გაერთიანებულმა სამეფომ კორონავირუსის გავრცელების გამო, საქართველო "წითელ ზონაში" შეიყვანა

გაერთიანებულმა სამეფომ საქართველო ე.წ. „წითელ ზონაში“ შეიყვანა, - შესაბამისი ინფორმაციას გაერთიანებული სამეფოს მთავრობა ავრცელებს.

„უახლესი მონაცემების შეფასების შემდეგ, საქართველო, რეუნიონი, მაიოტა და მექსიკა წითელ სიას დაემატებიან. ისინი შემაშფოთებელი ვარიანტების გამო გაერთიანებული სამეფოსთვის საზოგადოებრივი ჯანდაცვის მაღალ რისკს წარმოადგენენ,“ - აღნიშნულია ინფორმაციაში.

აღსანიშნავია, რომ თებერვლიდან გაერთიანებულ სამეფოში „წითელ სიაში“ შემავალი ქვეყნებიდან და ტერიტორიებიდან ჩასული მოქალაქეებისთვის სავალდებულოა 10 დღიანი კარანტინის გავლა სპეციალურ საკარანტინო დაწესებულებაში.

ცვლილება 8 აგვისტოს დილის 4:00 საათიდან შედის ძალაში.

ამასთან, გაერთიანებული სამეფოს ხელისუფლების გადაწყვეტილებით, ინგლისში საფრანგეთიდან დაბრუნებული სრულად ვაქცინირებული მგზავრებისთვის კარანტინის გავლა სავალდებულო აღარ იქნება.

მედიის ინფორმაციით, ცვლილება, რომლის თანახმადაც საფრანგეთი ე.წ. „ყვითელი ქვეყნების“ სიაში გადავა, კვირას დილის 4:00 საათზე შევა ძალაში. აღსანიშნავია, რომ გაერთიანებული სამეფოს მთავრობამ გასულ თვეში შეარბილა წესები და „ყვითელი ქვეყნების“ სიაში შესული ქვეყნებიდან ჩასული იმ მოქალაქეებისთვის, რომლებიც აშშ-სა და ევროკავშირის მარეგულირებელი ორგანოების მიერ დამტკიცებული ვაქცინებით სრულად არიან ვაქცინირებული, კარანტინის ვალდებულება გააუქმა. თუმცა, საფრანგეთიდან ჩასულებს ეს წესი არ შეეხოთ.

გადაწყვეტილების მიზეზად გაერთიანებული სამეფოს ხელისუფლებამ საფრანგეთში კორონავირუსი „ბეტა“ ვარიანტის გავრცელება დაასახელა, საფრანგეთის ხელისუფლებაში კი აცხადებდნენ, რომ ეს ნაბიჯი "დისკრიმინაციული" იყო.