ავსტრიაში ქირურგმა პაციენტს შეცდომით ჯანსაღი ფეხის ამპუტაცია ჩაუტარა - ექიმის საბედისწერო შეცდომა

ქირურგის შეცდომის გამო, ავსტრიაში, ფრეისტადის კლინიკაში, ასაკოვანი პაციენტი, რომელსაც მარცხენა ფეხის ამპუტაცია ესაჭიროებოდა, მარჯვენა ფეხის გარეშე დარჩა.

პაციენტი კლინიკაში შარშან მაისში იმყოფებოდა, რათა ფეხზე ამპუტაცია ჩაეტარებინა, მაგრამ ექიმმა სხვა კიდური მონიშნა მოსაკვეთად.

შედეგად, ქირურგმა, მოხუც კაცს, შეცდომით, ჯანსაღი ფეხი მოკვეთა. სავალალო შემთხვევის შედეგი, მხოლოდ ორი დღის შემდეგ გაირკვა, როცა პაციენტს ამპუტირებულ ფეხს უხვევდნენ.

სასამართლო შემთხვევიდან 1 წლის შემდეგ გაიმართა და 43 წლის ქირურგს მოსამართლემ 2,700 ევროს გადახდა დააკისრა. აღსანიშნავია, რომ პაციენტი სასამართლომდე ერთი დღით ადრე გარდაიცვალა.

კლინიკის დირექტორმა შემთხვევიდან მალევე, კონფერენციაზე, საჯაროდ მოიხადა ბოდიში.

სასამართლოზე ქირურგს ჰკითხეს, თუ რატომ მონიშნა ჯანსაღი ფეხი ამპუტაციის ჩასატარებლად, რაზეც ქალმა უპასუხა: "უბრალოდ, არ ვიცი.“

წყარო

მოამზადა ანა სიბოშვილმა