ნიკა კვარაცხელიას მკვლელობის მოტივი სავარაუდო დამკვეთის ე.წ. კანონიერ ქურდად მონათვლის სურვილი გახდა? - რას შეეწირა 22 წლის ბიჭი

22 წლის ნიკა კვარაცხელიას მკვლელობის საქმესთან დაკავშირებით "კურიერი" ახალ დეტალებს ავრცელებს.

"რუსთავი 2"-ის ინფორმაციით, საქმის მასალებში ჯერ ოფიციალურად არ დევს, თუმცა გამოძიების ერთ-ერთი ვერსიით, მკვლელობის მოტივი სავარაუდო დამკვეთის ე.წ. კანონიერ ქურდად მონათვლის სურვილი გახდა. ვერსია მოსკოვში მოკლული კრიმინალური ავტორიტეტის, "დათო თბილისკის" მემკვიდრეს უკავშირდება. "კურიერის" ინფორმაციით, 2001 წელს მოკლული დავით კაკულიას ერთ-ერთ შვილი მამის მსგავსად ქურდობას აპირებს.

"საზღვარგარეთ გამართულ ე.წ. სხოდკაზე მას კრიმინალური ავტორიტეტები წოდების მიღებას დაჰპირდნენ, თუმცა გარკვეული პირობით. უმცროსმა კაკულიამ ჩათვალა, რომ სტატუსს მიიღებდა იმ შემთხვევაში, თუ შურს იძიებდა 20 წლის წინ, მამის აფეთქებაზე, რაშიც მის ნათლიას, ასევე კანონიერ ქურდ, გია კვარაცხელიას მეტსახელად "ლაფშას" ადანაშაულებდა. სავარაუდოდ, სწორედ ეს გახდა 5 დღის წინ ანჯაფარიძის ქუჩაზე კრიმინალური შურისძიების მოტივი", - აცხადებს "რუსთავი 2".

ტელეარხის ინფორმაციით, ამ ვერსიას არ გამორიცხავს მკვლელობის სავარაუდო შემსრულებლების ადვოკატი დალი ბარბაქაძეც.

განიხილება კიდევ ერთი ვერსია. "კურიერის" ინფორმაციით, დანაშაული სისრულეში უმცროს კაკულიას პირადად უნდა მოეყვანა, თუმცა მან საზღვარზე შემოსვლა ვერ შეძლო და სწორედ ამის შემდეგ, საქმეში თბილისში მყოფი ნაცნობები - აკო ჭელიძე და გიორგი კაველაძე ჩართო.

სავარაუდო შურისძიების შესახებ დათო კაკულიას, იგივე "თბილისკის" ოჯახის წევრები ჯერჯერობით ჟურნალისტებთან არ საუბრობენ.

თბილისის საქალაქო სასამართლომ ნიკა კვარაცხელიას მკვლელობაში ბრალდებულებს აღკვეთის ღონისძიების სახით პატიმრობა გუშინ დაუსწრებლად შეუფარდა. გადაწყვეტილება მოსამართლემ დავით კურტანიძემ მიიღო. შემდეგი სასამართლო სხდომა 15 ნოემბერს ჩაინიშნა.

ცნობისთვის, ანჯაფარიძის ქუჩაზე, 22 წლის ნიკა კვარაცხელიას განზრახ მკვლელობის საქმე შინაგან საქმეთა სამინისტრომ გახსნილად გამოაცხადა. როგორც შსს-ს მიერ გავრცელებულ ინფორმაციაშია აღნიშნული, ნიკა კვარაცხელიას მიმართ 10-ზე მეტი გასროლა განხორციელდა, სავარაუდო დამნაშავემ კი ტერიტორია თანამზრახველთან ერთად ნაქირავები მანქანით დატოვა.

შეგახსენებთ, რომ ნიკა კვარაცხელია ტექნოლოგიების სფეროში საქმიანობდა, ის პლატფორმა Feedc-ის დამფუძნებელია.

AMBEBI.GE უკვე წერდა, რომ გამოძიება მკვლელობის მთავარ მოტივად, 20 წლის წინანდელი მკვლელობისთვის შურისძიებას განიხილავს. წაიკითხეთ ვრცლად