ბობ დილანს 12 წლის გოგონაზე სექსუალურ ძალადობაში ადანაშაულებენ - რა მოხდა 1965 წელს და რას ამბობს სავარაუდო მსხვერპლი?
ამერიკელი მომღერლის, ნობელის პრემიის ლაურეატის, ბობ დილანის წინააღმდეგ სასამართლოში სარჩელი შევიდა. მას 1960 -იან წლებში არასრულწლოვნის მიმართ განხორციელებულ სექსუალურ ძალადობაში ადანაშაულებენ. თუმცა, მომღერალი ბრალდებას კატეგორიულად უარყოფს.
სარჩელი ნიუ - იორკის უზენაეს სასამართლოში სავარაუდო მსხვერპლმა შეიტანა, რომელიც 1965 წლის მოვლენების დროს 12 წლის იყო. საქმეში ნათქვამია, რომ დილანმა მისი სტატუსი გამოიყენა, არასრულწლოვანი გოგონა ნარკოტიკებითა და ალკოჰოლით გააბრუა და შემდეგ მასზე სექსუალურად იძალადა. მოსარჩელე აცხადებს, რომ ეს ყველაფერი მოხდა მომღერლის აპარტამენტში, ნიუ - იორკში მდებარე სასტუმრო “ჩელსიში".
ქალის სახელი ოფიციალურად არ ხმაურდება, მაგრამ ცნობილია, რომ ის ახლა კონექტიკუტში ცხოვრობს. მისი განცხადებით, მომხდარის გამო მან მძიმე ფსიქოლოგიური და ემოციური ტრავმა მიიღო.
80 წლის ბობ დილანის სპიკერი BBC-თან საუბრისას ბრალდებას გამოეხმაურა და განაცხადა, რომ მომღერალი ყველაფერს უარყოფს.
რობერტ ზიმერმანი, იგივე ბობ დილანი მსოფლიოს მასშტაბით, თანამედროვე პოპულარული მუსიკის ისტორიის ერთ - ერთ მთავარ ვარსკვლავად მიიჩნევა.
მისი კარიერა 1960 -იანი წლების დასაწყისში ნიუ - იორკის ყავის სახლებში გამოსვლებით დაიწყო. 2016 წელს კი გახდა ისტორიაში პირველი მუსიკოსი, რომელსაც ნობელის პრემია მიენიჭა.
მას პრემია ლიტერატურის დარგში შეტანილი წვლილისთვის გადასცეს. შვედეთის აკადემიის განმარტებით, დილანს პრიზი “დიადი ამერიკული სასიმღერო ტრადიციის ფარგლებში ახალი პოეტური ენის შექმნისთვს მიანიჭეს".
2020 წელს დილანმა მის ყველა სიმღერაზე უფლებები კომპანია Universal Music - ს მიჰყიდა.
გარიგების ფინანსური პირობები არ გამჟღავნებულა, თუმცა ამერიკულმა გაზეთმა The New York Times- მა ივარაუდა, რომ შეთანხმება 300 მილიონ დოლარად შედგა. წყარო
მოამზადა თეონა რამაზაშვილმა