10
ივლისიდღის ზოგადი ასტროლოგიური პროგნოზი
პეიჯ ვანზანტი - ორთაბრძოლების სამყაროში ყველაზე ლამაზ მებრძოლ გოგონადაა აღიარებული. UFC-ში (Ultimate Fighting Championship) მან 6 წელი იბრძოლა და სპორტული მიღწევების გარდა, გულშემატკივრის გული შთამბეჭდავი გარეგნობითაც მიიპყრო. საინტერესოა, რომ ის იბრძვის შიშველი ხელებით და იმაზე მეტი შემოსავალი აქვს, ვიდრე ბევრ სხვას UFC-ში. ბევრი ფიქრობს, პეიჯის ადგილი არ არის შიშველი მუშტებით ბრძოლის არენაზე, თუმცა ის საწინააღმდეგოს ამტკიცებს. მართალია, თავის დროზე, პირველ ბრძოლაში დამარცხდა, თუმცა არ დანებდა, ხასიათის სიმტკიცე და სიმამაცე გამოავლინა.
პეიჯის ცხოვრება ურთულესი იყო, მას მოუწია გადაეტანა გაუპატიურება, უსასტიკესი დაცინვა, ბულინგი, მაგრამ საბოლოოდ, როგორც თვითონვე ამბობს, ყველაფერი ხასიათის სიმტკიცისა და რელიგიის წყალობით გადალახა. დაქორწინდა სპორტსმენზე, რომელიც მის მსგავსად, მებრძოლია.
ბავშვობაში პეიჯი საყვარელი, პოზიტიური, გულანთებული და ლაღი გოგონა იყო, რომელიც ცეკვაზე დადიოდა და არასდროს ფიქრობდა შერეულ ორთაბრძოლებზე. თუმცა ზუსტად მისი გარეგნობა გახდა ბულინგის მიზეზი. ბევრს შურდა მისი, ამცირებდნენ, ესროდნენ ნაგავს, უხევდნენ ჩანთასა და წიგნებს, სცემდნენ. პატარა ვანზანტს არ შეეძლო საკუთარი თავის დაცვა და კლასელების მხრიდან ყველანაირი დამცირების მოთმენა უწევდა.
ვერასდროს ხვდებოდა, რატომ ვერ იტანდნენ - ამის გამო არ უყვარდა სკოლაში სიარული. როცა 14 წლის იყო, კლასელებმა წვეულებაზე მიიწვიეს. გოგონას გაუხარდა, მაგრამ ამაოდ - იმ ღამეს მან ჯოჯოხეთი გამოიარა და სახლში სრულიად სხვა ადამიანი დაბრუნდა.
"მარტოსულად ვგრძნობდი თავს და მწყინდა, იმ დღეს მხოლოდ ერთი რამ გავიფიქრე, - ვაუ, ძლივს, ვიღაცებს, შესაძლოა, ჩემთან დამეგობრება სურთ - მეთქი... მაგრამ ბიჭებმა, რომლებიც წვეულებაზე იყვნენ, წრე შემომარტყეს და ძალადობა დაიწყეს. როცა ვცდილობდი წინააღმდეგობა გამეწია, მცემდნენ. გონზე ვიყავი, მაგრამ ჩემი სხეული თითქოს მოკვდა. ვხვდებოდი, რაც ხდებოდა, მაგრამ არ შემეძლო ამის შეჩერება. სხვა გზა არ მქონდა, გარდა მოთმენისა და ლოცვისა, რომ ეს ყველაფერი მალე დასრულებულიყო“, - ამბობს ვანზანტი.
ბიჭებმა არა მხოლოდ გააუპატიურეს პეიჯი, არამედ სკოლაშიც გაავრცელეს ხმები მომხდარის შესახებ. გოგონა კიდევ უფრო გარიყეს: დასცინოდნენ და ბოზს ეძახდნენ. პეიჯმა გადატანილ ტრაგედიაზე მშობლებსაც არაფერი უთხრა... სუიციდზე ფიქრობდა, თუმცა საკუთარ თავში ძალა გამონახა და "შავი ფიქრები" დაძლია, რაშიც დიდწილად სპორტი დაეხმარა.
