რუსეთის გვარდიამ და ჩეჩნეთის პოლიციამ გროზნოში ჯადოქრობის ბრალდებით 3 ქალი დააკავეს - რა ამოიღეს ნივთმტკიცებად?

ჩეჩნეთი "კუდიანებს" კვლავაც წარმატებით ებრძვის. 30 ოქტომბერს, რუსეთის გვარდიამ და პოლიციამ ქალაქ გროზნოში დააკავეს ჩეჩნეთის რესპუბლიკის მცხოვრები სამი ქალი, რომლებიც ბრალდებული არიან ჯადოქრობაში. ამის შესახებ ვრცლად ისაუბრეს რესპუბლიკის სახელმწიფო ტელევიზიით გადაცემულ სიუჟეტში, რომელშიც ლაპარაკი იყო, რომ დაკავებულებთან ჩატარდა "პროფილაქტიკურ-აღმზრდელობითი მუშაობა“. ერთ-ერთ დაკავებულზე ისიც კი თქვეს, რომ ის ჯინებს ჰყავთ შეპყრობილი. სამართალდაცავებმა ნივთმტკიცებად ამოიღეს ამულეტები, რომელთაც ქალები ვითომდა ავი თვალისგან დასაცავად ჰყიდნენ, ასევე ე.წ. ოკულტიზმის სეანსების ფარული ჩანაწერები, რაც სამართადაცვებმა გამოძიების პროცესში მოიპოვეს. საინტერესოა, რომ სიუჟეტში ნახსენები იყო საქართველოც, ითქვა, რომ ჩვენს ტელევიზიებში ჯადოქრებსა და ექსტრასენსებს შორის შეჯიბრებებიც კი ეწყობა.

როგორც ირკვევა, ჯადოქრობაში ეჭვმიტანილები რუსეთის გვარდიის 249 - ე მოტორიზებულმა ბატალიონმა "იუგმა“ და გროზნოს პოლიციის განყოფილების თანამშრომლებმა ერთობლივად გამოავლინეს.

ეს პირველი შემთხვევა არ არის, როდესაც ჩეჩნეთში მაგვარი ბრალდებით აკავებენ ადამიანებს. მარტო ამ წელიწადს არაერთი მსგავსი შემთხვევა მოხდა და 20-ზე მეტი ადამიანი, უმეტესად ქალები დააკავეს.

მაგალითად, იყო ასეთი შემთხვევა, ურუს-მარტანის რაიონში დააკავეს ორი ქალი და ერთი მამაკაცი, რომელთაგან ერთ-ერთი ყვებოდა თუ რით კვებავდა "ჯინებს“ (საქონლის ხორცით და ლავაშით). რეპორტიორის თქმით, ერთ-ერთი "კუდიანი“ კი კლიენტ ქალს ჯადოს მოხსნას სთავაზობდა და ურჩევდა, ქათმის ბულიონში ებანავა.

ოკულტიზმში ეჭვმიტანილი ადამიანების დევნა ჩეჩნეთში 2013 წელს დაიწყო და 2019 წელს ახალი ძალით გაგრძელდა. დაკავებულები, როგორც წესი, საჯაროდ ინანიებენ ჩადენილს და ბოდიშს იხდიან ტელეკამერის წინ. ხელისუფლება ჯადოქრებთან ერთად იმ ადამიანებსაც დევნის, რომლებიც ოკულტისტების მომსახურებით სარგებლობენ. ჩეჩნეთში ამბობენ, რომ "ჯადოქრობა ტერორიზმსა და ნარკომანიაზე უფრო სახიფათოა“.