"გამოძიების შედეგად, არ გამოიკვეთა უშუალოდ მოძრაობა "სირცხვილიას" ოფისზე თავდასხმა, ოფისში შეჭრა, ქონების განადგურება და დაზიანება, ორგანიზაციის წევრების მიმართ რაიმე სახის ძალადობა ან სხვა დანაშაულებრივი ქმედება"

შინაგან საქმეთა სამინისტროს მიერ ჩატარებული გამოძიების შედეგად, არ გამოიკვეთა უშუალოდ მოძრაობა "სირცხვილიას" ოფისზე თავდასხმა, ოფისში შეჭრა, ქონების განადგურება და დაზიანება, ორგანიზაციის წევრების მიმართ რაიმე სახის ძალადობა ან სხვა დანაშაულებრივი ქმედება, - ამის შესახებ "ინტერპრესნიუსს" საქართველოს პროკურატურაში განუცხადეს დაზარალებულად არ ცნობის შესახებ მოძრაობა „სირცხვილიას“ განცხადების კომენტირებისას.

პროკურატურის ინფორმაციით, ვინაიდან, საქმეზე ჩატარებული გამოძიების შედეგად არ გამოიკვეთა უშუალოდ მოძრაობა „სირცხვილიას“ ოფისზე თავდასხმის, ოფისში შეჭრის, ქონების განადგურების და დაზიანების, ასევე ორგანიზაციის წევრების მიმართ რაიმე სახის ძალადობა ან სხვა დანაშაულებრივი ქმედება და მათ მიმართ დანაშაულის შედეგად ზიანის მიყენების ფაქტი, ბრალდების მხარის მიერ არ დაკმაყოფილდა მოძრაობის წევრების მოთხოვნა და უარი ეთქვათ დაზარალებულად ცნობაზე.

„ „მოძრაობა’’ სირცხვილიას’’ მიერ მოწერილი განცხადება იყო დაუსაბუთებელი თუ რა კონკრეტული დანაშაულის შედეგად მიადგათ ზიანი. განცხადების თანახმად, მოძრაობის წევრები ითხოვდნენ დაზარალებულად ცნობას მხოლოდ იმიტომ, რომ 5 ივლისის მომხდარი ძალადობის შედეგად მიიღეს მორალური ზიანი, მიუხედავად იმისა, რომ თავად არ ყოფილან მოძალადეებთან შემხებლობაში’’, - აცხადებენ პროკურატურაში.

უწყების ცნობით, მოძალადე ჯგუფის წევრების მხრიდან მოძრაობა „სირცხვილიას“ ოფისის სადარბაზოში ადგილი ჰქონდა ზოგადი მუქარის შემცველი ფრაზების და უცენზურო სიტყვების წარმოთქმას, თუმცა, არცერთ მათგანთან ძალადობრივი ჯგუფის წევრებს შეხება არ ჰქონიათ და არ უძალდიათ, ასევე არცერთი პირის მიმართ ადგილი არ ჰქონია მუქარას. პროკურატურის ინფორმაციით, აღნიშნული დასტურდება არამარტო საქმეზე შეკრებილი მტკიცებულებებით, არამედ მოძრაობა „სირცხვილიას“ წევრების გამოკითხვით.

„ამ დროისთვის არ არსებობს „სირცხვილიას“ აღნიშნული წევრების დაზარალებულად ცნობის სამართლებრივი საფუძველი, ვინაიდან, საქართველოს სისხლის სამართლის საპროცესო კანონმდებლობის თანახმად, პირის დაზარალებულად ცნობის საფუძველია პირისთვის უშუალოდ დანაშაულის შედეგად ფიზიკური, მორალური ან ქონებრივი ზიანის მიყენების ფაქტი. განსახილველ შემთხვევაში კი, ორგანიზაციას და მის წევრებს რაიმე სახის ზიანი არ მისდგომიათ უშუალოდ დანაშაულებრივი ქმედებების შედეგად“ - აცხადებენ პროკურატურაში.

ამასთან, როგორც პროკურატურაში განმარტავენ, საქმეზე გრძელდება გამოძიება და გამოძიების პროცესში, კანონით დადგენილი სტანდარტით, კონკრეტულ პირთა დაზარალებულად ცნობისთვის საკმარისი მტკიცებულებების მოპოვების შემთხვევაში და მათ შორის, მოძრაობა „სირცხვილიას“ წევრთა მხრიდან მათ მიმართ დანაშაულის ჩადენის დამადასტურებელი მტკიცებულებების საგამოძიებო ორგანოსთვის წარდგენის შემთხვევაში, უწყება საკითხს მათი დაზარალებულად ცნობის თაობაზე კანონით დადგენილი წესით ხელახლა განიხილავს.

„თბილისი პრაიდის” საწინააღმდეგოდ გამართული აქციის საქმეებზე მიმდინარე გამოძიების ფარგლებში, პროკურატურამ ბრალი ამ დროისთვის 31 პირს წარუდგინა. გამოძიებით მოპოვებული მტკიცებულებებით ყველა პირს, ვის მამართაც არსებობდა დაზარალებულად ცნობის საფუძველი, მინიჭებული აქვთ დაზარალებულის სტატუსი და აღნიშნულ საქმეზე გამოძიება გრძელდება. საქმეზე დაზარალებულად ამ ეტაპზე ცნობილია 56 პირი, მათ შორის, 45 ჟურნალისტი და ოპერატორი.