"ყველას მოეთხოვება! ვინმეს ჰგონია, რომ ამ პრობლემის მოგვარება შეუძლებელი იყო?!" - რას წერს ნინო ქათამაძე დევნილების პროტესტზე?
მომღერალი ნინო ქათამაძე სანატორიუმ "ქართლში" მცხოვრები დევნილების პროტესტს ეხმაურება და რამდენიმე დღის წინ გარდაცვლილი მამაკაცის ოჯახს უსამძიმრებს.
აღნიშნულთან დაკავშირებით ქათამაძე პოსტს სოციალურ ქსელში ავრცელებს.
"მთელი გულით ვიზიარებ - სანატორიუმ "ქართლში" მცხოვრები ზურაბ ქირიას გარდაცვალებას. გამოწარმოუდგენელი ტრაგედიაა.
როდესაც სანატორიუმის ფანჯრებიდან 30 წელი უყურებ შენს ირგვლივ, თუ როგორ შენდება ათასობით კორპუსები, თან იმდენი, რომ სუნთქვაც კი შეუძლებელია…30 წელი ცოცხლებშიც არ წერიხარ, მიუხედავდ ტანჯვისა და სასტიკი ცხოვრების ისტორიიისა.
და ვინმეს ჰგონია რომ ამ პრობლემის მოგვარება შეუძლებელი იყო?!!! ყველას მოეთხოვება!!!!!" - წერს ქათამაძე.
შეგახსენებთ, რომ 16 იანვარს თბილისის ზღვაზე მდებარე სანატორიუმ „ქართლის“ შენობიდან ერთ-ერთი დევნილი მამაკაცი გადმოხტა და გარდაიცვალა. ადგილობრივების ინფორმაციით, მამაკაცი სიცოცხლისთვის საფრთხის შემცველ პირობებში ცხოვრებას დიდი ხანი აპროტესტებდა. გარდაცვლილი დღეს დაკრძალეს.
"ქართლში“ მცხოვრები აფხაზეთიდან დევნილები საცხოვრებელი ფართის მიღების მოთხოვნით 24 იანვრიდან პროტესტს განაახლებენ. მათი განცხადებით, აქციას ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსთან გამართავენ.
დევნილების თქმით, არსებობს ექსპერტიზის დასკვნა, რომ სანატორიუმის შენობა, რომელშიც ახლა ცხოვრობენ, ავარიულია. მათივე თქმით, სამინისტროდან დღესაც დაუკავშირდნენ და ქირით გასვლის შესახებ შეთავაზება მიიღეს, რაზეც სამინისტროს წარმომადგენლებს კვლავ უარი განუცხადეს. დევნილები აცხადებენ, რომ ქირით გადასვლაზე უარის თქმის მიზეზი მთავრობისადმი უნდობლობაა.