ლაგოდეხში ყოფილი მეუღლის მკვლელობაში ბრალდებულს პატიმრობა შეეფარდა

თელავის რაიონულმა სასამართლომ, ლაგოდეხში ყოფილი მეუღლის მკვლელობაში ბრალდებულ 38 წლის გიორგი ბარბაქაძეს აღკვეთის ღონისძიების სახით პატიმრობა შეუფარდა. მოსამართლე თამარ კაპანაძემ არ დააკმაყოფილა დაცვის მხარის შუამდგომლობა, რომელიც 5 000-ლარიან გირაოს ითხოვდა.

პროცესს ესწრებოდა თავად ბრალდებულიც. ბარბაქაძემ წარდგენილ ბრალში თავი დამნაშავედ ცნო, თუმცა სიტყვის უფლებით არ უსარგებლია.

საქმეზე წინასასამართლო სხდომა 10 მარტს, 13:00 საათზე ჩაინიშნა.

შეგახსენებთ, შემთხვევა ლაგოდეხში 15 იანვარს მოხდა. თავდაპირველი ინფორმაციით, 37 წლის ქალი ბუნებრივი აირის ინტოქსიკაცით გარდაიცვალა, თუმცა მას შემდეგ, რაც პროცესში პოლიცია და ექსპერტიზის ბიურო ჩაერთო, საქმეს განზრახ მკვლელობის კვალიფიკაცია მიეცა.

გამოძიების ინფორმაციით, კონფლიქტის ნიადაგზე გიორგი ბარბაქაძემ ყოფილი მეუღლე ჯერ გაგუდა, შემდეგ კი კვალის დაფარვის მიზნით საცხოვრებელ სახლში გაზქურის ონკანი გახსნა და შემთხვევის ადგილიდან მიიმალა. პოლიციამ ბარბაქაძე მომხდარიდან რამდენიმე საათში დააკავა.