ვინ გასცა ანა ფრანკის ოჯახი - ღალატი და 77 წლის შემდეგ გარკვეული სიმართლე: რა დაადგინა გამოძიებამ

77 წლის შემდეგ, გამოძიებამ დაადგინა სავარაუდო პირი, რომელმაც მეორე მსოფლიო ომის დროს, ანა ფრანკი და მისი ოჯახი გასცა და მათი ადგილსამყოფელის შესახებ ინფორმაცია ნაცისტებს მიაწოდა.

ებრაელი გოგონა, რომელიც თავის დღიურებში აღწერდა მეორე მსოფლიო ომის სისასტიკეს, ორწლიანი მიმალვის შემდეგ, 1945 წელს, 15 წლის ასაკში ნაცისტურ საკონცენტრაციო ბანაკში გარდაიცვალა.

• მისი დღიური კი გოგონას გარდაცვალების შემდეგ გამოქვენდა. იქ ყველაზე რეალისტურად არის აღწერილი ებრაელთა ყოფა მეორე მსოფლიო ომის დროს და ერთ-ერთი ყველაზე ცნობილი ისტორიაა ებრაელთა ცხოვრების შესახებ მეოცე საუკუნის ყველაზე სასტიკი პერიოდიდან.

საგამოძიებო ჯგუფმა, რომლის შემადგენლობაშიც FBI-ის ყოფილი აგენტიცაა, გაარკვია, რომ სავარაუდოდ, არნოლდ ვან დენ ბერგმა. ამსტერდამში მცხოვრებმა ერთ-ერთმა ებრაელმა გასცა ფრანკები საკუთარი ოჯახის გადასარჩენად.

ისტორიკოსებისა და სხვა ექსპერტებისგან შექმნილი საგამოძიებო ჯგუფი ექვსი წლის განმავლობაში მუშაობდა. იყენებდნენ თანამედროვე ტექნოლოგიებს, კომპიუტერულ ალგორითმებს ამა თუ იმ პირს შორის კავშირის დასადგენად. საგამოძიებო პროცესი ხანგრძლივი და რთული იყო.

ვან დე ბერგი ამსტერდამის ებრაული საბჭოს წევრი იყო. ის 1943 წელს დაიშალა, ხოლო მისი წევრები საკონცენტრაციო ბანაკებში გაგზავნეს. მაგრამ საგამოძიებო ჯგუფმა აღმოაჩინა, რომ ვან დე ბერგი სხვა ებრაელებისგან განსხვავებით, საკონცენტრაციო ბანაკში არ გაუგზავნიათ და ის ამსტერდამში, ებრაელებისთვის ყველაზე რთულ პერიოდში, ჩვეულებრივად ცხოვრობდა. ამიტომაც გაჩნდა ვარაუდი, რომ ის ებრაელების შესახებ ნაცისტებს ინფორმაციას აწვდიდა.

• "მას რამე ღირებული უნდა გაეკეთებინა ნაცისტებისთვის საკუთარი თავის გადასარჩენად და იმისთვის, რომ მისი მეუღლე უსაფრთხოდ ყოფილიყო“, - ამბობს საგამოძიებო ჯგუფის წევრი, FBI-ის ყოფილი აგენტი, ვინს პანკოკი CBS-სთან საუბრისას.

ასევე აღმოაჩინეს, რომ სავარაუდოდ, ამგვარი ღალატის შესახებ იცოდა ანა ფრანკის მამამ, ოტო ფრანკმა და საიდუმლოდ ინახავდა. ძველ ფაილებში აღმოაჩინეს ოტო ფრანკისთვის გაგზავნილი ანონიმური წერილი, სადაც ნათქვამი იყო, რომ მის ოჯახს არნოლდ ვან დენ ბერგმა უღალატა.

"ალბათ მან უბრალოდ იგრძნო, რომ თუ მე ამ საკითხს დავუბრუნდები, ეს ხანძარს კიდევ უფრო გააღვივებს, სწორედ ამიტომ, გადაწყვიტა, უბრალოდ არაფერი გაეკეთებინა.

ჩვენ უნდა გვახსოვდეს, რომ ვან დენ ბერგი ებრაელი იყო, რაც იმას ნიშნავს, რომ ის ნაცისტებმა ურთულეს მდგომარეობაში ჩააგდეს და აიძულეს ასე მოქცევა“, - ამბობს გამომძიებელი.

ნიდერლანდური გამოცემა Volkskrant წერს, რომ ვან დენ ბერგი 1950 წელს გარდაიცვალა.

ანა ფრანკის სახლმუზეუმის მიერ გავრცელებული განცხადებით, ისინი აღფრთოვანებულები არიან გამომძიებელთა მუშაობით და მიღებული შედეგით. მისი აღმასრულებელი დირექტორის, რონალდ ლეოპოლიდს თქმით კი, გამოძიებამ მიაკვლია მნიშვნელოვან ახალ ინფორმაციას, რომელიც შემდგომ კვლევას იმსახურებს.