"ძლიერი კი ვარ, მაგრამ ყველას აქვს რაღაც სისუსტე, დადებითი და უარყოფითი... მიმნდობი ადამიანი ვარ, რაც მინანია ზოგჯერ" - წლის ადამიანის გულახდილი ინტერვიუ და დაპირება

წლის მიწურულს, Ambebi.ge-მ მკითხველთან ერთად წლის ადამიანი გამოავლინა. შევთავაზებული კანდიდატურებიდან ყველაზე მეტი ხმა მრავალგზის ჩემპიონმა და პლანეტის უძლიერესმა ადამიანმა ლაშა ტალახაძემ მოიპოვა.

როცა ლაშას ეს ამბავი ვამცნეთ, გაიხარა, გულშემატკივარს მადლობა გადაუხადა და პირობა დადო, რომ მათთვის მეტს გააკეთებს და შეუძლებელსაც შეძლებს.

"მინდა, კიდევ ბევრჯერ ვიასპარეზო და ბევრი წარმატება მოვუტანო ჩემს ქვეყანას, გულშემატკივარი გავახარო. წინ, აპრილში ევროპის ჩემპიონატია. ჯერ ცოტას დავისვენებ და შემდეგ შევუდგები ვარჯიშს", - მეუბნება ლაშა და წინასწარ ვიცით, რომ იქაც უკონკურენტო და უძლეველი იქნება, თავისი ახალ-ახალი რეკორდებით.

წელს მრავლაგზის მსოფლიო რეკორდსმენმა ძალოსნობაში ოლიმპიური ჩემპიონობა მეორედ მოიპოვა და ამით ის დამოუკიდებელი ქართული სპორტის ისტორიაში უნიკალური შედეგის ავტორი გახდა. წლის მიწურულს კი, ლაშა მეხუთედ გახდა მსოფლიო ჩემპიონი. მან როგორც ატაცში, ისე აკვრასა და ორჭიდში, მანამდე არსებული ყველა რეკორდი დაამხო.

28 წლის ქართველი ძალოსანი ლაშა ტალახაძე მონაწილეობს +109 კგ. წონით კატეგორიაში, არის ორგზის ოლიმპიური, ხუთგზის მსოფლიო და ხუთგზის ევროპის ჩემპიონი. ფლობს მსოფლიო რეკორდს ატაცში (225 კგ), აკვრაში (267 კგ) და ორჭიდის ჯამში (492 კგ). აქედან ატაცის და ორჭიდის ჯამის რეკორდები მსოფლიოს ყველა დროის რეკორდია ძალოსნობისთვის.

სპეციალურად ambebi.ge-სთვის წლის ადამიანი ლაშა ტალახაძე გევსაუბრება.

• "მამა იყო ჩემი პირველი მწვრთნელი"

ყოველ ახალ წელს საჩხერეში, ოჯახის წევრებთან ერთად ვხვდები, ახლაც ასე იყო.

საჩხერის რაიონში დავიბადე, 15 წლამდე იქ ვიზრდებოდი, მერე თბილისში მომიწია ჩამოსვლა, ვვარჯიშობდი... სპორტი მიყვარდა ძალიან, ცელქი ბავშვი არ ვიყავი. მამა იყო ჩემი პირველი მწვრთნელი, მასთან დავიწყე ვარჯიში, ისიც ძალოსანია და დღემდე ზრდის ბავშვებს. სკოლაში სწავლით მთლად საუკეთესო არ ვიყავი, ვინაიდან შეკრება-შეჯიბრებაზე მიწევდა ხშირად ყოფნა, სულ ვარჯიში და ვარჯიში...

ბავშვობიდან გადაწყვეტილი მქონდა, ამ სპორტისთვის მიმეძღვნა ცხოვრება და ამაში მამის ფაქტორმა იმუშავა. მან მთხოვა, დამეწყო ვარჯიში, მისი პირველი მოსწავლე მე ვიყავი. 12 წლის ასაკში დავიწყე მასთან ვარჯიში, 3 წლის შემდეგ წამოვედი თბილისში და ავთო გახოკიძესთან გავაგრძელე. ვმადლობ უფალს, რომ მომეცა საშუალება, ვიყო წარმატებული ადამიანი, წარმატებული სპორტსმენი და გავახარო ჩემი გულშემატკივარი, ვასახელო ოჯახი და ჩემი ქვეყანა. მადლობა ღმერთს და ამ სპორტს ყველაფრისთვის.

დღესდღეობით ვსწავლობ ფიზკულტურის უნივერსიტეტში, სახელმწიფომ წარმატებულ სპორტსმენებს ხელი შეგვიწყო ვიყოთ განათლებულებიც. დღესდღეობით ვეუფლები მწვრთნელის სპეციალობას. ვეცდები, ჩემი გამოცდილება და ცოდნა მომავალი თაობის აღზრდის საქმეში ჩავდო, მინდა, ბოლომდე სპორტში დავრჩე, მის გარეშე არ შემიძლია.

• "კეთილი ადამიანი ვარ“

ჩემი მეუღლე - ანა დემურია 2016 წელს გავიცანი ბათუმში, შეგვიყვარდა ერთმანეთი და დაოჯახება გადავწყვიტეთ. ორი მშვენიერი ქალიშვილი გვყავს - მარიამი და ელენე. ანა ყველაფრის მოგვარებაში მეხმარება, მხარში მიდგას და, პარალელურად, ბავშვებს ზრდის. მისი უზომოდ მადლიერი ვარ...

