"ამ მწვანე "უჟასს" დედას ვუტირებ, ამას მოვაკვლევინებ თავს?“ - როგორ გრძნობს თავს კორონავირუსით ინფიცირებული ნანუკა გულუა?

"ხვალინდელ ათასებში მეც ვიქნები, ამ მწვანე იდიოტს ნახეთ რას ვუზამ“, - ამ სტატუსის ავტორი ჩცდ-ს ცნობილი პერსონაჟის "დოჩის" როლის შემსრულებელი ნანუკა გულუაა. გუშინ მსახიობმა სოციალურ ქსელში დაწერა, რომ კორონავირუსით არის ინფიცირებული. Ambebi.ge ნანუკას დღეს დაუკავშირდა. ინფიცირების დადგენიდან მეორე დღეს ნანუკას ძლიერი ხველის გამო ლაპარაკი კი უჭირს, თუმცა ორიოდე სიტყვა მაინც გვითხრა:

ნანუკა გულუა:

- არ ვიცი, წარმოდგენა არ მაქვს, საიდან შემხვდა ვირუსი. 1 - ლ სექტემბერს ვიყავი ვაქცინაციაზე ჩაწერილი და სამწუხაროდ, ვერ მოვასწარი. გუშინ დამიდასტურდა კოვიდი, ტემპერატურა მქონდა, გუშინ ღამე აქტიურად ვიყავი, მაგრამ დღეს ისეთი ხველა დამეწყო, ვერ ვლაპარაკობ. ამ ეტაპზე არ ვფიქრობ, რომ ჰოსპიტალიზაცია მჭირდება, მეორე დღეა ჯერ.

- მარტო ხართ სახლში?

- დიახ, მარტო ვარ, ჯერჯერობით არავის ჩაუდენია ჩემს წინაშე ისეთი დანაშაული, რომ ჩემთან ერთად ვამყოფო, ყველა გავუშვი სახლიდან.

- ამბობენ, რომ ვირუსის დროს პოზიტიურად ყოფნა აუცილებლია, რაც თქვენ არ გაკლიათ...

- რა თქმა უნდა, ამ მწვანე "უჟასს' დედას ვუტირებ, ამას მოვაკვლევინებ თავს? - კუდით თავს ვასროლინებ. საერთოდ მგონია, რომ რაც უფრო დააიგნორებ, უკეთესია. იცით, როგორ არის, სადღაც გიბწკენს და გატკენს, ამ დროს უნდა "დაიკიდო“ და გააგრძელო შენი საქმიანობა... ალბათ ამის მერე მიდის ორგანიზმიდან, როდესაც ხედავს, რომ არ ყვები.

• ბოლო 24 საათში საქართველოში კორონავირუსის 2354 ახალი შემთხვევა გამოვლინდა და 60 ადამიანი გარდაიცვალა.