შთამბეჭდავი ისტორია 3 წლის ბიჭზე, რომელიც მე-6 სართულიდან გადმოვარდა
3 წლის ცოტნეს გადარჩენის საოცარი ისტორია საკმაოდ მძიმე ინციდენტით იწყება - პატარა ბიჭი მეექვსე სართულის აივნიდან გადავარდა და უმძიმესი მრავლობითი დაზიანებები მიიღო. დედას ამის შესახებ ძიძის ტელეფონის ნომრიდან, უცნობმა ადამიანმა შეატყობინა. არც კი სჯეროდა, რომ მისი შვილი გადარჩებოდა.
"მეგონა, მატყუებდნენ. მის სიცოცხლეს ვერ ვიჯერებდი. ცოტნეს მდგომარეობა იმდენად მძიმე იყო, რომ გადარჩენის 1%-საც ვერ ვუშვებდი გონებაში,“- იხსენებს დედა, რომლის შვილიც უკიდურესად მძიმე ტრავმული შოკით, სისხლდენითა და მრავლობითი ტრავმებით სასწრაფო დახმარების ბრიგადამ ჰოსპიტალში გადაიყვანა. 3 წლის ცოტნეს თავის, სახისა და კიდურების მრავლობითი მოტეხილობები აღენიშნებოდა.
"მაგნიტურ-რეზონანსული და კომპიუტერული კვლევების შედეგების გათვალისწინებით, პაციენტს მრავალმხრივი ქირურგიული ჩარევა ჩავუტარეთ. თანმიმდევრობით, საჭიროებისამებრ განვახორციელეთ ოპერაციები თავის ტვინის, სახესა და კიდურების არეში. მას ქალა ფუძის მრავლობითი მოტეხილობა, ორივე მხრის ძვლის, წინა მხრის ძვლების და მენჯის ძვლის მრავლობითი ტრავმები აღენიშნებოდა. მკურნალობის პროცესი დიდ მოთმინებას საჭიროებდა,“- იხსენებს ი. ციციშვილის სახელობის ბავშვთა კლინიკის ტრავმატოლოგია-ორთოპედიის მიმართულების ხელმძღვანელი, თამაზ გაბუნია. მისივე შეფასებით, წარმატებული შედეგი მკურნალობის სწორი ტაქტიკის, თანმიმდევრული მოქმედებებისა და მრავალპროფილური გუნდის მაქსიმალური მობილიზებით იქნა მიღწეული.
დღეს ცოტნე ცხოვრებას ჩვეული რიტმით განაგრძობს და, პერიოდულად, სამედიცინო შემოწმებას გადის. მისი ჯანმრთელობის მდგომარეობა სტაბილური და დამაკმაყოფილებელია.