"დემნას მაშინ დიმას ვეძახდით, მორცხვი იყო და სულ შავი ტანსაცმელი ეცვა" - რაზე მუშაობდა დემნა გვასალია "მოამბეში"? უცნობი ფაქტები მსოფლიოში ცნობილ დიზაინერზე
დაიბადა სოხუმში, აფხაზეთის ომის შემდეგ დევნილის სტატუსით თბილისში აღმოჩნდა. სწავლობდა თბილისის სახელმწიფო უნივერსიტეტში და შემდეგ ანტვერპენის სამეფო აკადემიაში ხელოვნების ფაკულტეტზე. ხელმძღვანელობდა Maison Martin Margiela-სა და Louis Vuitton-ის გუნდებს. ამჟამად დემნა გვასალია Balenciaga-ს შემოქმედებითი დირექტორი და VETEMENTS-ის მთავარი დიზაინერია. სოხუმის დატოვების შემდეგ საცხოვრებლის შეცვლა რამდენჯერმე მოუხდა, მოდის სფეროში თავისი სტილის საპოვნელად კი საკმაო დრო დასჭირდა.
მეგობრებთან (Margiela-დან) შექმნა Vetements (ფრანგულად "ტანსაცმელი"), საკუთარი მოდის ხაზი, რომლითაც სურდა, თავისი ხედვა მსოფლიოსთვის გაეზიარებინა. 2016 წლის FASHION AWARDS-ის დაჯილდოებაზე, მზა ტანსაცმლის საერთაშორისო დიზაინერის პრიზი აიღო. Vetements დიდი გამოხმაურება მოჰყვა. ამ ხაზმა ტრადიციული მოდის კოდები დაანგრია, რადგანაც მისი გუნდი სხვა მოდის სახლებისგან სხვა ხედვით გამოირჩეოდა. ტანსაცმელი, რომელიც მოდის ჩვენებებზე გამოჰქონდათ, მაღაზიებში უნდა გაყიდულიყო. დიზაინერის ნამუშევრები არის რეალისტური და სატარებლად კომფორტული.
ეს ქართველი დიზაინერის წარმატებული ბიოგრაფიის წარმატებული ეპიზოდების არასრული ჩამონათვალია, რომელსაც მან საერთაშორისო ასპარეზზე მიაღწია.
თუმცა ბევრმა ალბათ მისი ბიოგრაფიიდან ეს ეპიზოდი ნაკლებად იცის, როდესაც დემნა გვასალია საქართველოს "პირველ არხზე" საინფორმაციო გამოშვება "მოამბის" ინგლისურენოვან ჯგუფში მუშაობდა და გამოშვებისთვის ტექსტებს ამზადებდა.
სალომე დადუნაშვილი, ჟურნალისტი:
- "მოამბეში" ბევრი ახალგაზრდა მუშაობდა, მაგრამ მაშინ არ იყო იმდენი ადამიანი, რომელიც ინგლისურ ენას ფლობდა. „მოამბეში“ კი ყოველდღე სააგენტო "როიტერის" ინგლისურენოვანი მასალა მოდიოდა, რომელსაც შესაბამისი მომზადება სჭირდებოდა. ამას აკეთებდა ჯგუფი ია მახარაშვილის ხელმძღვანელობით. დემნა (მაშინ დიმას ვეძახდით) იამ იპოვა. ეს არაჩვეულებრივი ახალგაზრდა ამ ჯგუფს ეხმარებოდა, ინგლისურენოვან ტექსტებს ამზადებდა. ჩვენ, როგორც „მოამბის“ ჟურნალისტებს, მასთან ყოველდღიური შეხება გვქონდა. ეს პერიოდი არაჩვეულებრივად მახსოვს. დიმა იყო უაღრესად მოკრძალებული, მორცხვი პატარა ბიჭი, რომელიც ყოველთვის ჩუმად იყო. როგორც კარგი და სასიამოვნო ადამიანი, ასე გავიცანი. ეცვა ყოველთვის შავი ფერის ტანსაცმელი. თუმცა მასზე არავითარი ინფორმაცია არ გვქონდა. მისი ჩვენთან ყოველდღიური ურთიერთობა მხოლოდ ერთი-ორი საათით შემოიფარგლებოდა...
