ნობელის პრემიის ლაურეატ თურქ მწერალს, ორჰან ფამუქს 3-წლიანი პატიმრობა ემუქრება - რა წერია წიგნში, რომლის გამოც მას "თურქების შეურაცხყოფაში" სდებენ ბრალს
ნობელის პრემიის ლაურეატი თურქი მწერლის, ორჰან ფამუქის წინააღმდეგ გამოძიება მიმდინარეობს. იძიებენ მის ახალ რომანში, სახელად - Nights of Plague, თანამედროვე თურქეთის დამაარსებლის, მუსტაფა ქემალ ათათურქის შეურაცხყოფისა და თურქეთის დროშის დაცინვის ფაქტებს.
წიგნი მიმდინარე წლის მარტში გამოვიდა. პირველი საჩივარი კი უკვე აპრილში დაიწერა და ის შეეხებოდა რომანში მოთხრობილ გამოგონილ ამბავს, რომელიც ოტომანთა გამოგონილ კუნძულზე 1900-იანი წლებში ვითარდება და შავი ჭირის გავრცელების შესახებ გვიამბობს.
საჩივრის ავტორი ადვოკატი ტარკან ულუქი იყო, რომელმაც მწერალი დაადანაშაულა "სიძულვილისა და მტრობის“ გაღვივებაში. ბრალდების მხარის მტკიცებით, ფამუქი "მუსტაფა ქემალ ათათურქის შეურაცხყოფითა" და ნაწარმოებში "თურქეთის დროშის დაცინვით" სიძულვილის გაღვივებას უწყობს ხელს. იმჟამად სტამბოლის სასამართლომ გადაწყვიტა, საქმე დაეხურა მტკიცებულებების არარსებობის გამო, მაგრამ ტარკან ულუკმა სასამართლოს გადაწყვეტილება გაასაჩივრა და ახლა გამოძიება თავიდან დაიწყო.
კანონი 5816, რომლის მიხედვითაც ახლა გამოძიება მიმდინარეობს, მიზნად ისახავს დაიცვას "ათათურქის ხსოვნა“ თურქეთის ნებისმიერი მოქალაქის შეურაცხყოფისგან. თუკი სასამართლო მწერალს ბრალს დაუმტკიცებს, მას სამი წლით თავისუფლების აღკვეთა ემუქრება.
ორჰან ფამუქი ბრალდებებს უარყოფს. "წიგნზე ხუთი წელი ვმუშაობდი და იქ არ არის არავითარი უპატივცემულობა სახელმწიფოს გმირი დამფუძნებლების ან თვით ათათურქის მიმართ. რომანი დაწერილია აღტაცებითა და პატივისცემით ამ ლიბერტარიანელი და გმირი ლიდერებისადმი“, - აცხადებს მწერალი.
აღსანიშნავია, რომ ფამუქი მანამდე სამშობლოდან დევნილი იყო "თურქობის შეურაცხყოფის“ გამო. ყოველივე კი უკავშირდებოდა იმას, რომ ერთ-ერთ ინტერვიუში 1915 წლის მოვლენებზე და ქურთებისა და სომხების მკვლელობების შესახებ ისაუბრა. ბრალდება მწერალს 2006 წელს მოეხსნა და ამავე წელს მან მიიღო ნობელის პრემია ლიტერატურაში.