"ეს საქმე პოლიტიკოსებმა კი არა, ეკლესიამ უნდა ითავოს..." - როგორია პოლიტიკოსების მოლოდინები შერიგებაზე და რა შეფასებები მოჰყვა პრეზიდენტის გუშინდელ მიღებას?
ორბელიანების სასახლეში საქართველოს პრეზიდენტმა სალომე ზურაბიშვილმა პოლიტიკური პარტიების წარმომადგენლებისათვის წინასაახალწლო მიღება გამართა.
მიღებას პოლიტიკური პარტიების ნაწილი დაესწრო. მათ შორის იყვნენ, როგორც მმართველი პარტიის, "ქართული ოცნების" წარმომადგენლები, ასევე სხვადასხვა ოპოზიციური პარტიების წარმომადგენლები.
პრეზიდენტმა კიდევ ერთხელ მოუდოდა შერიგებისკენ პარტიოებს და აღნიშნა, რომ შერიგება არის შედეგი და არა საწყისი ეტაპი.
"შერიგება იწყება მოსმენით, აზრების გაცვლით, გრძელდება სიმართლის თქმით - ამ პროცესის დაწყებას არ შეიძლება წინ უსწრებდეს რაიმე ფორმის წინაპირობა" - თქვა ზურაბიშვილმა.
პარტია "ქართული ოცნების" თავმჯდომარე ირაკლი კობახიძემ აღნიშნა, რომ ნებისმიერ შერიგებას საფუძვლად უნდა ედოს სამართლიანობა, უნდა შეფასდეს კონკრეტული პოლიტიკური ძალების წარსული, დღევანდელობა და მათი სამომავლო პერსპექტივაც.
" მადლობა, პრეზიდენტს. მისი დამოკიდებულების, განწყობისთვის და ინიციატივისთვის. ეს ინიციატივა მნიშვნელოვანია ქვეყნისთვის. რაც შეეხება შერიგებას, შერიგებასთან დაკავშირებით ჩვენ გამოვხატეთ ჩვენი პოზიცია. ჩვენი პოზიციაა, რომ ნებისმიერ შერიგებას საფუძვლად უნდა ედოს სამართლიანობა. სამართლიანობაში იგულისხმება ის, რომ უნდა შეფასდეს, მათ შორის, კონკრეტული პოლიტიკური ძალების წარსული, დღევანდელობა და მათი სამომავლო პერსპექტივა, ამის მიხედვით შეგვიძლია გავაგრძელოთ ურთიერთობა, ამა თუ იმ პოლიტიკურ პარტიასთან.
მე არ მჯერა იმის, რომ ეს პოლიტიკოსები, რომლებიც დღეს არ მოვიდნენ პრეზიდენტის სასახლეში, აღიარებენ დანაშაულებს, რაც არის ნებისმიერი შერიგების აუცილებელი წინაპირობა. მე არ მჯერა, რომ ისინი აღიარებენ საკუთარ დანაშაულებს. ამის მორიგი ნიშანი იყო ის, რომ არ მოვიდნენ პრეზიდენტის სასახლეში. ადამიანები, რომლებიც სააკაშვილს დღემდე მესამე პრეზიდენტს უწოდებენ, კლიშეებს ამკვიდრებენ, პატივს არ სცემენ საქართველოს მოქმედ პრეზიდენტს, რაც ყველფერზე მეტყველია და ცხადყოფს. მათ დამოკიდებულებას პოლიტიკური პროცესის მიმართ და საკუთარი დანაშაულების მიმართ“,- აღნიშნავს კობახიძე.
დავით ბაქრაძის თქმით, პრეზიდენტი საკმაოდ ადეკვატური იყო ქვეყანაში არსებული უმძიმესი ვითარების შეფასებისას.
“დავიწყებ იმით, რომ შეფასებით ნაწილში, მთელ რიგ შეფასებებს ვიზიარებ, რაც მოვისმინე, თუ რამდენად მძიმე მდგომარეობაა ქევყანაში, რამდენად დიდი უპერსპექტივობის განცდაა, როგორ ხდება ახალგაზრდების გადინება, რამდენად დიდ პრობლემას ქმნის დაპირისპირება. ამ ნაწილში, რაც შეეხება ქვეყანაში არსებული უმძიმესი ვითარების შეფასებას, დიახ, მიმაჩნია, რომ პრეზიდენტი საკმაოდ ადეკვატური იყო.
