"მოლნუპრავირმა" მოლოდინს გადააჭარბა" - რა ვიცით კორონავირუსის საწინააღმდეგო წამალზე, რომლის ავტორიზაციასაც მთელი მსოფლიო იმედით ელოდება

მედიკამენტი, რომელსაც შეუძლია კლინიკებში პაციენტების მოხვედრის საჭიროება შეამციროს და ქვეყნებს კორონას გავრცელების კონტროლი გაუადვილოს, მალე მთელი მსოფლიოსთვის გახდება ხელმისაწვდომი. ამის შესახებ გამოცემა "ინდეფენდენთი" წერს.

საუბარია ამერიკული ფარმაცევტული კომპანიის Merck & Co-ს მიერ შექმნილ წამალზე. კვლევა ჯერ კიდევ გასულ წელს დაიწყო და ახლა უკვე FDA-სგან (აშშ-ის სურსათისა და წამლის ადმინისტრაცია) ავტორიზაციას ელოდებიან.

• რა სახის მედიკამენტია "მოლნუპრავირი"

"მოლნუპრავირი" - ასე ეწოდება ანტივირუსულ მედიკამენტს, რომელიც კორონა ვირუსს ორგანიზმში გავრცელებაში შეუშლის ხელს. მას აქვს კაფსულის ფორმა და კორონათი ინფიცირებულებისთვის პირველი სამკურნალო საშუალება იქნება, რომლის მიღებასაც პაციენტები ორალური გზით შეძლებენ.

• სად და როგორ დამზადდა?

"მოლნუპრავირი" ატლანტაში, Emory-ის უნივერსიტეტში დაამზადეს. Merck & Co-მ 2020 წელს ცხოველებზე დაკვირვების შემდეგ დაამტკიცა, რომ ეს წამალი ვირუსულ გადაცემას და ფილტვების დაზიანებას უშლის ხელს.

• რა აჩვენა კლინიკურმა ცდებმა?

"მოლნუპრავირის" კაფსულა გამოსცადეს ისეთ კოვიდიან პაციენტებზე, რომელთაც ჰქონდათ დიაბეტი, გულსისხლძარღვთა დაავადებები და ჭარბწონიანობა. ცდების შედეგად დამტკიცდა, რომ წამლის მიღების შემდეგ, დამატებითი მკურნალობა აღარ იყო საჭირო, ხოლო ვირუსით ინფიცირებულთა სიკვდილიანობა 50%-ით შემცირდა.

ცდებში სულ 762-მა აუცრელმა პაციენტმა მიიღო მონაწილეობა. ინფიცირებულთა ნაწილი (14%) "მოლნუპრავირის" ნაცვლად პლაცებოს იღებდა. იმ პაციენტებში, რომლებმაც ""მოლნუპრავირი"ს" კაფსულა მიიღეს, არცერთი გარდაცვალების ფაქტი არ დაფიქსირებულა. ხოლო პლაცებოს მიმღებთაგან 8 ადამიანი გარდაიცვალა.

• მედიკოსების შეფასებები

Merck & Co-ს ვიცე პრეზიდენტს, დილ ლის განცხადებით, "მოლნუპრავირმა" მოლოდინს გადააჭარბა და იმაზე კარგი შედეგები მიიღეს, ვიდრე ელოდნენ. წამლის მოქმედებას დამოუკიდებელი მედიკოსების ჯგუფისგანაც დადებითი შეფასებები მოჰყვა. მათ ცდების ადრიანად შეწყვეტაც კი მოითხოვეს, რადგან უკვე ნათელი იყო "მოლნუპრავირის" ძლიერი მოქმედების სავარაუდო შედეგები.

კოვიდის დადასტურების შემთხვევაში, ამ კაფსულების მიღება პაციენტს სახლშიც შეეძლება, ჰოსპიტალიზაციის გარეშე, რაც შვება იქნება კლინიკებისთვის და თავად ინფიცირებულებისთვის. მედიკოსების ვარაუდით, უფრო ადვილად გაკონტროლდება კორონას გავრცელება სუსტი ჯანდაცვის სისტემის მქონე ღარიბ ქვეყნებშიც.

• რას უნდა ველოდეთ?

მიუხედავად იმისა, რომ FDA-ის წამლისთვის ჯერ ავტორიზაცია არ მიუნიჭებია, Merck & Co-მ უკვე დაიწყო "მოლნუპრავირის" წარმოება. რისკის მიუხედავად, კომპანია დარწმუნებულია, რომ ისინი ლიცენზიას მიიღებენ და 2021 წლის ბოლომდე მათ უკვე 10 მილიონი სამკურნალო კურსისთვის საჭირო დოზა ექნებათ წარმოებული.

აშშ-ის მთავრობაში აცხადებენ, რომ "მოლნუპრავირი" მთელი მსოფლიოსთვის იქნება ხელმისაწვდომი. Merck & Co კი ითანამშრომლებს მედიკამენტების მწარმოებელ კომპანიებთან, რათა დაბალი ფენებისთვისაც იყოს მისი შეძენა შესაძლებელი.

მოსალოდნელია, რომ FDA წამალთან დაკავშირებით საბოლოო დასკვნას 2021 წლის ბოლოსთვის გამოაქვეყნებს და მედიკამენტის შესახებ უფრო მეტი გახდება ცნობილი.

მოამზადა ანა სიბოშვილმა