"აცრილ ადამიანებს "ომიკრონიც“ კი ისე ძალიან არ ვნებს, როგორც - აუცრელებს“ - ინტერვიუ ხათუნა ზახაშვილთან

პანდემიის დაწყებიდან დღემდე, კორონავირუსმა არაერთხელ განიცადა მუტაცია და ახალი შტამები გავრცელდა. ბოლო ასეთი ვარიანტი "ომიკრონია“, რომელზეც მეცნიერებმა, ჯერჯერობით, ბევრი არაფერი იციან. მიუხედავად იმისა, რომ ის დღეისთვის ყველაზე სწრაფად გავრცელებად ვარიანტად მოისაზრება, სფეროს სპეციალისტები ვარაუდობენ, რომ წინამორბედ ვერსიებთან შედარებით, ნაკლებად საშიშია.

"ფაიზერის“ ვაქცინის მწარმოებელი კომპანიის მიერ "ომიკრონთან“ დაკავშირებული ბოლო კვლევით, მხოლოდ "ბუსტერდოზის“ გაკეთება დამცველობით უნარს 75%-მდე ზრდის, მაშინ როდესაც, ორი დოზით აცრილი ადამიანების დაცვა 35%-ს შეადგენს. ამ და "ბუსტერდოზებთან“ დაკავშირებულ სხვა კითხვებზე დაავადებათა კონტროლისა და საზოგადოებრივი ჯანმრთელობის ეროვნული ცენტრის გადამდებ დაავადებათა დეპარტამენტის ხელმძღვანელი ხათუნა ზახაშვილი გვპასუხობს.

- როგორია "ბუსტერდოზის“ გაკეთებაზე მომართვიანობა, გაზრდილია თუ არა მაჩვენებელი და რამდენად მარტივია მისი მიღება - სავალდებულოა თუ არა ამისთვის სპეციალურ საიტზე რეგისტრაცია?

- რა თქმა უნდა, მზარდია სტატისტიკა, ეს ადამიანები დიდხანს ელოდნენ "ბუსტერს“, მოწადინებულები არიან. შესაბამისად, მიმართვიანობა ამ მხრივ გაზრდილია და ორი დოზით აცრილები იკეთებენ "ბუსტერს“ ინტენსიურად. რაც შეეხება წინასწარ დაჯავშნას, ის სავალდებულო არ არის. ვისაც უწევს "ბუსტერის“ გაკეთება, შეუძლიათ პირდაპირ მივიდნენ ამცრელ ცენტრებში, სადაც ადგილზე გაატარებენ რეგისტრაციას და უპრობლემოდ ჩაიტარებენ ვაქცინაციას. წინასწარ საიტზე დაჯავშნას ის პლუსი აქვს, რომ დაყოვნების დროს უმცირებს ადამიანს და ვისაც როგორ მოუხერხდება, ისე შეუძლია გაიაროს ეს პროცედურა.

- შესაძლებელია თუ არა, რომ "ფაიზერის“ ვაქცინით ორჯერადად აცრილმა მოქალაქემ, სურვილის შემთხვევაში, "ბუსტერი“ 5 თვის გასვლამდე გაიკეთოს?

- გარკვეული კატეგორიის ადამიანებისთვის, ვინც გაიკეთა "სინოვაკის“ ან "სინოფარმის“ ვაქცინა, როგორც იმუნიზაციის ექსპერტთა ტექნიკურმა საბჭომ გადაწყვიტა, ეს შესაძლებელია გაკეთდეს სამი თვის ზევით ვადაში. ვისაც წინა ორი აცრაც "ფაიზერით“ აქვს გაკეთებული, მწარმოებლის რეკომენდაციით, საბჭომ მიიღო გადაწყვეტილება, რომ ეს იყოს 5 თვის ვადა. ჯერჯერობით ეს ვადები მოქმედებს.

- სოციალურ ქსელში, სხვადასხვა ჯგუფში, მოქალაქეები წერენ, რომ ზოგიერთ ამცრელ პუნქტში მესამე დოზით აცრისას მათ ეუბნებიან, რომ მეოთხე დოზის გაკეთებას 21 დღეში შეძლებენ. რამდენად სწორი ინფორმაციაა და შეუძლია თუ არა მოქალაქეს, სურვილის შემთხვევაში, მეოთხე დოზის გაკეთება?

- ეს ეხებათ მხოლოდ იმ ადამიანებს, რომლებიც გარკვეულ ქვეყნებში მიდიან, სადაც "სინოვაკისა“ და "სინოფარმის“ ვაქცინებს არ აღიარებენ და მხოლოდ "ფაიზერის“ ორი დოზით აცრილებს უშვებენ საზღვარზე შეზღუდვების გარეშე. ნებისმიერი მსურველისთვის, რა თქმა უნდა, ასე არ არის - დღეს "ფაიზერი“ მომინდა, ხვალ - სხვა და ზეგ -კიდევ სხვა. იმუნიზაცია საკმაოდ სერიოზული პროცესია და მას თანამიმდევრული განხორციელება უნდა.

- სოციალურ ქსელის მომხმარებლები ასევე ხშირად წერენ, რომ ამცრელ პუნქტში ისინი სხვაგან გადაამისამართეს იმ მიზეზით, რომ მათ ვადაგასული ვაქცინები აქვთ და აცრას ვერ გაუკეთებენ. რამდენად სწორი ინფორმაციაა ექიმების მხრიდან ეს, გვაქვს თუ არა ქვეყანაში "ვადაგასული ვაქცინები“?

