"რამდენიმე თვის წინ ჩემი მეგობარი უმიზეზოდ სცემა ორმა ტყიურმა მთაწმინდაზე, დღეს იმ ორიდან ერთ-ერთი ავსტრალიელი გოგოს მკვლელობისთვის დაუკავებიათ" - რას წერს სამოქალაქო აქტივისტი

სამოქალაქო აქტივისტი ანი გაგუა "ფეისბუქის" პირად გვერდზე ავსტრალიის მოქალაქის, შანაი ბრუკის მკვლელობის საქმეზე ბრალდებულის დაკავებას ეხმაურება.

"რამდენიმე თვის წინ ჩემი მეგობარი სრულიად უმიზეზოდ სცემა ორმა ტყიურმა მთაწმინდაზე. პოლიციის შუშის კარზე კაკუნის მიუხედავად, საქმე თაროზე შემოიდო.

დღეს ჩემმა მეგობარმა ტელევიზორში ნახა, იმ ორიდან ერთ-ერთი - ავსტრალიელი გოგოს მკვლელობისთვის დაუკავებიათ.

მაშინ რომ ტ**კი გაენძრიათ, დიდი შანსია, დღეს ის გოგო ცოცხალი ყოფილიყო.

ხვდებით ხო, სად ვცხოვრობთ და ვზრდით შვილებს", - წერს ანი გაგუა.

შეგახსენებთ, შინაგან საქმეთა სამინისტრომ 31 წლის შანაე ბრუკის განზრახ მკვლელობის ბრალდებით 1988 წელს დაბადებული რაფაელ მურსაკულოვი სისხლის სამართლის კოდექსის 108-ე მუხლით დააკავა, რაც სასჯელის სახით 7-დან 15 წლამდე ვადით თავისუფლების აღკვეთას ითვალისწინებს.

TV "პირველის" ინფორმაციით, დაკავებული "ქართული ოცნების" წევრია.

შანაე ბრუკი 30 ივლისს გაუჩინარდა. როგორც მისი მეგობრები და ნაცნობები აცხადებდნენ, შანაემ გარდაცვალებამდე ერთ-ერთ მათგანთან დარეკა. ზარის დროს ისმოდა მისი ხმა, ქალი შველას ითხოვდა.

ბრუკი მეორე დღეს მთაწმინდის ტერიტორიაზე გარდაცვლილი იპოვეს. თვითმხილველებისა და გავრცელებული კადრების მიხედვით, ქალს სხეულზე რამდენიმე დაზიანება აღენიშნებოდა.

თავდაპირველად შინაგან საქმეთა სამინისტრომ გამოძიება თავისუფლების უკანონოდ აღკვეთის (სისხლის სამართლის კოდექსის 143-ე მუხლი) მუხლით დაიწყო, შემდეგ კი გადააკვალიფიცირა და გამოძიება განზრახ მკვლელობის (სსკ 108-ე) მუხლით გაგრძელდა.