დეკემბრამდე კორონავირუსით აშშ-ში 100 000 ადამიანის, ევროპის რეგიონში კი - 236 000 ადამიანის გარდაცვალებას ვარაუდობენ - სპეციალისტების შემაშფოთებელი პროგნოზი
აშშ-ის ალერგიისა და ინფექციური დაავადებების ცენტრის დირექტორი ენტონი ფაუჩი აცხადებს, რომ ქვეყანაში დეკემბრამდე კორონავირუსს, შესაძლოა კიდევ 100 000 ადამიანი ემსხვერპლოს. ამის მიზეზად ფაუჩი ქვეყნის ზოგიერთ ნაწილში ვაქცინაციის პროცესის შენელებას ასახელებს. მისი თქმით, ადამიანების სიცოცხლის გადასარჩენად ერთადერთი გზა მასობრივი ვაქცინაციაა.
„ჩვენ ვიცით, რომ ვაქცინებთან ერთად გვაქვს იმის საშუალება, რომ ეს სიტუაცია შევცვალოთ. ეს იმდენად მნიშვნელოვანია, რომ ამ კრიზისში მყოფმა ადამიანებმა უნდა გადადონ ნებისმიერი იდეოლოგიური თუ პოლიტიკური განსხვავება და უბრალოდ აიცრან“, - აღნიშნა ფაუჩიმ.
Bloomberg-ის მონაცემების მიხედვით, ამჟამად აშშ-ში ორი დოზით ზრდასრული მოსახლეობის 52.3%-ია აცრილი.
ჯანდაცვის მსოფლიო ორგანიზაციის ევროპის რეგიონალური დირექტორის, ჰანს კლუგეს განცხადებით, 1-ელ დეკემბრამდე ევროპის რეგიონში კორონავირუსით შესაძლოა, კიდევ 236 000 ადამიანი დაიღუპოს.
„გასულ კვირაში, რეგიონში დაღუპულთა რაოდენობა 11%-ით გაიზარდა. 1-ელ დეკემბრამდე ევროპაში კიდევ 236 000 ფატალური შემთხვევაა მოსალოდნელი“, - აღნიშნა კლუგემ.
მისივე თქმით, ამ დრომდე ევროპისა და ცენტრალური აზიის 53 ქვეყანაში კოვიდ-19-ს 1.3 მილიონი ადამიანი ემსხვერპლა. 33 ქვეყანაში ავადობის კოეფიციენტი ბოლო 2 კვირაში 10%-ით გაზრდილია.
კლუგეს თქმით, „დელტა“ ვარიანტით ინფიცირების შემთხვევების მატება კოვიდშეზღუდვების გაუქმებამ და ზაფხულში მოგზაურობის ზრდამ გამოიწვია.
ამასთან, მისივე თქმით, მიუხედავად იმისა, რომ ევროპაში ადამიანების დაახლოებით ნახევარი სრულად არის ვაქცინირებული, რეგიონში, ბოლო პერიოდში, ვაქცინაციის დაფარვის მაჩვენებელი შემცირდა.
„ბოლო ექვსი კვირის განმავლობაში, დაფარვის მაჩვენებელი 14%-ით შემცირდა, რაც განპირობებულია ზოგიერთ ქვეყანაში ვაქცინებზე წვდომის ნაკლებობით. ჩვენს რეგიონში ვაქციანციის დაფარვის სტაგნაცია სერიოზულ შეშფოთებას იწვევს“, - აღნიშნა კლუგემ.