"განვიხილავთ წინადადებას, რომ მშობლების სურვილით და თანხმობით, 12-15 წლამდე ყველა ბავშვი აიცრას" - ამირან გამყრელიძე

დაავადებათა კონტროლის ეროვნული ცენტრის ხელმძღვანელი ამირან გამყრელიძე აცხადებს, რომ კორონავირუსის საწინააღმდეგო ვაქცინით დღეისთვის 12-დან 15 წლამდე ასაკის 106 ბავშვია სრულად აცრილი.

როგორც ამირან გამყრელიძე განმარტავს, "ფაიზერით" 10 ათასზე მეტი 16-17 წლის მოზარდია აცრილი.

მისივე თქმით, იმუნიზაციის საბჭოზე 12-დან 15 წლამდე ასაკის ბავშვებისთვის აცრაზეც იმსჯელებენ. კერძოდ, აცრიან თუ არა იმ ბავშვებს, ვისაც სამედიცინო გართულება არ აქვს.

"იმუნიზაციის საბჭოსთვის მომზადებულია სამეცნიერო კომიტეტის გადაწყვეტილება 12-15 წლამდე ბავშვებისთვის. ადრე თუ გვქონდა მხოლოდ სამედიცინო ჩვენებებით აცრა, დღეს ერთ-ერთ წინადადებად იქნება განხილული, რომ გაიხსნას მშობლების სურვილით და თანხმობით ყველა ბავშვისთვის. დღეისთვის, 12-დან 15 წლამდე სრულად აცრილია 106 ბავშვი. ხვალ, ან ზეგ იმუნიზაციის საბჭო ჩატარდება. იმუნიზაციის საბჭო შესაბამის გადაწყვეტილებას მიიღებს. 10 ათასზე ოდნავ მეტი 16-17 წლის მოზარდია "ფაიზერით" არის აცრილი“, - აღნიშნავს გამყრელიძე.