- ქვეყანაში არცერთი ვაქცინა არ გვაქვს ვადაგასული - ამას სრული პასუხისმგებლობით ვამბობ. შესაბამისად, ეს არის არასწორი ინფორმაცია. შენახვის პირობებიდან გამომდინარე, სხვადასხვა ვადა აქვს ყველას. დღესდღეობით, ამ დროისთვის, 2 მილიონზე მეტი ვაქცინაა საქართველოში ხელმისაწვდომი, რაც არსებული მოთხოვნის შესაბამისია.

- ბოლო კვლევით, ორი დოზით ვაქცინირებული ადამიანი კორონავირუსის ახალი შტამის -"ომიკრონისგან" 35%-ით არის დაცული, მაშინ, როდესაც "ბუსტერით“ აცრილის დაცვა 75%-მდე იზრდება. იმ ფონზე, როდესაც ასეთი ახალი შტამია და ძალიან ცოტა კვლევაა ჩატარებული, რამდენად სარწმუნო შეიძლება იყოს ეს დასკვნა?

- ეს არის თვითონ "ფაიზერის“ მწარმოებელი კომპანიის კვლევის შედეგი. სარწმუნოა თუ არა, ეს უკვე დამოკიდებულია იმაზე, როგორ დაიჭერს "ომიკრონი“ თავს ფართო საზოგადოებაში გავრცელებისას, რამდენად მასშტაბურად გავრცელდება მსოფლიოში. ასევე მნიშვნელობა აქვს იმასაც, რომ მხოლოდ ერთი ვაქცინის მიმართ ჩამოყალიბებული იმუნიტეტი ან მესამე, "ბუსტერდოზით“ შექმნილი დამცველობითი უნარი რამდენად განსაზღვრავს ამ ვარიანტების გავრცელების აქტივობას. უნდა დავაკვირდეთ ამ ყველაფერს, როგორ განვითარდება პროცესები. მაგრამ დღეს რაც ვიცით, ეს არის ერთმნიშვნელოვნად ასე, რომ აცრილ ადამიანებს "ომიკრონიც“ კი ისე ძალიან არ ვნებს, როგორც აუცრელებს.

- ncdc-ს აქვს თუ არა უკვე დაზუსტებული პასუხი, რომ საქართველოში არსებული ვაქცინები "ომიკრონის“ საწინააღმდეგოდ მუშაობს და თან ეფექტიანია...

- დაზუსტებული პასუხი ამ ეტაპზე ნამდვილად არ გვაქვს, თუმცა იმედი გვაქვს, რომ იმოქმედებს.

- ასევე საინტერესოა მოზარდებთან დაკავშირებით იმუნიზაციის პროცესიც - ბავშვთა კლინიკებში საკმაოდ ბევრი კოვიდინფიცირებული მოზარდი მკურნალობს და, როგორც სამკურნალო დაწესებულებებში აცხადებენ, მათი უმრავლესობა არავაქცინირებულია. რა ღონისძიებებითაა შესაძლებელი ამ ასაკობრივი ჯგუფის იმუნიზაციის პროცესში ჩართვა?

- მოკიდონ მშობლებმა ხელი თავის შვილებს, აცრან და თვითონაც აიცრან.

- რა უნდა გაითვალისწინონ ხანდაზმულებმა "ბუსტერდოზის“ გაკეთებისას ? რაიმე კონკრეტული მითითებები ხომ არ არსებობს მათთვის, როგორც რისკჯგუფისთვის?

- არაფერი, გარდა იმისა, რომ თუ დრო მოუვიდათ, წავიდნენ და აიცრან. დამატებით გამოკვლევებსა და ანალიზებს არ საჭიროებენ. ვისაც მისვლა არ შეუძლია, არსებობს აცრის მობილური ცენტრები.

- ასევე საინტერესო სტატისტიკა გვაქვს რეგიონების მიხედვითაც. მაგალითად, ვაქცინაციის მსურველთა რაოდენობა დაახლოებით 45%-ით გაიზარდა მცხეთა-მთიანეთში, მაგრამ არის რეგიონები, სადაც, წინა პერიოდებთან შედარებით, საკმაოდ შემცირდა ეს რიცხვი. რამ განაპირობა ეს? რა სამუშაოებს ატარებს დაავადებათა კონტროლის ეროვნული ცენტრი, რა ღონისძიებებს ახორციელებს ამ მიმართულებით?

- ჩვენს გულისტკივილს ის რეგიონები წარმოადგენს, სადაც ვაქცინაციის მოცვა არის ძალიან დაბალი, ასეთებია - ქვემო ქართლი, სამცხე-ჯავახეთი და სწორედ ამ რეგიონებზე უნდა გავაკეთოთ აქცენტირება, მეტი მოწოდება, მეტი შრომა უნდა ჩაიდოს ადამიანებისთვის ინფორმაციის მიწოდებისთვის, რადგან იგივე 60 წელს გადაცილებულმა მოქალაქეებმა გაიგონ იმ ბენეფიტების შესახებ, რასაც მათ აძლევს სახელმწიფო აცრების დაწყების შემთხვევაში და რა სიკეთეები შეიძლება მოუტანოს მათ ჯანმრთელობას დროულმა აცრამ. რაც შეეხება ღონისძიებებს, სისტემატურად მიმდინარეობს ინფორმაციის მიწოდება ჩვენს ხელთ არსებული ყველა არხით - ეს არის საზოგადოებრივი ცენტრები ადგილებზე, რომლებიც ცდილობენ, რაც შეიძლება ხელმისაწვდომი გახადონ ინფორმაცია მოსახლეობისთვის. და რაც ყველაზე მთავარია, ამ შემთხვევაში, ადგილობრივი ხელისუფლების მიერ სამუშაოების გაწევა, თავის მოსახლეობასთან მისვლა და მათთვის ინფორმაციის მიტანა, რომ - თქვენ გესაჭიროებათ აცრა, მიბრძანდით და აიცერით.