ერთხელ, ერთ-ერთმა ვიზაჟისტმა დაიჩივლა, რაღაც ღონისძიებაზე მივდივარ, რომელიც ცოტათი განსაკუთრებულ ჩაცმულობას მოითხოვს და არ ვიცი, რა ვქნაო... ყველანი სამონტაჟოში ვიყავით. ჩვენმა ჩუმმა ასისტენტმა უცებ თქვა, მე მოდით ვარ დაინტერესებული და მაქვს რაღაც ნამუშევრები, ხომ არ გინდა, რომ გაჩვენო, იქნებ გამოგადგესო. დიდი სიხარულით დასთანხმდა. მასთან სახლში წავიდა, გამოეწყო დიმას შექმნილი კაბით და იმ ღონისძიებაზე ასე წავიდა. ასე გაირკვა, რომ ის თურმე მოდით იყო დაინტერესებული.
ცოტა ხანში კი გავიგეთ, რომ რაღაც კონკურსში გაიმარჯვა და სასწავლებლად ანტვერპენში წავიდა. ჩვენ, ის ხალხი, ვინც ძირითადად დაინტერესებული ვიყავით კულტურით, მოდის სფეროთი, ხანდახან იას, რომელსაც მასთან კონტაქტი ჰქონდა, მის ამბებს ვეკითხებოდით და ისიც გვიყვებოდა. დემნა იგებდა კონკურსებს და სულ ჰქონდა წარმატებული ეპიზოდები მაშინაც კი, როდესაც ჯერ კიდევ სტუდენტი იყო. ეტაპობრივად მის წარმატებას წარმატება ემატებოდა. ერთ დღესაც გავიგეთ, რომ მან ლეგენდად ქცეულ მოდის სახლში დაიწყო მუშაობა და მერე "ბალენსიაგას" სამხატვრო ხელმძღვანელი გახდა. ეს ძალიან დიდი წარმატებული ნაბიჯი იყო. ასეთი მასშტაბის წინსვლა მოდის სამყაროში ერთეულების ხვედრია, რაც ჩვენთვის ყოველთვის დიდი სიხარულის საბაბი იყო და არის.
- ხანდახან მისი შემოქმედების მიმართ ქართულ სოციალურ ქსელებში გარკვეული სარკასტული ფრაზები გაისმის...
- სამწუხაროდ, ძალიან ბევრ ადამიანს უყვარს საუბარი ისეთ თემებზე, რომელიც არ ესმის, ასე რომ, ამით დემნას არაფერი აკლდება. მიხარია, რომ ის წარმატებულია. ეს მისი მხოლოდ კარიერული წარმატება კი არ არის, მან მთლიანად და სამუდამოდ შეცვალა მოდის სამყარო! დარწმუნებული ვარ, რომ ალბათ ათწლეულების შემდეგ, როდესაც გავა დრო და სერიოზული ანალიზი გაკეთდება, დემნას კვალი საფუძვლიანად შეფასდება. მან მოდის სამყარო მთლიანად შეაზანზარა და შეცვალა. ის საქართველოს ისტორიაში ერთ-ერთი წარმატებული ქართველია, რომელმაც საოცარ საერთაშორისო მასშტაბებს მიაღწია.
დალი ჩიტალაძე, მოდის ექსპერტი:
- დემნას, პირადად არ ვიცნობ, ვიცნობ მის ძმას, გურამს, 2013 წელს "ბინექსის" კონკურსზე შევხვდი, როცა მას სოფო ჭყონია ატარებდა. დემნა მაშინ უკვე წარმატებული დიზაინერი იყო და ლუი ვიტონთან მუშაობდა. როგორც ექსპერტმა, შემიძლია გითხრათ, რომ ფენომენალურად ნიჭიერი ადამიანია, ადამიანი, რომელმაც შეძლო და მოდის ინდუსტრიაში რევოლუცია მოახდინა. ეს შეძლო ივ სენ ლორანმა და შეძლო დემნამ, ჩამოაყალიბა სტილი. არსებობს შანელის სტილი, არის ივ სენ ლორანის სტილი და ახლა არის უკვე დემნას სტილი. ეს გააკეთა ქართველმა, ამაყი ვარ, რომ გვყავს ასეთი ცნობილი ადამიანი. გაგიკვირდებათ, რასაც ვიტყვი, მაგრამ მსოფლიოში ცნობილი ქართველი XX საუკუნეში იყო სტალინი და ახლა არის დემნა.
მას გვასალიად აღარ იხსენებენ. დემნაა მისი შემოქმედებითი სახელი. დიახ, XXI საუკუნეში ყველაზე ცნობილი ის არის. სიახლეს ყოველთვის მოსდევს მიუღებლობა. გადავხედოთ მოდის ისტორიას, შანელმაც, როცა დაამოკლა კაბა, ქალებს კორსეტი გახადა, დიდი „შლაპები“ მოხსნა, ამას მაშინაც ვერ ეგუებოდნენ, დღეს კი ის ისტორიაში შესულია, როგორც სტილის ჩამომყალიბებელი.
