"ვგრძნობ, სულ ჩემთანაა და არასოდეს დამტოვებს... ბედნიერი ვარ იმიტომ, რომ მე ყველაზე კარგი სოფო მყავდა..." - რას წერს ნინო შუბლაძე კოვიდით გარდაცვლილ დაზე
ჟურნალისტი ნინო შუბლაძე, "ფეისბუქის" პირად გვერდზე, ამ ცოტა ხნის წინ კოვიდით გარდაიცვლილ დაზე - სოფოზე წერს.
"მე ყველაზე კარგი სოფო მყავდა!
ზუსტად 12 საათზე აუცილებლად მივულოცავდი, ან ტელეფონით, ან პირადად. ახალი წელივით ელოდებოდა 27 სექტემბრის დადგომას... უყვარდა თავისი დაბადების დღე. მილოცვების მიღების პარალელურად, აუცილებლად მიულოცავდა ბუკას და ლაფერას(გიორგი ლაფერაშვილი), მეც შემახსენებდა: - არ დაგავიწყდეს, მიულოცეო...
წელს ყველაზე მძიმე 27 სექტემბერი დადგა ჩვენს ოჯახში! სოფოს გარეშე ყველაფერმა და ყველა დღემ ფერი იცვალა - სოფოს გარეშე ყველანი ახლიდან ვსწავლობთ ცხოვრებას და ჯერჯერობით არ გამოგვდის: საშინელი სიცარიელეა უსოფოოდ და ძნელია სოფოს ადგილი რამემ, ან ვინმემ შეავსოს...
ყველა სათითაოდ ვცდილობთ ერთმანეთისთვის სოფოც ვიყოთ, მაგრამ ძნელია იყო სოფოსნაირი მზრუნველი, კეთილი, ყურადღებიანი და ტკბილი! ძნელია, იყო სოფოსნაირი საყრდენი ცხოვრებაში და მაინც, ბედნიერი ვარ, რომ საუკეთესო და მყავდა! იმდენი სითბო და სიყვარული დამიტოვა, რომელიც ცხოვრების ბოლომდე თან გამყვება... ეს მარტო სოფოს შეეძლო!
ვგრძნობ, სულ ჩემთანაა და არასოდეს დამტოვებს.... მაინც სულ მისი იმედი მაქვს და მაინც... ბედნიერი ვარ, იმიტომ რომ...
მე ყველაზე კარგი სოფო მყავდა...
გილოცავ, სოფ." - წერს ნინო შუბლაძე