"არასდროს დამავიწყდება საიდან მოვდივარ... მე სიღატაკეში ვიზრდებოდი" - სენატორი მოკრივე, რომელიც ქვეყნის პრეზიდენტობისთვის ემზადება
მენი პაკიაო - არამხოლოდ თანამედროვეობის, არამედ ყველა დროის ერთ - ერთი საუკეთესო მოკრივეა. ის ასევე, სპორტის ისტორიაში ერთ - ერთი ყველაზე მაღალანაზღაურებადი მებრძოლია. 42 წლის ასაკში, თითქოს ხელახლა გაახალგაზრდავდა და ისევ ჩემპიონი გახდა. თუმცა დიდი შესვენება მაინც უარყოფითად აისახა: აგვისტოში მენი იორდენის უგასთან უშანსოდ დამარცხდა. რამდენიმე კვირის წინ კი კარიერის დასრულება გადაწყვიტა, რომელიც 26 წელიწადი გრძელდებოდა.
ბევრმა არ იცის, რომ მენი გამოცდილი პოლიტიკოსიც არის. უკვე 13 წელიწადია, რაც დეპუტატია. 2022 წლის 9 მაისს კი ცხოვრების ერთ-ერთ ყველაზე რთულ ბრძოლაში ჩაერთვება და ფილიპინების პრეზიდენტის სავარძლისთვის იბრძოლებს. რამდენიმე კვირის წინ მენიმ მმართველი პარტიის "ლაბანის“ თავმჯდომარის პოსტი დაიკავა. ამჟამინდელი პრეზიდენტი როდრიგო როა დუტერტე კი მას თავის მემკვიდრედ ასახელებს.
ზოგადად, პაკიაოს სიტუაცია უნიკალურია. მას შეეძლო გამხდარიყო მოქმედი მსოფლიოს ჩემპიონი, რომელიც ასევე, დამოუკიდებელი ქვეყნის მმართველიც იქნებოდა. თუმცა კრივიდან ლამაზად წასვლა ვეღარ მოახერხა. მენის ყველაფერი გააჩნია, რომ წარმატებული პრეზიდენტი გახდეს - გამოცდილება, ავტორიტეტი და ქარიზმა. 2007 წელს ის ქვედა პალატის დეპუტატად აირჩიეს, 2016-ში კი სრულუფლებიანი სენატორი გახდა.
მოკრივეს რამდენიმე საქველმოქმედო ფონდი გააჩნია და ხშირად ეხმარება გაჭირვებულ ადამიანებს. ფლოიდ მეივეზერთან ბრძოლის შემდეგ, "პაკმა“ რეკორდული 280 მილიონი დოლარი გამოიმუშავა, მშობლიურ ქალაქ კიბავაში 1000-ზე მეტი სახლი ააშენა და გაჭირვებულებს სრულიად უფასოდ გადასცა.
"ძალიან ბედნიერი ვარ, რომ ასეთი შესაძლებლობა მაქვს. ფლოიდთან გამომუშავებული ფულით, თანამემამულეებს სახლებს ვუშენებ. არასდროს დამავიწყდება, საიდან მოვდივარ და მადლობას ვუხდი ღმერთს, რომ სხვების დახმარების შესაძლებლობას მაძლევს.“ - ამბობს მენი.
პანდემიის დროს, პაკიაო არამხოლოდ ვაქცინის შეძენაზე ხარჯავდა ფულს, არამედ აგრძელებდა ფინანსურ მხარდაჭერას მათთვის, ვისაც ეს ყველაზე მეტად სჭირდებოდა. განსაკუთრებით შთამბეჭდავი იყო მისი ინტერვიუ, სადაც აღიარა, რომ არ ეშინოდა კოვიდით გარდაცვლილიყო.
"თუ უსახლკაროებს არ დავეხმარებით, შესაძლოა მოროდიორობას ჩავუყაროთ საფუძველი. არ მეშინია კორონავირუსით გარდაცვალების. თუ შენ ლიდერი ხარ, ყოველთვის წინა ფრონტზე უნდა იმყოფებოდე. ხალხს წინ უნდა გაუძღვე და აგრძნობინო, რომ მათთან ერთად ხარ. მე სიღატაკეში ვიზრდებოდი და ვიცი, რას გრძნობს ხალხი“.
მილიონობით ფილიპინელისთვის მისი განცხადება მინიშნება იყო, რომ მოკრივეს საპრეზიდენტო ამბიციები გააჩნია, თუმცა ღიად - არა მან, არამედ მისმა პრომოუტერმა, ბობ არუმმა განაცხადა:
"დავუკავშირდი პაკიაოს და მითხრა: "ბობ, ვაპირებ ჩემი კანდიდატურა 2022 წლის არჩევნებზე დავაყენო. როცა გავიმარჯვებ, მინდა, რომ ჩემ ინაუგურაციას ესწრებოდე". ის ისტორიაში პირველი მებრძოლი-პრეზიდენტი გახდება“.
არუმი მოკრივის პრომოუტერი 2005 წლიდანაა, სწორედ მასთან ერთად მიაღწია მენიმ განსაკუთრებულ წარმატებებს და გახდა მულტიმილიონერი, თუმცა მათი კავშირი ლამაზად არ დაშლილა.
2017 წლის ზაფხულში პაკიაო ავსტრალიაში გაემგზავრა და ადგილობრივ ჯეფ ჰორნს შეხვდა. ფილიპინელი ბრძოლაში უკეთ გამოიყურებოდა და აშკარად დომინირებდა, თუმცა მსაჯებმა "გაძარცვეს" და გამარჯვება ჰორნს მისცეს. მოკრივემ განაცხადა, რომ ეს ყველაფერი არუმის მონაწილეობით მოხდა და მასთან კონტრაქტი გაწყვიტა.