ასევეა დემნა. კომფორტულ მოდას დიდი მნიშვნელობა აქვს. როცა ის გლამურულია და არის კომფორტული, მივიღებ კი არა, დიდი სიამოვნებით მივიღებ. სიახლეების მიმართ ტოლერანტულები უნდა ვიყოთ, XXI საუკუნეში ყველაფერი ძალიან სწრაფად იცვლება. ყოველთვის სიახლის მომხრე ვარ და ყველაფერში პროგრესი მაინტერესებს.
- ზოგჯერ, აქა-იქ მისი შემოქმედების მიმართ ცინიკური ფრაზებიც ჩნდება...
- მსოფლიო მოდის დედებმა და მამებმა აღიარეს და ჩვენ რა გვჭირს ქართველებს. რატომ? რატომ? რატომ არ გვიხარია ქართველის წარმატება?! ეს არ მესმის. მე სიამოვნებით ჩავიცვამ მის ქუსლიან "ჩუსტს" და შექმნილ ნებისმიერ სამოსს... მან მოდა მარტივი და ლიბერალური გახადა. ჯერ მისი ბოლო ნამუშევარი რად ღირს... 50 წლის შემდეგ პირველად გაკეთდა ოტკუტიური, მანამდე „ბალესიანგას“ სახლი ამას არ აკეთებდა. ისეთი სილამაზეები შექმნა, ყველანაირ დროს რომ გაუძლებს...
- ასე აფასებთ, მაგრამ პირადად არასდროს შეხვედრიხართ...
- ის უცხოეთში რომ წავიდა, მაშინ მეც წასული ვიყავი, რომ ჩამოვედი, აქ უკვე აღარ იყო. ამიტომ ერთმანეთს ავცდით. მალე დადგება დრო, როცა პირადადაც გავიცნობ. ჩემი ოცნებაა, მასთან ინტერვიუ მქონდეს.
კრისტი ყიფშიძე, მოდელი:
- ძალიან მიყვარს ნიჭიერი ადამიანები, დემნა გვასალია ამ ადამიანთა რიგს მიეკუთვნება, ვინც უზომოდ ნიჭიერია. ასევეა მისი ძმა, გურამიც, რომელსაც კარგად ვიცნობ. მეამაყებიან... დემნას თბილისში რომ იყო, სანამ წავიდოდა, რამდენჯერმე შევხვედრივარ. მერე „თბილისი ფეშენვიკზეც“ იყო ჩამოსული, „ფეშენვიკებს“ გურამიც ხშირად ესწრებოდა... ადრე საქართველოს საავტორო უფლებების ასოციაციაში ვმუშაობდი, სადაც გვქონდა ჟურნალი "კოპირაიტი", რომელსაც ჰქონდა რუბრიკა "ქართველები საზღვარგარეთ" - მაშინ დემნასთან ინტერვიუ ჩავწერეთ.
ინტერვიუს როცა სკაიპით ვწერდით, მახსოვს, მაშინ ბრაზილიაში იმყოფებოდა და საოცარი შთაბეჭდილება დატოვა. მის კოლექციაში ვხედავ იმას, რომ ის მაღალ მოდას ეწინააღმდეგება. აი, რა გააკეთაო? - ვიღაცები წერენ. რა გააკეთა და ის, რომ ბევრი რამ შეცვალა. არადა, მოდაში ერთი შეხედვით, თითქოს ყველაფერი გაკეთებულია. ზოგადად რა უნდა გააკეთო?! მაგრამ დენამ შეძლო - თავისი ნიშა დაიკავა. მისი კოლექცია მხოლოდ ტანსაცმელი კი არ არის, მნიშვნელოვანია, ყველაფერს თუ როგორ აფორმებს. ბოლო ოტკუტიური რომ შექმნა, მაგ ჩვენებას ყველა ელოდებოდა.
50 წლის შემდეგ შესანიშნავი რამ შეძლო... ზუსტად და სწორად გათვალეს, რომ დემნა აიყვანეს... მნიშვნელოვანია, რომ მოდის სფეროს წარმომადგენლები ეთაყვანებიან მას, რაც ძალიან საამაყოა. ქართველის წარმატება უცხოეთში უნდა გვიხაროდეს, გვეამაყებოდეს. 10 წელია, დიდი წარმატების შემდეგ არ მინახავს. ვიცნობ როგორც ძალიან ზრდილობიან ადამიანს. რომ ვნახო, ზუსტად ვიცი, რომ ისევე შემხვდება როგორც ადრე. პიროვნულად ისევ ის ადამიანი იქნება. ე.ი. სწორი გზით იარა და ყველაფერი სწორად მიიღო სამყაროსგან...