ღარიბაშვილი ცოლ-შვილით, ივანიშვილი მეუღლესთან ერთად, კალაძე ვაჟის თანხლებით... - ვინ ვისთან ერთად მივიდა საარჩევნო უბანზე (ფოტოები)
დღეს, 30 ოქტომბერს, საქართველოში ადგილობრივი თვითმმართველობის არჩევნების მეორე ტური მიმდინარეობს.
საარჩევნო უბნები 07:00 საათზე გაიხსნა, ხმის მიცემის პროცედურა კი 08:00 საათზე დაიწყო. მეორე ტურში 5 თვითმმართველ ქალაქსა და 15 მუნიციპალიტეტში მერებს აირჩევენ. 24 საარჩევნო ოლქში კი, საკრებულოების 42 მაჟორიტარი წევრია ასარჩევი.
დილიდან საკუთარი არჩევანი უკვე გააკეთეს მმართველი გუნდისა და ოპოზიციის წარმომადგენლებმა. პრემიერ-მინისტრი ირაკლი ღარიბაშვილი საარჩევნო უბანზე მეუღლესთან და შვილებთან ერთად მივიდა. მან საზოგადობას აქტიურობისკენ მოუწოდა და აღნიშნა, რომ თავად ხმა ქვეყნის სტაბილურობასა და სიმშვიდეს მისცა.
„მე, რა თქმა უნდა, ხმა მივეცი ჩვენი ქვეყნის მშვიდობიან განვითარებას. ჩვენს ქვეყანას და ჩვენს ხალხს, პირველ რიგში, სჭირდება მშვიდობა, სიწყნარე, სტაბილურობა, განვითარება და კეთილდღეობა, რაც არის ჩვენი მთავარი საერთო ეროვნული იდეა და მიზანი.
მე მჯერა, რომ ჩვენი ხალხი მიიღებს მორიგ ბრძნულ გადაწყვეტილებას და ხმას მისცემს ქვეყნის სტაბილურობას და არა ქაოსს, შფოთს, არეულობას, დაპირისპირებას და პოლარიზაციას, რომელიც მომდინარეობს დესტრუქციული ოპოზიციის მხრიდან. მჯერა, რომ კიდევ ერთხელ დღეს ყველა ერთად სწორ არჩევანს გავაკეთებთ.
მჯერა, ხვალინდელი დღე იქნება უკეთესი, ვიდრე დღევანდელი. მოწოდებული ვართ, რომ თავისუფალი, გამჭვირვალე არჩევნები ჩავატაროთ. მჯერა, მშვიდად ჩაივლის დღევანდელი დღე. მინდა მივმართო ყველას თხოვნით, ყველანი მივიდეთ არჩევნებზე, ჩვენი არჩევანი დავაფიქსიროთ. ეს არის მნიშვნელოვანი ჩვენი ქვეყნისთვის.
ჩვენ საერთო ეროვნული არჩევნები მოვიგეთ, მივიღეთ 47%, რითაც დავასრულეთ სპეკულაციები შესაძლო რიგგარეშე არჩევნებთან დაკავშირებით. მოგეხსენებათ, ოპოზიციის მთავარი სლოგანი იყო რეფერენდუმი და ეს რეფერენდუმი მათ წააგეს. ასევე წააგეს 44 მუნიციპალიტეტში. ჩემი ღრმა რწმენით, ყველგან, ოცივე მუნიციპალიტეტში მოვიგებთ“, - აღნიშნავს პრემიერი.
დედაქალაქის მერობის კანდიდატი კახა კალაძე საარჩევნო უბანზე შვილთან ერთად მივიდა. ის აცხადებს, რომ ხმა საკუთარ თავს მისცა. კახა კალაძემ მოსახლეობას აქტიურობისა და მხარდაჭერისკენ მოუწოდა.
