"სამოქალაქო თანხმობა არ ნიშნავს იმას, რომ ჩვენ ხელიხელჩაკიდებულებმა მელიქიშვილის და რუსთაველის გამზირზე ვიაროთ და ვისეირნოთ" - ნიკა მელია
"სამოქალაქო თანხმობა არ ნიშნავს იმას, რომ ჩვენ ხელიხელჩაკიდებულებმა მელიქიშვილის და რუსთაველის გამზირზე ვიაროთ და ვისეირნოთ - ეს ნიშნავს, რომ ფუნდამენტურ პრინციპებზე შევთანხმდეთ და ასე იმართებოდეს სახელმწიფო" - ამის შესახებ "ნაციონალური მოძრაობის" თავმჯდომარემ ნიკა მელიამ განაცხადა.
მისი თქმით, ხელისუფლება თავისივე დაგებულ მახეშია გაბმული.
"ბევრ ადამიანს ჰგონია, რომ ამდენი პოლიტიკოსის, ამდენი მედია მფლობელის დაპატიმრება აქვს განზრახული რეჟიმს და მეორეს მხრივ არიან ადამიანები, რომლებიც თვლიან, რომ ამდენი დაკავებები მომაკვდინებელი იქნება რეჟიმისთვის, მაგრამ რა ქნას ხელისუფლებამ, რომელმაც თავისივე დაგებულ მახეში ამოყო თავი, გამამართლებელ განაჩენს ხომ არ გამოატანინებს იგივე ნიკა გვარამიას, ჯაფარიძე-ხაზარაძის და ვატო წერეთლის მამის წინააღმდეგ? - არა, ბუნებრივია იძულებულია მიყვეს დინებას და თავად ვერ გადაუწყვეტია რა გააკეთოს.
მთავარია, საქართველოს თითოეულ მოქალაქეს ახსოვდეს, რომ თქვენს ხელშია ცვლილებები, რაც არ უნდა ვერაგი იყოს მტერი და ასეთი არის ოლიგარქი, რომლის უკანაც დგას რუსეთის სპეცსამსახურები. ისინიც კი დარწმუნდნენ, რომ ვერც ერთი პოლიტიკოსის და მედია მფლობელის დაჭერით ვერავის ვერ გატეხავენ და მოძრაობა ცვლილებებისთვის გაგრძელდება და გაგრძელდება კიდევ უფრო ძლიერი მუხტით. ამ სახელმწიფოს დასავლური ტიპის მომავალი უბრალოდ არ ექნება, ვიდრე "ქართული ოცნებაა" მართვის სადავეებთან. მნიშვნელოვანია სიმტკიცით და ნერვიულობის გარეშე სვლა გავაგრძელოთ. სამოქალაქო თანხმობაზე როდესაც ჩვენ ვსაუბრობთ, სამოქალაქო თანხმობა არ ნიშნავს იმას, რომ ჩვენ ხელიხელჩაკიდებულებმა მელიქიშვილის და რუსთაველის გამზირზე უნდა ვიაროთ და ვისეირნოთ - ეს ნიშნავს, რომ ფუნდამენტურ პრინციპებზე შევთანხმდეთ და ასე იმართებოდეს სახელმწიფო", - განაცხადა ნიკა მელიამ.
გარდა ამისა, ის გამოეხმაურა პრეზიდენტის სალომე ზურაბიშვილის საახალწლო ვახშამზე მიპატიჟებას და აღნიშნა, რომ "ნაციონალური მოძრაობა" მსგავსი ტიპის ღონისძიებას არ შეუერთდება.
"მადლობა მიპატიჟებისთვის, მაგრამ ჩვენ, რა თქმა უნდა, ამ ტიპის ღონისძიებაში მონაწილეობას არ მივიღებთ, მონაწილეობას მივიღებთ მას შემდეგ, რაც შეხვედრა გაიმართება იმ საკითხთან დაკავშირებით, რაზეც სალომე ზურაბიშვილმა ისაუბრა რამდენიმე დღის წინ", - განაცხადა მელიამ.