ბათუმში ჩამონგრეული სადარბაზოს გვერდით მდგომი შენობაც ავარიულია და მისი დემონტაჟი უნდა მოხდეს - სპეციალისტი
მენაშენეთა ასოციაციის თავმჯდომარის, ირაკლი როსტომაშვილის განცხადებით, ბათუმში ჩამონგრეული სადარბაზოს მარჯვნივ მდგომი შენობაც ავარიულია. ამის შესახებ როსტომაშვილმა „პალიტრანიუსის“ ეთერში გადაცემაში „360 გრადუსი“ ისაუბრა.
მისივე თქმით, აღნიშნულ შენობაში მოსახლეობის შეყვანა დაუშვებელია და მისი დემონტაჟი უნდა მოხდეს.
„ხელმარჯვნივ შენობას, ერთი კადრი იყო და ჩანდა მისი გვერდითი კედელი, სპეციალისტი ამას დააკვირდებოდა, ამოღებული ჰქონდა გვერდითი კედლები, მომიჯნავე კედლები დანგრეულ სახლთან. რა მიზნით იცით? ყველა შენობაში არის ე.წ. ტემპერატურული ნაკერი, დაახლოებით 30-40 სმ სისქის არის ხოლმე. ამ ტემპერატურული ნაკერის მიერთების მიზნით გვერდითა კედლები ამოღებულია და იყო ბეტონი დასხმული. ეს სახლიც ავარიულია, მთელი პასუხისმგებლობით ვამბობ. მოსახლეობა გამოიყვანეს და იქ არ შეიძლება მოსახლეობის შეყვანა, უნდა მოხდეს იმ სახლის დემონტაჟი“, - განაცხადა ირაკლი როსტომაშვილმა.