"ჩემს გამარჯვებას ვუძღვნი ამ საოცარ ადამიანს, რომლის "ენითაც" იწერება ჩემი ტექსტები" - "საბას" გამარჯვებულმა გიორგი სოსიაშვილმა ჯილდო დედას გადასცა
ყოველწლიური ლიტერატურული კონკურსის "საბას" გამარჯვებულმა გიორგი სოსიაშვილმა ჯილდო დედას გადასცა.
"ამ საოცარ ადამიანს ვუძღვნი ჩემ გამარჯვებას, ყველაზე ბედნიერ წუთებს-დედაჩემს, სიცოცხლის უშრეტ წყაროს, რომლის "ენითაც" იწერება ჩემი ტექსტები. დიდი ხანი მინდა, რომ მყავდე და დატკბე ბედნიერებით" - წერს მწერალი სოციალურ ქსელში.
გიორგი სოსიაშვილმა ნომინაციაში "წლის საუკეთესო პროზაული კრებული" გაიმარჯვა.
ლიტერატურული კონკურსის, "საბას“ გამარჯვებულები გახდნენ:
- წლის საუკეთესო რომანი: თამთა მელაშვილი, "შაშვი შაშვი მაყვალი“(სულაკაურის გამომცემლობა);
- წლის საუკეთესო პოეტური კრებული: ნუგზარ ზაზანაშვილი, "წავა წავა წავა წავა“ (ინტელექტი);
- წლის საუკეთესო პროზაული კრებული: გიორგი სოსიაშვილი, "ოთხი მოთხრობა“ (გორის უნივერსიტეტის გამომცემლობა);
- წლის საუკეთესო პიესა: პაატა ციკოლია, "მედეა s01e06“ (saba.com.ge);
- წლის საუკეთესო ლიტერატურული დებიუტი: ნანა აბულაძე რომანი: "აკუმი“ (ინტელექტი); ირინა ტაბაღუა პოეტური კრებული: "ტელეფას ცხვარი“ (ინტელექტი);
- წლის საუკეთესო ლიტერატურული კრიტიკა: ნანა ტრაპაიძე "ლიტერატურა ლიტერატურის შესახებ“ (ბათუმის სახელმწიფო უნივერსიტეტის გამომცემლობა); ნინო დიანოსაშვილი, "შეშლილი სიშმაგე თუ შმაგი შეშლილობა?! (ლოგოსი);
- წლის საუკეთესო ესეისტიკა და დოკუმენტური პროზა: მარიამ ხუცურაული, "მარილი გემოვნებით“ (პალიტრა L);უცხოური ნაწარმოების საუკეთესო ქართული თარგმანი: ანი კოპალიანი, ტომას სტერნზ ელიოტის "მოხუცი ოპოსუმის წიგნი პრაქტიკული კატების შესახებ” (ინტელექტი); გიორგი ლობჟანიძე, ჯალალ ედ-დინ რუმის "არსთა მესნევი“ (სულაკაურის გამომცემლობა);
- პრემია "საბა“ ლიტერატურის განვითარებაში შეტანილი განსაკუთრებული წვლილისათვის მიიღო პოეტმა და მთარგმნელმა გივი შახნაზარმა.
წელს ლიტერატურულ კონკურსს დაემატა მე-10 ნომინაცია, რომელიც არასამთავრობო ორგანიზაცია "საერთაშორისო გამჭვირვალობა - საქართველომ“ დააწესა. ჯილდო ნომინაციაში, "საბჭოთა და პოსტსაბჭოთა ისტორიის რეფლექსია ქართულ ლიტერატურაში“, მიიღეს ბიძინა მაყაშვილმა რომანისთვის "ბლუზი მტკვრის პირას“ (სულაკაურის გამომცემლობა) და ივა ფეზუაშვილმა რომანისთვის "ბუნკერი“ (ინტელექტი).
პრემია "საბას“ჟიურის შემადგენლობაში იყვნენ: პროზაიკოსი ბესო სოლომონაშვილი, პოეტი და პროზაიკოსი ალექსანდრე ლორთქიფანიძე, დრამატურგი დავით გაბუნია, მთარგმნელი თამარ ჯაფარიძე, პროზაიკოსი ნესტან-ნენე-კვინიკაძე.
ყოველწლიური ლიტერატურული პრემია "საბა“ დაარსდა 2002 წელს. მისი დამფუძნებლები არიან "თიბისი" და რატი ამაღლობელი. პრემიის მიზანია წლის საუკეთესო წიგნებისა და ავტორების გამოვლენა.