რუსეთის ელჩის განცხადებით, აშშ-მა 24 რუს დიპლომატს ქვეყნის დატოვებისთვის ვადა 3 სექტემბრამდე მისცა - აშშ-ის სახელმწიფო დეპარტამენტის განმარტება
აშშ-ის სახელმწიფო დეპარტამენტის განმარტებით, რუსეთის ელჩის, ანატოლი ანტონოვის განცხადება, რომ აშშ-მა 24 რუს დიპლომატს ქვეყნის დატოვებისთვის ვადა 3 სექტემბრამდე მისცა, არაზუსტია.
„მის მიერ სიტუაციის შეფასება არაზუსტია, არასწორია. რუსებისთვის ვიზის სამწლიანი ვადის ამოწურვაში ახალი არაფერია. როდესაც ვიზას ვადა ეწურება, ამ პირებმა ქვეყანა უნდა დატოვონ, ან შეიტანონ განაცხადი მის გახანგრძლივებაზე“, - განაცხადა აშშ-ის სახელმწიფო დეპარტამენტის პრესსპიკერმა ნედ პრაისმა.
შეერთებულ შტატებში რუსეთის ელჩის, ანატოლი ანტონოვის განცხადებით, ვაშინგტონმა 24 რუს დიპლომატს ქვეყნის დასატოვებლად ვადა 3 სექტემბრამდე მისცა. ელჩის განმარტებით, აღნიშნული დიპლომატების ვიზების მოქმედების ვადა იწურება. ამასთან, მისი თქმით, თითქმის ყველა მათგანი ქვეყანას ჩანაცვლების გარეშე დატოვებს, „რადგან ვაშინგტონმა მოულოდნელად გაამკაცრა ვიზის გაცემის პროცედურები“.
”თითქმის ყველა მათგანი ქვეყანას ჩანაცვლების გარეშე დატოვებს, რადგან ვაშინგტონმა მოულოდნელად გაამკაცრა ვიზის გაცემის პროცედურები,“ - აღნიშნა ანტონოვმა გამოცემა National Interest-თან ინტერვიუში.
ამასთან, მან იმედი გამოთქვა, რომ რუსეთსა და აშშ-ს შორის ურთიერთობები დარეგულირდება.
„ვიმედოვნებთ, რომ საღი აზრი გაიმარჯვებს და შევძლებთ რუსი და ამერიკელი დიპლომატების ცხოვრების ნორმალიზებას შეერთებულ შტატებსა და რუსეთში ნაცვალგების პრინციპით,” - აღნიშნა ანტონოვმა გამოცემა National Interest-თან ინტერვიუში.
მოსკოვსა და ვაშინგტონს შორის ურთიერთობები განსაკუთრებით მას შემდეგ დაიძაბა, რაც აშშ-ის პრეზიდენტმა ჯო ბაიდენმა განაცხადა, რომ რუსეთის პრეზიდენტს ვლადიმერ პუტინს მკვლელად მიიჩნევს. დაძაბულობა გარკვეულწილად შემსუბუქდა ბაიდენსა და პუტინს შორის 16 ივნისს გამართული შეხვედრის შემდეგ, რასაც რუსეთის სახელმწიფო ობლიგაციებში ზოგიერთი უცხოელი ინვესტორის ფულის დაბრუნებაც კი მოჰყვა შედეგად.