აღსანიშნავია, რომ "პაკმა“ არუმის განცხადება უარყო: "ბოლოს მე და არუმმა მხოლოდ კრივზე ვისაუბრეთ, პოლიტიკა არც გვიხსენებია. ახლა პოლიტიკის დრო არ არის: ქვეყანაში უამრავი პრობლემაა, რის გამოც უნდა გავერთიანდეთ.“
თუმცა, მთლიანობაში ბობი მართალი აღმოჩნდა. უგასთან მარცხის შემდეგ ერთი თვის თავზე, პაკიაომ თავის კანდიდატურა ქვეყნის პრეზიდენტის პოსტზე დაასახელა, თანაც აღიარა, რომ მოკრივის კარიერას ასრულებს. "ჩემი კარიერა? ის უკვე დასრულებულია, რა თქმა უნდა. დიდი ხანია კრივით ვარ დაკავებული, ჩემი ოჯახი ამბობს, რომ საკმარისია. იმიტომ ვიბრძოდი, რომ სპორტის ამ სახეობით გულწრფელად სიამოვნებას ვიღებ. ჩემი ქვეყნის სხვა მოკრივეებს კი ყოველთვის დავეხმარები", - განაცხადა პაკიაომ.
მენიმ თავის კარიერა 1995 წელს დაიწყო. დამარცხებული ჰყავს თავის თაობის თითქმის ყველა საუკეთესო მოკრივე: მარკო ანტონიო ბარერა, ერიკ მორალესი, ხუან მანუელ მარკესი, ოსკარ დე ლა ჰოია, რიკი ჰატონი, მიგელ კოტტო, ანონიო მარგარიტო, შეინ მოზლი და ასე შემდეგ.
ასევე, პაკიაო ერთადერთი მოკრივეა კრივის ისტორიაში, რომელიც 8 სხვადასხვა წონით კატეგორიაში გახდა ჩემპიონი.
რა თქმა უნდა, ცალკე უნდა აღინიშნოს ბრძოლა ფლოიდ მეივეზერთან, რომელიც 2015 წელს შედგა. მაშინ "პაკმა“ მსაჯების გადაწყვეტილებით წააგო, თუმცა ეს ბრძოლა კრივის ისტორიაში ყველაზე შემოსავლიანი აღმოჩნდა. ფილიპინელმა 120 მილიონი დოლარი გამოიმუშავა და ამას ემატება ფასიანი ტრანსლაციებიდან გაყიდული პროცენტი, რომელიც, სავარაუდოდ, ჰონორარზე მეტია.
2 - წლიანი პაუზის შემდეგ, აგვისტოში მენი კუბელ იორდენის უგასთან დამარცხდა, სადაც საკუთარ ჩრდილსაც კი აღარ ჰგავდა. გასული წლის დეკემბერში პაკიაო ფილიპინების დემოკრატიული პარტიის, "ლაბანის“ თავმდჯომარე გახდა.
მოქმედი პრეზიდენტი, რომელიც ამ პარტიის წევრია, იხსენებს: "ერთხელ მე და მენი მარტო დავრჩით. მას ვუთხარი, რომ მსურს, ფილიპინების მომავალი პრეზიდენტი გახდეს. მან კრივით ქვეყანას სიამაყე და ბედნიერება მოუტანა".
პაკიაო არ მალავს, რომ მოქმედ პრეზიდენტთან მეგობრობს და მის შეხედულებებს იზიარებს, განსაკუთრებით შიდა პოლიტიკაში: ნარკომოვაჭრეების დახვრეტიდან დაწყებული და ლგბტ საზოგადოებით დამთავრებული.
მან ჰომოფობიური განცხადების გამო, მომენტალურად დაკარგა რამდენიმემილიონიანი კონტრაქტი Nike-თან. ზოგადად, აღსანიშნავია, რომ ფილიპინებზე ნარკოტიკებთან ბრძოლის რადიკალური მეთოდებია, ხოლო პრეზიდენტი დუტერტე არსებულ სიტუაციას ამართლებს. 2016 წლიდან ნარკოდანაშაულში ეჭვმიტანილი 4000 ადამიანი მოკლეს. სენატორი ანტონიო ტრილლანესი აცხადებს, რომ ამ მომენტისთვის სიკვდილით დასჯილთა რაოდენობა 20 000-ს აჭარბებს. იყო შემთხვევები, როცა სრულიად უდანაშაულოებიც მოუკლავთ.
რა თქმა უნდა, გაერომ, აშშ-მა და ევროკავშირმა ხელისუფლება ადამიანის უფლებათა დარღვევაში დაადანაშაულეს. 2016 წლის ეკონომიკურ ფორმზე, დუტერტემ, ფაქტობრივად, განაცხადა, რომ ტრადიციულ მოკავშირესთან, აშშ-სთან კავშირს წყვეტს და ჩინეთისა და რუსეთის ალიანსს უერთდება
თუ პაკიაო გაიმარჯვებს საპრეზიდენტო არჩევნებზე, ის ისტორიაში მეორე სპორტსმენი გახდება, რომელიც უმაღლეს სახელმწიფო პოსტს დაიკავებს. "მილანის“ ყოფილი ფორვარდი ჯორჯ ვეა - 2018 წლიდან ლიბერიის პრეზიდენტია.