"მე რა პოზაში გადამიყვანია ერთი ადგილიდან მეორეზე პაციენტი იცით?" - რას აცხადებს ლადო კახაძე მიხეილ სააკაშვილზე
ექიმი და პარლამენტარი ლადო კახაძე "რადიო ჯორჯიან თაიმსთან“ ინტერვიუში მიხეილ სააკაშვილის შიმშილობის შესახებ საუბრობს და დასძენს, რომ თავად აცრილია "ნაციონალური მოძრაობის“ წინააღმდეგ ვაქცინით და სხვებსაც იგივეს მოუწოდებს.
ჟურნალისტის კითხვაზე, როგორ შეფასებდა მიხეილ სააკაშვილის გადაყვანის ფორმას რეანომობილიდან გლდანის ე.წ. ციხის საავადმყოფოში, დეპუტატი პასუხობს:
"ჩემი ახალგაზრდობის პერიოდი გაგახსენოთ? - მე რა პოზაში გადამიყვანია ერთი ადგილიდან მეორეზე პაციენტი იცით? - ზოგჯერ ზურგზე მომიკიდებია, ზოგჯერ ხუთ კაცს აგვიკიდებია უხერხული პოზით. მთავარი იყო, ის ადამიანი ადგილზე მიგვეყვანა, სადაც ვუშველიდით. პრეზიდენტი მაშინ არის ღირსეული თუ ჩვეულებრივ მოქალაქისგან არ განსხვავდება და არ იკადრებს მოქალაქეზე ზევიდან დადგომას ან ზემოდან ყურებას.
კითხვაზე თქვენი აზრით, შიმშილობს თუ არა მიხეილ სააკაშვილი, ლადო კახაძემ უპასუხა:
"მეც ბევრჯერ მიშიმშილია წონაში დასაკლებად. მაგრამ კონცენტრანტებს ვღებულობდი. ექვსი საათი რეპეტიცია მქონდა, როდესაც ვცეკვავდი, ორი საათი საუნა, დღის მანძილზე ნახევარი ჭიქა მაწონი და მეოთხედი შოკოლადი, მხოლოდ ამას ვიღებდი. 20 დღის განმავლობაში 12 კილო დავიკელი, მე ეს მჭირდებოდა. ახლოს რომ მივიდე და კანზე დავაკვირდე, შეიძლება შევატყო, მაგრამ ბოდიშს გიხდით, მიხეილ სააკაშვილს ვერ შევატყე ვიზუალურად ის უარყოფითი შედეგი, რომელმაც შეიძლება უჯრედი დაარღვიოს. იმ რესურსით, რაც მის კანქვეშა ცხიმს აქვს, შეიძლება კიდევ გაძლოს...“
"ნაციონალური მოძრაობის“ შეფასებისას კი ამბობს, რომ ადამიანი ამ პარტიის საწინააღმდეგო ვაქცინით უნდა აიცრან.
"როგორც ექიმი გიპასუხებთ, ტუბერკულიოზს არასოდეს ვენდობი, არც კოვიდს, არც შიდსს. ის დამაზიანებელი იქნება ადამიანისთვის ნებისმიერ შემთხვევაში. ასევე არ ვენდობი "ნაციონალურ მოძრაობას". პოლიტიკური ვაქცინაცია რომ იყოს საჭირო, ამ მოძრაობის წინააღმდეგ პოლიტიკურ ვაქცინაციას ჩავატარებდი. მე აცრილი ვარ, შეიარაღებული ვარ, მე არ დამემართება "ნაციონალური მოძრაობა“. სხვებსაც მივმართავთ, თუ გინდათ აიცრათ და კარგად იყოთ, აიცერი "ნაციონალური მოძრაობის“ წინააღმდეგ...“ - ამბობს კახაძე.