ბორის ჩოჩიევი კორონავირუსით გარდაიცვალა
ბორის ჩოჩიევი 64 წლის ასაკში კორონავირუსით გარდაიცვალა. მედიის ცნობით, ბორის ჩოჩიევი ივლისში კორონავირუსით დაავადდა. მდგომარეობის გაუარესების შემდეგ იგი ჩრდილოეთ ოსეთის საავადმყოფოში გადაიყვანეს. ბორის ჩოჩიევი ხუთშაბათს, 22 ივლისს გარდაიცვალა.
ბორის ჩოჩიევს სხვადასხვა დე ფაქტო თანამდებობა ეკავა. იგი ხელმძღვანელობდა ე.წ. ეროვნებათა საქმეთა კომიტეტს, იყო განსაკუთრებულ საკითხთა "მინისტრი", ხელმძღვანელობდა ქართულ-ოსური კონფლიქტის მოგვარების შერეული საკონტროლო კომისიის "სამხრეთ ოსეთის" ჯგუფს, 2008 წლის აგვისტოს ომის შემდეგ, მრავალი წლის განმავლობაში მოლაპარაკებების პროცესში იყო ჩართული. ლეონიდ თიბილოვის ე.წ. ხელისუფლებაში მოსვლის შემდეგ ჩოჩიევი ხელმძღვანელობდა ე.წ. პრეზიდენტის ადმინისტრაციას.