თალიბების ტყვიებს გაქცეული ბავშვები, ცხოვრება ღია ცის ქვეშ და ასობით ადამიანი პაკისტანის საზღვრის გახსნის მოლოდინში - დრამატული კადრები ავღანეთიდან
თალიბები აცხადებენ, რომ მათ ავღანეთის სიდიდით მეორე ქალაქი ყანდაარი დაიკავეს, - ინფორმაციას BBC-ი ავრცელებს. ყანდაარი, რომელიც ქვეყნის მნიშვნელოვანი სავაჭრო კერაა, მეოთხე ქალაქია, რომელზედაც თალიბმა ამბოხებულებმა გასული დღის განმავლობაში კონტროლი დაამყარეს. მანამდე მათ აიღეს ქალაქები: ჰერათი, ღაზნი და ყალა-ი-ნაუ.
გუშინ შეერთებულმა შტატებმა განაცხადა, რომ აშშ-ის საელჩოს თანამშრომლების ევაკუაციის მიზნით ავღანეთში 3 000-მდე ჯარისკაცს აგზავნის.
600-მდე ჯარიკაცს აგზავნის ავღანეთში გაერთიანებული სამეფოც იმისთვის, რომ ბრიტანეთის მოქალაქეებს ქვეყნის დატოვებაში დაეხმაროს. (ნახეთ ვიდეო - ასეულობით სამთავრობო ჯარისკაცი ტყვედ ბარდება, სიტუაცია უკონტროლო ხდება - დაეცემა თუ არა ქაბულიც?)
- "თალიბანი" თითქმის ყოველდღიურად იკავებს ახალ ტერიტორიებს, მას შემდეგ რაც 20-წლიანი ოპერაციების შემდეგ აშშ-მა და სხვა უცხოურმა ჯარებმა ქვეყნის დატოვება დაიწყეს. მედიის ინფორმაციით, ამჟამად "თალიბანი" ავღანეთის რეგიონალური ქალაქების მესამედს აკონტროლებს.
მედიაში ავღანეთიდან უმძიმესი კადრები ვრცელდება. ადამიანები თალიბების ტყვიებს გაურბიან. ასობით ავღანელი პაკისტანის საზღვართანაა და მის გახსნას ელოდება. ყველაზე რთული ბავშვების ფოტოების ნახვაა, რომლებსაც ასეთ ვითარებაში, სასტიკ გარემოში უწევთ ცხოვრება.
