პარტიამ "ლელო საქართველოსთვის" თბილისის მერობისა და საკრებულოს თავმჯდომარეობის კანდიდატები წარადგინა
„ლელო საქართველოსთვის“ თავმჯდომარე მამუკა ხაზარაძემ თბილისის მერობის კანდიდატად ანა ბიბილაშვილი, ხოლო საკრებულოს თავმჯდომარეობის კანდიდატად ბადრი ჯაფარიძე დაასახელა.
როგორც ხაზარაძემ განაცხადა, ბიბილაშვილს კონკრეტული ხედვა აქვს, რომლის მიხედვითაც დედაქალაქში არსებული პრობლემები აბსოლუტურად სხვანაირად გააზრებული იქნება.
„ჩვენ მინდა შემოგთავაზოთ, წარმატებული ქალი, წარმატებული დედა, პროფესიონალი, ურბანისტი, არქიტექტორი, პროფესორი - ანა ბიბილაშვილი. რომელსაც კონკრეტული ხედვა აქვს, დამფუძნებელი „ლელოსი“ და აქვს ხედვა, რომ ქალაქის პრობლემები აბსოლუტურად სხვანაირად გააზრებული იქნას. მე მინდა მოგიწოდოთ ყველას, რომ მხარი დაუჭიროთ „ლელოს“, მხარი დაუჭირეთ ნებისმიერ ოპოზიციურ პარტიას, რადგან დღეს საერთ მიზანი გვამოძრავებს. ბრძოლა ვინმე კონკრეტული ადამიანების წინააღმდეგ კი არაა, არამედ ბრძოლაა შიმშილის, სიღატაკის, უმუშევრობის და რაც ყველაზე მთავარია ნიჰილიზმის წინააღმდეგ. ამ ქალაქიდან უნდა დაიწყოს ამის ცვლილება“, - განაცხადა ხაზარაძემ.
თბილისის საკრებულოს სიის პირველი ნომერი პარტიიდან ბადრი ჯაფარიძე იქნება.
"მე მინდა წარმოგიდგინოთ, პარტიის საკრებულოს სიის პირველი ნომერი. ის არის, ჩემი თანამებრძოლი, მეგობარი - ბადრი ჯაფარიძე. ის გაუძღვება ქალაქში საკრებულოს სიას და ჩვენ საკრებულოს თავმჯდომარეობისთვის ვიბრძოლებთ", - აღნიშნა ხაზარაძემ.
მისივე თქმით, მოახლოებული ადგილობრივი თვითმმართველობის არჩევნები მნიშვნელოვანია.
როგორც ხაზარაძემ აღნიშნა, აუცილებელია, ხალხმა აირჩიოს განვითარებისა და აღორძინების გზა.
„2 ოქტომბრის არჩევნები არის უმნიშვნელოვანესი დღე ჩვენი ქვეყნის მომავლისთვის. ეს არ არის არჩევნები მხოლოდ მერების ან საკრებულოს წევრების არჩევნები, არამედ ისტორიული არჩევნებია, რომელმაც უნდა განსაზღვროს ჩვენი ქვეყნის ხვალინდელი დღე, ეს არის ტესტი ქართველი ხალხის, რომელმაც უნდა აირჩიოს, თუ როგორ ქვეყანაში სურს მას ცხოვრება, - უნდა, რომ იყოს ჩაკეტილ 30-იან წრეში, თუ გაარღვიოს ეს წრე და ქვეყანა დააყენოს განვითარების და აღორძინების გზაზე. ქვეყანას მივცეთ შანსი, რომ უახლოეს თვეებში, 2022-ში დაინიშნოს რიგგარეშე არჩევნები, სადაც ქვეყანა გადავა სრულად კოალიციურ მმართველობაზე. ევროპული სისტემა სწორედ კოალიციურ მართვას ნიშნავს, რუსული სისტემა ნიშნავს ერთმმართველობას, - ჩვენ ამას ყველამ ერთად უნდა დავაღწიოთ თავი“, - განაცხადა მამუკა ხაზარაძემ.
როგორც ბადრი ჯაფარიძემ კანდიდატების წარდგენაზე სიტყვით გამოსვლისას განაცხადა, დროა საზოგადოებამ ქვეყანაში არსებული მდგომარეობის ძირეული გაუმჯობესება იგრძნოს.
მისივე თქმით, 2 ოქტომბრის ადგილობრივი თვითმმართველობის არჩევნები სწორედ ამის შანსია.
„დღეს ჩვენ ვიწყებთ საარჩევნო კამპანიას, რომელმაც თქვენ უნდა მოგიტანოთ გამარჯვება პანდემიაზე, ეკონომიკურ სიდუხჭირეზე, ტყუილზე, უიმედობაზე, კორუფციაზე. ამ არჩევნების შემდეგ, თითოეულმა თქვენგანმა უნდა იგრძნოს გარდამტეხი ცვლილებების დაწყება, უმძიმესი ვითარების ძირეულად გაუმჯობესება, ქვეყნის გადარჩენის შანსი. უკლებლივ, თითოეულმა თქვენგანმა, მიუხედავად მისი პოლიტიკური გემოვნებისა და რა თქმა უნდა, მათ შორის დამარცხებული „ქართული ოცნების“ დღევანდელმა მხარდამჭერებმაც, - ეს უნდა იყოს არჩევნები, რომელიც ამ ქვეყანაში დაამთავრებს არაკომპეტენტურ მართვას, ნეპოტიზმს, კანონის უზენაესობის ფეხქვეშ გათელვას, პოლიტიკური ოპონენტების გაშავებას, დემონიზაციისთვის სახელმწიფო ინსტიტუტების და სასამართლო ხელისუფლების გამოყენებას“, - განაცხადა ბადრი ჯაფარიძემ.