"ხმა მივეცი განვითარებას, იმას, რომ მეტი სიცოცხლე შევიტანოთ ყველა უბანში. რა თქმა უნდა, შემოვხაზე კახა კალაძე - 41, იმისთვის, რომ ის აღმშენებლობა და განვითარება, რაც დაწყებული გვაქვს 2017 წლიდან დედაქალაქში, გაგრძელდეს. ვერავინ და ვერაფერი ვერ შეაჩერებს ამ განვითარებას, ეს არის ის, რაც ყველაზე მეტად სჭირდება ამ ქალაქს. ჩვენ ბევრი მნიშვნელოვანი პროექტი განვახორციელეთ ბოლო წლების განმავლობაში, გვაქვს კონკრეტული ნაბიჯები გადადგმული ყველა მიმართულებით, რეფორმები, სიახლეები, ეს აუცილებლად გაგრძელდება. მინდა დედაქალაქის მოსახლეობას მოვუწოდო - იაქტიურეთ მეგობრებო" - აღნიშნა კალაძემ.
მეუღლსთან ერთად იმყოფებოდა საარჩევნო უბანზე ყოფილი პრემიერ-მინისტრი ბიძინა ივანიშვილი. მან საკუთარი პოლიტიკური არჩევანი მე-4 საარჩევნო უბანზე გააკეთა. ყოფილ პრემიერ - მინისტრს ჟურნალისტებთან კომენტარი არ გაუკეთებია.
როგორც ყველა არჩევნებზე, წელსაც, საარჩევნო უბანზე მარტო მივიდა ოპოზიციის თბილისის მერობის კანდიდატი ნიკა მელია.
როგორც მელიამ აღნიშნა, მმართველ გუნდს ხელისუფლების დათმობის შიში აქვს, „თუმცა ეს ადრე თუ გვიან უნდა მომხდარიყო“.
"ჰაერში გამარჯვების სურნელი ტრიალებს. მსგავსი არაფერი შეიმჩნეოდა პირველ ტურში. მოვუწოდებ „ქართულ ოცნებას“, ნუ იდარდებენ, ნუ ინერვიულებენ. ასე მუშაობს დემოკრატია. მესმის, რომ მათ ხელისუფლების დათმობის შიშები აქვთ, მაგრამ ეს ადრე თუ გვიან უნდა მომხდარიყო.
ეს ხდება დღეს, ეს ხდება თბილისში ეს ყველაფერი თბილისიდან იწყება. თბილისში გამარჯვების შემდეგ შევქმნით პრეცედენტს, საქმით დავამტკიცებთ, რომ კოალიციური მმართველობა ერთადერთი სწორი ფორმაა მმართველობის, რომელიც ცენტრალურ დონეზე იქნება გადატანილი“,- განაცხადა ნიკა მელიამ.
ასევე მარტო დააფიქსირა საკუთარი არჩევანი პარტია "საქართველოსთვის" ლიდერმა გიორგი გახარიამ. როგორც მან აღნიშნა, 2021 წლის ადგილობრივი არჩევნები ბოლო 9 წლის განმავლობაში ყველაზე ცუდი არჩევნები იყო.
„სამწუხაროდ, ეს არჩევნები არც სამართლიანი იყო, არც თავისუფალი. დარწმუნებული ვარ, ეს ბოლო 9 წლის განმავლობაში ყველაზე ცუდი არჩევნები იყო. საერთოდ, ყველა თუ არ დავფიქრდით არჩევნებში ფულის როლზე, თუ არ დავფიქრდით არჩევნებში ადმინისტრაციული რესურსების როლზე და თუ არ დავფიქრდით პოლიტიკურად ნეიტრალურ საჯარო კლასზე, საერთოდ, შესაძლოა, არჩევნებმა აზრი დაკარგოს,.
რაც შეეხება მეორე ტურს, რა თქმა უნდა, მე ჩემი მოქალაქეობრივი ვალდებულება უნდა მომეხადა. მე მოვიხადე ეს ვალდებულება. ხმა მივეცი საქართველოსთვის. დღეს ჩვენს 11 მაჟორიტარს და მერობის ერთ კანდიდატს აქვს საარჩევნო დღე და დღესაც მინდა, თითოეულ ამომრჩეველს მოცემული ხმისთვის მადლობა გადავუხადო“,- განაცხადა გახარიამ.
