლოა ეს იყოს ნეიტრონული ვარსკვლავი, თუმცა ამ ეტაპზე დარწმუნებით ვერ საუბრობენ. ბევრი რამ აღმოჩენის შესახებ იდუმალებითაა მოცული, რაც შემდგომი ძიებისა და კვლევის ობიექტია.

წყარო: BBC.com