მთავარი რასაც საზოგადოება ელოდა და რისი პასუხი მინდოდა, კონკრეტული ნაბიჯები რა უნდა გაკეთდეს. დღეს ჩვენ კონკრეტიკა ვერ მოვისმინეთ. პრეზიდენტთან მქონდა საუბარი, დავუსვი ის კითხვები, რაზეც ვსაუბრობდი, რომ რა უნდა გაკეთდეს კონკრეტულად პოლიტიკური დევნის დასასრულებლად, იმისთვის, რომ პოლიტიკური ლიდერები არ იყვნენ ციხეში. მისი მხრიდან სრული მზადყოფნაა, რომ პროცესი გაგრძელდეს. მზად არის ყველა პოლიტიკურ პარტიას შეხვდეს კონკრეტულ დეტალებზე სასაუბროდ. იმედი მაქვს, იმის გამო, რომ ეს პირველი შეხვედრა იყო, ჩავთვალოთ, რომ პირველი შეხვედრის გამო, დეტალებზე საუბარი არ შედგა. კარგად უნდა გვესმოდეს, რომ ამ დეტალებზეა დამოკიდებული თანხმობის პროცესი“,- აღნიშნავს ბაქრაძე.
პარტია "საქართველოსთვის" წევრი ნათია მეზვრიშვილი მიიჩნევს, რომ "ქართული ოცნების" განცხადებებიდან გამომდინარე, აღნიშნული პროცესის მიმართ სკეპტიკური დამოკიდებულება მაინც არსებობს.
"რა თქმა უნდა, სკეპტიციზმი არსად წასულა, ვნახეთ განცხადებები, რაც „ოცნებამ“ გააკეთა და ალბათ გააგრძელებენ ასეთი რადიკალური განცხადებების კეთებას, მაგრამ ჩვენ ამ პროცესში, რომელსაც აქვს ძალიან მნიშვნელოვანი მიზანი, რა თქმა უნდა, მონაწილეობას მივიღებთ, ჩვენ წვლილს ამ ყველაფერში შევიტანთ. მოლოდინებზე საუბარი ალბათ ცოტა ნაადრევია. დღეს აქ მყოფ პარტიებს არ გამოუხატავთ საკუთარი პოზიციები, აქ საუბრობდა პრეზიდენტი. ამ შეხვედრაზე იყო ინდივიდუალური საუბრები, ზოგადად, მათ შორის გავცვალეთ აზრები, ვის როგორ წარმოუდგენია საერთოდ ამ პროცესის გაგრძელება. ჩვენთვის მნიშვნელოვანია ქვეყნის ინტერესი და არა ვიწრო პარტიული ინტერესი, არა ეს ვაჭრობა და არა ის განცხადებები, აბსოლუტურად მიუღებელია, რასაც „ოცნება“ აკეთებს. დღეს „ქართულ ოცნებასთან“ ჩვენს პარტიას მისალმება ჰქონდა მხოლოდ, დანარჩენი ვერ მოხერხდა. კომუნიკაცია ვიღაცასთან მოხერხდა, ვიღაცასთან არა, ბევრი ხალხი იყო, მაგრამ სალამი ყველასთან მოხერხდა“, - განაცხადა ნათია მეზვრიშვილმა.
არმაზ ახვლედიანი მიიჩნევს, რომ დიალოგზე პრეზიდენტის ინიციატივა გულწრფელია და “დანარჩენი უკვე ყველას საქმე და პასუხისმგებლობის საკითხია”.
"არაერთი მწვავე კრიზისი მახსოვს საქართველოში ბოლო 30 წლის განმავლობაში. ისიც მახსოვს, როდის შევძელით და როდის ვერა, ამ კრიზისიდან გამოსვლა. დარწმუნებული ვარ, პრეზიდენტ ზურაბიშვილის ინიციატივა გულწრფელია. ამას ჩემთვის პრინციპული მნიშვნელობა აქვს. ახლა, როდესაც მისი მოკლე სიტყვა მოვისმინე, მივხვდი, რომ არ შევცდი. ჩემთვის ამ შინაგან რწმენას ყველაზე განსაკუთრებული მნიშვნელობა აქვს. დანარჩენი მხოლოდ პრეზიდენტ ზურაბიშვილის საქმე არ არის. უკვე ყველას საქმეა. ესაა პასუხისმგებლობისა და იმის თემა, შეგვიძლია თუ არა, რომ ცოტა ხნით გადავდოთ ამბიციები”, - განაცხადა არმაზ ახვლედიანმა.