როცა კლასელების ბულინგი აუტანელი გახდა, მშობლებმა UFC-ის ჩემპიონის, კენ შემროკის დარბაზში შეიყვანეს. პეიჯს სიტუაცია ძალიან მოეწონა, ხოლო საყვარელი მოცეკვავე გოგოსგან მალე მებრძოლად გარდაიქმნა. გაუპატიურებამ და დაცინვამ გოგონა ბევრად ძლიერი გახადა - მას ფოლადის ხასიათი ჩამოუყალიბდა.
"ვფიქრობ, ჩემი გარეგნობის გამო ვერ მიტანდნენ. სკოლა ჩემი ცხოვრების ყველაზე რთული პერიოდია. ისეთი სიტუაცია იყო, იმდენად მტკიოდა... უბრალოდ, ამ დროს არ გინდა მოკვდე, გსურს, რომ ეს ტკივილი როგორმე აღარ შეიგრძნო. სწორედ ასეთი დამოკიდებულების გამო კოლეჯში ადრე შევედი. ახლა წარსულში არაფერს შევცვლიდი. დაცინვამ უფრო ძლიერი და თავდაჯერებული გამხადა", - ამბობს პეიჯი.
გაუპატიურების შესახებ ვანზანტმა თავის ავტობიოგრაფიულ წიგნში დაწერა. სწორედ აქედან გაიგეს მისმა მშობლებმაც. აღსანიშნავია, რომ წიგნის გამოქვეყნების შემდეგ, სექსუალური ძალადობის მსხვერპლი გოგონები პეიჯს სწერენ, ის კი მათ დიდი ენთუზიაზმით ეხმარება და რჩევებს აძლევს.
პეიჯმა UFC-ში პირველი ბრძოლა 20 წლის ასაკში ჩაატარა. მიუხედავად იმისა, რომ ჩემპიონი ვერ გახდა, 6 წლის განმავლობაში უამრავი ფანი გაიჩინა. 2020 წელს კი ორგანიზაცია დატოვა.
იმ პერიოდში ვანზანტი უკვე პოპულარული იყო - ადგილობრივ "ცეკვავენ ვარსკვლავებში“ მონაწილეობდა, "ინსტაგრამზე“ კი მილიონობით გამომწერი ემატებოდა.
"ყველამ იცის რამდენს ვშოულობდი UFC-ში - 46 ათას დოლარს ბრძოლაში მონაწილეობისთვის და ერთ მაგდენს გამარჯვების შემთხვევაში. ამაზე ბევრად მეტის გამომუშავება "ინსტაგრამის" რეკლამებით შემიძლია.მხოლოდ "ცეკვავენ ვარსკვლავების“ ერთი სეზონით იმაზე მეტი ვიშოვე, ვიდრე UFC-ში მთელი კარიერის მანძილზე“, - ამბობს სპორტსმენი, თუმცა სპორტს თავს არ ანებებს. მას უყვარს ორთაბრძოლები და ამჟამად BKFC-ის მებრძოლია.
მის პირად ცხოვრებაშიც ყველაფერი კარგად არის. 2018 წელს "ბელატორის“ მებრძოლმა ოსტინ ვანდერფორდმა მას ხელი სთხოვა. წყვილი დღემდე ერთად არის.
"რწმენა ჩემს ცხოვრებაში ყოველთვის მნიშვნელოვანი იყო, განსაკუთრებით კი კარიერაში. მე ამ გაგებით ვიზრდებოდი - დავიბადე ქრისტიანულ ოჯახში, თუმცა რეალურად, ღმერთი შედარებით გვიან შევიცანი. რწმენა მიმართულებას აძლევდა ჩემს კარიერას. ბევრი დაცემა და აღმაფრენა განვიცადე, რომელიც ამერიკულ მთებს მაგონებს. თუმცა ყოველთვის ვრჩებოდი პოზიტიურ ადამიანად, იმიტომ, რომ ღმერთის გეგმებს ვენდობი", - ამბობს პეიჯი.
ავტორი: ანრი კურტანიძე
ყველაფერი კარგია, რაც კარგად მთავრდება, მაგრამ ამ ბიჭს რა დიდი ყურები აქვს...
დიდება უფალს! სულ წარმატებებით გევლოს...ყოჩაღ!