ამერიკელი ტურისტი, რომელიც ჯერ დააკავეს, ხოლო შემდეგ "საგანმანათლებლო ექსკურსია" მოუწყვეს - როგორ აღმოჩნდა ჯექსონ პოლ კრამერი ცხინვალის ციხეში

ამერიკის შეერთებული შტატების მოქალაქე, რომელიც სამხრეთ ოსეთში "საზღვრის უკანონო კვეთისთვის“ დააკავეს და ადმინისტრაციული პასუხისმგებლობა დააკისრეს, უკვე საქართველოს მიერ კონტროლირებად ტერიტორიაზეა.

ჯექსონ პოლ კრამერის დაკავების შესახებ ინფორმაცია თავდაპირველად სამხრეთ ოსეთის ე.წ. სახელმწიფო უსაფრთხოების კომიტეტის პრესსამსახურმა გაავრცელა.

"მან 26 აგვისტოს საქართველოდან სამხრეთ ოსეთის საზღვარი უკანონოდ გადმოკვეთა. გამოძიების შედეგად კი გაირკვა, რომ ის იყო აშშ-ის მოქალაქე, 1997 წელს დაბადებული ჯექსონ პოლ კრამერი, წარმოშობით ჩრდილოეთ კაროლინიდან. 6 სექტემბერს ადმინისტრაციული პასუხისმგებლობა დაეკისრა და ქართულ მხარეს გადაეცა", - ნათქვამია გავრცელებულ ინფორმაციაში.

სამხრეთ ოსეთში აცხადებენ, რომ კრამერს არ ჰქონდა ინფორმაცია ქართულ-ოსური და ქართულ-აფხაზური კონფლიქტის შესახებ, არც 2008 წლის აგვისტოს ომზე იცოდა რაიმე, ამიტომაც მას "საგანმანათლებლო ექსკურსია" მოუწყვეს, რომლის ფარგლებშიც მუზეუმი და სასაფლაო დაათვალიერებინეს (წყარო: ekhokavkaza.com, tass.ru)

• ამერიკის მოქალაქის გათავისუფლების შესახებ ინფორმაციას საქართველოს სახელმწიფო უსაფრთხოების სამსახურიც ავრცელებს

"ოკუპირებულ ჯავის რაიონში რუსეთის საოკუპაციო ძალების წარმომადგენლების მიერ უკანონოდ დაკავებული ამერიკის შეერთებული შტატების მოქალაქე ჯექსონ პოლ კრამერი თავისუფალია.

უკანონო დაკავების მომენტიდან გააქტიურდა ცხელი ხაზი, მოხდა ევროკავშირის სადამკვირვებლო მისიისა და ჟენევის საერთაშორისო დისკუსიების თანათავმჯდომარეების ინფორმირება" - ნათქვამია განცხადებაში.

სახელმწიფო უსაფრთხოების სამსახურის წარმომადგენლის, ირაკლი ანთაძის განცხადებით, ამერიკის მოქალაქე საქართველოში ტურისტული მიზნით იმყოფება:

"რამდენიმე წუთის წინ ცენტრალური ხელისუფლების კონტროლირებად ტერიტორიაზე გადმოვიყვანეთ ამერიკის მოქალაქე, რომელიც ტურისტული მიზნით იმყოფება საქართველოში და უკანონოდ იქნა დაკავებული რუსეთის საოკუპაციო ძალების მიერ.

დაკავების მომენტიდანვე გააქტიურდა ცხელი ხაზი, მომხდარის შესახებ ინფორმაცია ეცნობა საქართველოში ევროკავშირის სადამკვირვებლო მისიას, ასევე ჟენევის საერთაშორისო დისკუსიების თანათავმჯდომარეებს და ამოქმედდა ყველა არსებული ბერკეტი და საშუალება, იმისთვის, რომ უკანონოდ დაკავებული აშშ-ის მოქალაქე გადმოგვეყვანა საქართველოს ცენტრალური ხელისუფლების მიერ კონტროლირებად ტერიტორიაზე და დროულად მომხდარიყო მისი უკანონო ტყვეობიდან გათავისუფლება“, - განაცხადა სახელმწიფო უსაფრთხოების სამსახურის წარმომადგენელმა ირაკლი ანთაძემ.

• თავგადასავალზე მცირე კომენტარი გააკეთა თავად ჯექსონ პოლ კრამერმაც.

"მე გადავკვეთე საზღვარი, არ ვიცოდი ამის შესახებ, ვითარებიდან გამომდინარე, დავბრუნდი. ბევრს ვერაფერს ვიტყვი, ციხეში ვიყავი ეს დრო. მერე გამათავისუფლეს.

კავკასიის რეგიონის მიმდებარედ ლაშქრობას ვგეგმავდი, შავი ზღვის მიმართულებით და ხელი შემეშალა ამაში საზღვარზე”,- აღნიშნა გათავისუფლების შემდეგ აშშ-ის მოქალაქემ.

"მოქალაქეების უკანონო დაკავებებზე სრული პასუხისმგებლობა ეკისრება რუსეთის ფედერაციას", - ნათქვამია სახელმწიფო უსაფრთხოების სამსახურის განცხადებაში.