თალიბების ლიდერი, ჰაიბათულა ახუნზადა, რომელიც საზოგადოების ნაწილს გარდაცვლილი ეგონა, საჯარო სივრცეში გამოჩნდა

თალიბების ლიდერი, 60 წლის მოლა ჰაიბათულა ახუნზადა, 2016 წლის შემდეგ საზოგადოებრივი თავშეყრის ადგილზე პირველად გამოჩნდა. როგორც.france24.com წერს,მას შემდეგ, რაც იგი თალიბების უზენაესი ლიდერი გახდა, ჰაიაბითულა ასკეტურად ცხოვრობდა.

30 ოქტომბერს ის ჯარისკაცებსა და მოწაფეებს ესაუბრა. ამის შესახებ ნათქვამია თალიბანის სოციალურ მედიაში გავრცელებულ აუდიოჩანაწერში.

"ღმერთმა დააჯილდოვოს ავღანეთის ჩაგრული ხალხი, რომელიც 20 წელი ებრძოდა ურწმუნოებს და მჩაგვრელებს. განზრახული მაქვს ვილოცო თქვენთვის და თქვენ ილოცებთ ჩემთვის".- ამბობს ახუნზადა ჩანაწერში.

ღონისძიებაზე დაცვის მკაცრი ზომები მოქმედებდა, რის გამოც ფოტო და ვიდეო არ გავრცელებულა.

უცხოური მედიის თანახმად, ახუნზადა აქამდე უფრო სასულიერო ლიდერად ითვლებოდა, ვიდრე სამხედრო მეთაურად, მაგრამ ბოლო პერიოდში მის მიერ გაკეთებული განცხადებები აძლიერებს ვარაუდს, რომ მთავრობის ხელმძღვანელობაში აქტიურად ჩართვას აპირებს.

აღსანიშნავია, რომ ვრცელდებოდა ცნობები, რომ "თალიბანის“ ლიდერი გარდაცვლილი იყო, რადგან ახუნდზადა აგვისტოში დედაქალაქის აღების შემდეგაც კი არ გამოჩენილა საჯაროდ, რამაც ადამიანებს სპეკულაციის საშუალება მისცა.