ბილ გეითსის ქალიშვილის ზღაპრული ქორწილი 300 სტუმრით - ტორტი, კაბა და 16-მილიონიან ფერმაში გამართული წვეულების დეტალები (ფოტოები)
"მაიკროსოფტის" დამფუძნებლის, მსოფლიოს ერთ-ერთი ყველაზე მდიდარი ადამიანის, ბილ გეითსის ქალიშვილი, 25 წლის ჯენიფერ გეითსი დაქორწინდა.
როგორც "ნიუ იორკ პოსტი" წერს, ქორწილის ცერემონია 16 ოქტომბერს, გეითსების 16 მილიონ დოლარად შეფასებულ ვესტჩესტერის ფერმაში შედგა.
აღსანიშნავია, რომ ეს ქონება ბილმა შვილს სტენფორდის უნივერსიტეტის დასრულების შემდეგ გადასცა.
მედიის ცნობით, ჯენიფერ გეითსა და მის რჩეულს, ნაიელ ნასარს წინა დღეს, მედიისგან ფარულად, მუსლიმური წესითაც გადაუხდიათ ქორწილი.
პატარძალს ვერა ვანგის მიერ სპეციალურად მისთვის შეკერილი თეთრი კაბა ეცვა, რომლის ზედა ნაწილიც მაქმანებით იყო გაფორმებული. აღსანიშნავია, რომ მან ქორწილში რამდენიმე კაბა მოირგო.
ცნობისთვის, ჯენიფერ გეითსი და ახლა უკვე მისი ქმარი, ნასარი პროფესიონალი ცხენოსნები არიან და გარკვეულწილად სიმბოლურია, რომ მათი ქორწილი სწორედ ფერმაში შედგა. შემოდგომის ფოთლებითა და ულამაზესი ყვავილებით გაწყობილი პეიზაჟი კი წვეულებას ზღაპრულ ელფერს ჰმატებდა.
ქორწილს 300 სტუმარი ესწრებოდა. გეითსები მოწვეულ სტუმრებს ფრანგი შეფების მიერ მომზადებული კერძებით და ფუნთუშეულობით გაუმასპინძლდნენ. სტუმრების განწყობაზე კი Coldplay-მ იზრუნა.
როგორც Fox Business იუწყება, ქორწილისთვის სულ მცირე, 2 მილიონი დოლარი დაიხარჯა.
მოამზადა ანა სიბოშვილმა