"მწირი ინფორმაცია, რაც გვაქვს, ისაა, რომ იგი კიდევ უფრო სწრაფად ვრცელდება" - რას ამბობს პროფესორი მაკა ბულეიშვილი კორონავირუსის ახალ შტამზე?
პროფესორ მაკა ბულეიშვილის განცხადებით, "იანვარში შესაძლოა, "ომიკრონის“ შტამი დომინანტი გახდეს“.
მისი თქმით, ბოლო დღეებში "ომიკრონის“ გავრცელებამ მოიმატა და არაა გამორიცხული, რომ "შემდეგ კვირას უფრო არასახარბიელო მაჩვენებელი იყოს“.
"წინა კვირაში შედარებით სტაბილური მდგომარეობა იყო, მაგრამ ბოლო დღეებია ისევ შეინიშნება სერიოზული მატება. ცხადია, ეს ყველაფერი დაკავშირებულია მობილობასთან. ნაკლებად ხდება ნიღბის ტარება. გასაგებია, რომ მოსახლეობა დაიღალა და ამასთან, სადღესასწაულო დღეებია, მაგრამ მაქსიმალურად უნდა ვეცადოთ, რომ რეკომენდაციები დავიცვათ. ესაა ერთადერთი გამოსავალი, რომ სტაბილური მდგომარეობა შევინარჩუნოთ. შესაძლოა, რომ შემდეგ კვირას უფრო არასახარბიელო მაჩვენებელი გვქონდეს“,- განაცხადა მაკა ბულეიშვილმა.
რაც შეეხება კორონავირუსის ახალ შტამს, რომელიც საფრანგეთში აღმოჩნდა, ბულეიშვილის განცხადებით, არსებული ინფორმაციით, ეს შტამი კიდევ უფრო სწრაფად ვრცელდება და შესაძლოა, მას "განსაკუთრებული თვისებები“ ჰქონდეს.
"ეს შტამი საფრანგეთში აღმოჩნდა და სერიოზული კვლევაა დაწყებული. დაინფიცირების მატებაც ფიქსირდება. მწირი ინფორმაცია, რაც გვაქვს, ისაა, რომ იგი კიდევ უფრო სწრაფად ვრცელდება. ახალი შტამის შემდგომი თვისებები ჯერ არ ვიცით, როგორი იქნება, ასევე, ჯერჯერობით ინფორმაცია არ გვაქვს, რა სახის დაზიანებას გამოიწვევს ორგანიზმში, რა სახის სიმპტომებით იქნება", - განაცხადა მაკა ბულეიშვილმა მედიაცენტრ "მთავარში“ გამართულ პრესკონფერენციაზე.