"ერთი პირი გაქცევისას 10-12 მეტრი სიმაღლიდან გადავარდა და დაშავდა" - რა ინფორმაციას ავრცელებს ცხინვალის ე.წ. ხელისუფლება დაკავებულ ქართველებზე?
საქართველოს ოთხმა მოქალაქემ სამხრეთ ოსეთის სახელმწიფო საზღვარი გადმოკვეთა, - ინფორმაციას "სპუტნიკი“ ოკუპირებული ცხინვალის ე.წ. უშიშროების კომიტეტზე დაყრდნობით ავრცელებს.
მათივე ინფორმაციით, აღნიშნული პირები ალკოჰოლის ზემოქმედების ქვეშ იმყოფებოდნენ.
"შემთხვევა 4 ოქტომბერს მოხდა. დამრღვევებმა გაქცევა სცადეს, მას შემდეგ რაც ოსმა მესაზღვრეებმა ისინი დააფიქსირეს. ერთი მათგანი უკან, საქართველოში გაიქცა, ორი - მესაზღვრეებმა დააკავეს, კიდევ ერთი კი გაქცევისას 10-12 მეტრი სიმაღლიდან გადავარდა და დაშავდა. ის მოგვიანებით დააკავეს“, - აცხადებენ ე.წ. "კომიტეტში“.
მათი მტკიცებით, ინციდენტზე გამოძიება მიმდინარეობს.
"დაშავებულ მოქალაქეს საჭირო სამედიცინო დახმარება აღმოუჩინეს. მისი ჯანმრთელობის მდგომარეობა დამაკმაყოფილებელია,“- აცხადებენ ე.წ. უშიშროების კომიტეტში.
მათივე ინფორმაციით, ჰუმანიტარული მიზეზების გამო განიხილება დაშავებული პირის "ქართული მხარისთვის“ გადაცემის საკითხი, დანარჩენ დაკავებულებთან დაკავშირებით კი გაგრძელდება "კანონით გათვალისწინებული პროცედურული ქმედებები“.
ცნობისთვის დაშავებული პირი გაათავისუფლეს და სასწრაფო დახმარების ჯგუფმა ცენტრალური ხელისუფლების მიერ კონტროლირებად ტერიტორიაზე ახლახანს გადმოიყვანა.