"თუ ონლაინკაზინოებს ავკრძალავთ, ის ადამიანები, რომლებსაც თამაშის სურვილი აქვთ, სხვა საშუალებას მოძებნიან... სიმპტომს ებრძვიან ამ გადაწყვეტით და არა დაავადებას" - ჰერმან საბო
"თუ ონლაინ კაზინოებს ავუკრძალავთ იმ ადამიანებს, რომლებსაც თამაშის სურვილი აქვთ, სადღაც წავლენ - ნაწილი "პროქსით“ მოძებნის გამოსავალს და ნაწილი უბანში ჩავა და "მარწყვებს დაარტყამს“, - ამის შესახებ "გირჩის“ ერთ-ერთმა ლიდერმა, დეპუტატმა ჰერმან საბომ "პალიტრანიუსის“ გადაცემაში "ნიუსრუმი“ განაცხადა, რითაც გამოეხმაურა პრემიერის ინიციატივას ონლაინ აზარტული თამაშების შემზღუდავი რეგულაციების დაწესებასთან დაკავშირებით.
მისივე თქმით, პრემიერის ინიციატივები და მისი გააქტიურება პიარული ნაწილი იყო.
"კონკრეტულად ეს გადაწყვეტა პრობლემას ვერ ჭრის - სიმპტომს ებრძვიან ამ გადაწყვეტით და არა დაავადებას. ციფრულ სამყაროში აკრძალო რაღაც საიტზე შესვლა - ეს არის წარმოუდგენელი. თუ ადამიანს დაინტერესება აქვს, ამის ბევრი ხერხი არსებობს. თუ ონლაინ კაზინოებს ავკრძალავთ, ის ადამიანები, რომლებსაც სურვილი აქვთ თამაშის, სადღაც წავლენ, ნაწილი "პროქსით“ მოძებნის გამოსავალს, ნაწილი - უბანში ჩავა და "მარწყვებს დაარტყამს“, - განაცხადა ჰერმან საბომ.
მანვე აღნიშნა, რომ ირაკლი ღარიბაშვილის განცხადებების 80%-ს უკუშედეგი ექნება და არ მოაგვარებს იმ პრობლემებს, რომელიც დღეს საქართველოს მოსახლეობას აქვს.
ცნობისთვის, პრემიერის განცხადებით, პირველ ეტაპზე იგეგმება ონლაინ კაზინოებისთვის გადასახადის გაზრდა, რეკლამის აკრძალვა, მომხმარებლების ასაკობრივი ზღვარის 25 წლამდე აწევა, მეორე ეტაპზე კი საერთოდ აკრძალვა.