"მოქალაქეების" ლიდერმა, ალეკო ელისაშვილმა აღნიშნა, რომ თუ ე.წ. შერიგებაზე თანხმობის მიღწევა გინდა, პირობები არ უნდა დააყენო და ზიზღი აღარ უნდა აფრქვიო.
"ქართულ ოცნებას“ თუ მოვუსმენთ, ისინი იძახიან, რომ რა კარგია შერიგება და მეორე წინადადებიდან იწყებენ ზიზღის ფრქვევას. „ნაციონალური მოძრაობაც“ ანალოგს აკეთებს. კარგია შერიგება, მაგრამ... და იწყებენ პირობების დაყენებას. თუ თანხმობის მიღწევა გინდა, პირობები არ უნდა დააყენო, ზიზღი აღარ უნდა აფრქვიო. ამით არიან დაკავებულები. აი ეს მაძლევს იმის ეჭვის საფუძველს, რომ შეიძლება ამ საქმისგან არაფერი გამოვიდეს. მათ შორის, მიხეილ სააკაშვილი უნდა გათავისუფლდეს სამართლებრივი გზით, გაიმართლოს თავი, ღვთის წყალობით, მარტო მურუსიძის სასამართლოს იმედზე არ ვართ, ვართ სტრასბურგის სასამართლოს იმედზე, რომლის გადაწყვეტილებებში ეჭვი არ შეგვაქვს, გაიმართლოს თავი სტრასბურგის სასამართლოში" - აღნიშნავს ელისაშვილი.
გიორგი ვაშაძის თქმით, "სტრატეგია აღმაშენებელი“ ყველაფერს გააკეთებს, რომ შეთანხმება შედგეს და ქვეყანა მძაფრი ეკონომიკური და სოციალური კრიზისიდან გამოვიდეს.
"მარტივ კითხვას ვსვამ, თუ ერთმანეთს არ ველაპარაკებით, არ ვხვდებით, არ ვუსმენთ, რანაირად შეიძლება, რომ გამოსავალი მოვძებნოთ? დავამტვრიოთ თავ-პირი ერთმანეთს? მაშინ ავიღოთ „ბოქსის“ ხელთათმანები, ჩავიცვათ და ვინც ვის მოერევა, მეტად დაარტყამს, იმან მოიგოს. მე არ მგონია, რომ საქართველოს დღეს სჭირდება „ბოქსის“ ხელთათმანებით ერთმანეთთან საუბარი“, - განაცხადა გიორგი ვაშაძემ.
"ტრიბუნას" ლიდერმა დავით ჭიჭინაძემ განაცხადა, რომ შერიგებას და შუამავლობის საკითხი პოლიტიკოსებმა კი არა, ეკლესიამ უნდა ითავოს.
"შერიგება არა და ვაჭრობა - გარიგება ნამდვილად და თან „გადამგდებლებთან"! მით უმეტეს, სალომე ზურაბიშვილს ამის არც მანდატი აქვს და არც ბერკეტი, კობახიძეს კი ვინ მისცა იმის უფლება, რომ ვინმეს რამე აპატიოს?! აღსარებებიც ჩაიბაროს ბარემ.
ისე, ამ 18 წლის მანძილზე ამდენი ვალი რომ დაგროვდა ქვეყანაში, ხალხი ასე გაღატაკდა და დაბეჩავდა, ამის ჩამდენების „პატიებასაც“ გულისხმობენ მავანნი?! - ეს აინტერესებთ ადამიანებს და კიდევ ის, ხვალ პოლიტიკური ძალებმა რომ გამოგვიცხადონ, შევრიგდითო, (უფრო სწორედ გავრიგდითო) და შემდეგ არჩევნები რომ ჩატარდება, წაგებული მხარე აღიარებს შედეგებს, თუ ისევ კრიზისში შევალთ?" - აღნიშნა მან.