როგორია ლაშა? - მოკლედ ვიტყვი, რომ კეთილი ადამიანი ვარ, მიყვარს სხვების დახმარება.

პირველი წარმატება 2010 წელს მოვიდა - ახალგაზრდებში ევროპის ჩემპიონატში მივიღე მონაწილეობა და სამი ოქროს მედალი მოვიპოვე. მარცხიც მქონია, ისიც, ტრავმის გამო - 2012 წელს ისრაელში მესამე ადგილზე გავედი. მას მერე 5-ჯერ ვარ დიდებში მსოფლიოს ჩემპიონი, 5-ჯერ ევროპის ჩემპიონი, 2-ჯერ ოლიმპიური ჩემპიონი, ახალგაზრდებში 2-ჯერ მაქვს მოპოვებული ევროპის ჩემპიონობა, ასევე, ახალგაზრდებში მოვიპოვე მსოფლიო ჩემპიონობაც.

ახლა ვისვენებ... რამდენიმე დღეში დავიწყებ ვარჯიშს და ევროპის ჩემპიონატისთვის მზადებას, რომელიც აპრილის თვეში ჩატარდება. ჯერ არ ვიცი, სად გაიმართება ჩემპიონატი. იმედი მაქვს, იქაც ვასახელებ ჩემს ხალხს და ქვეყანას.

• "მათ ბოლომდე ვენდობი"

როცა ჩემპიონატია, ჩემი ოჯახი და ახლობლები ჩემზე მეტად განიცდიან და ნერვიულობენ, მაგრამ იციან, რომ გამარჯვებული დავბრუნდები. ძლიერი კი ვარ, მაგრამ ყველა ადამიანს აქვს რაღაც სისუსტე, დადებითი და უარყოფითი მხარეები... მიმნდობი ადამიანი ვარ, ზოგჯერ მინანია ეს კიდეც, მაგრამ არაფერია...

იმისათვის, რომ სპორტსმენი წარმატებული იყოს, მთავარია ხელშეწყობა, კარგი მწვრთნელი და კოლექტივი, რომელშიც ის მოხვდება. ძალიან გამიმართლა, რომ ჩემი მწვრთნელი მამაჩემი იყო, შემდეგ ავთანდილ გახოკიძე, გიორგი ასანიძე... დარწმუნებული ვარ, მათ პროფესიონალიზმში და ბოლომდე ვენდობი ამ ადამიანებს. ამ მხრივ ძალიან გამიმართლა. მწვრთნელების გარდა, სპორტსმენი უნდა იყოს მებრძოლი და დამთმობიც. შეიძლება რაღაცაზე მეც ბევრჯერ გავბრაზებულვარ, მაგრამ არ ვიმჩნევ...

• "დიდი პასუხისმგებლობაა, როცა უძლიერეს ადამიანად გაღიარებენ"

მანქანები მიყვარს ძალიან... ასევე, მიყვარს ნადირობა და ვარ კანონმორჩილი მონადირე. თუმცა ხშირად ამას ვერ ვახერხებ, სულ შეკრება-ვარჯიშებზე ვარ. მყავს რამდენიმე მანქანა, რომლითაც, მგონი, ყველა დადის ჩემს გარდა. ამას ხუმრობით ვამბობ, ვისთვის დამენანება... თვითონ "ტოიოტა - 200“-ით ვმოძრაობ. ყველაზე ძალიან მაინც გულშემატკივრების რაოდენობა მახარებს, მინდა, მათ არასდროს გავუცრუო იმედი. სპორტსმენისთვის მნიშვნელოვანია, როცა მას აფასებენ და უყვართ. როცა დარბაზი ივსება, მეც ვივსები. დიდი რაოდენობით გულშემატკივარი მყავს და სულ ემატება და ემატება რაოდენობა. სპორტსმენები ყველაფერს მოწყვეტილი ვართ, მათ შორის, თავისუფალ დროსაც და ჩვენთვის ძალიან მნიშნელოვანია გვერდში მდგომი ადამიანები. მოკლედ, ბევრი რაღაცაა, რაც მახარებს. დიდი პასუხისმგებლობაა, როცა პლანეტის უძლიერეს ადამიანად გაღიარებენ. ამით ბედნიერი ვარ და იმ ადამიანებს, ვინც ჩემზე იმედებს ამყარებენ, მინდა, მაქსიმალურად გავუმართლო იმედები, უფრო დიდ წარმატებას და დიდ შედეგს მივაღწევ.

• "კიდევ გავაუმჯობესებ რეკორდს"

მსოფლიო ძალოსნობის ისტორიაში არავის ჰქონია ამხელა შედეგი, იმედი მაქვს, კიდევ გავაუმჯობესებ რეკორდს, ალბათ მექნება ამის საშუალება და რესურსი. დიდი მადლობა მინდა ვუთხრა ambebi.ge-ს, თქვენს მკითხველს თანადგომისთვის, იმისთვის, რომ გადაწყვიტეს ჯერ წარმოდგენილი ვყოფილიყავი ამ სიაში და მერე ხმა მოეცათ ჩემთვის. მადლობა ყველაფრისთვის, მიყვარხართ და გეფერებით. მადლობა ქართველ გულშემატკივარს, ყველას ბედნიერ ახალ წელს ვუსურვებ.