"მე ისრები არავისზე არ გადამაქვს, ვაქცინაციის დაბალი მაჩვენებელი ჩემი, თქვენი, მთავრობის და ყველას პასუხისმგებლობაა" - ამირან გამყრელიძე

მე ისრები არავისზე არ გადამაქვს, ვაქცინაციის დაბალი მაჩვენებელი ჩემი, თქვენი, მთავრობის და ყველას პასუხისმგებლობაა, - ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განაცხადა. მისი თქმით, ამ პროცესებში ჩართულია არა კონკრეტული ერთი ან ორი ადამიანი, არამედ ყველა.

„აქ არის ერთობლივი ანუ სოლიდარული პასუხისმგებლობა. პანდემია არის ყველაზე კარგი გამოხატულება დღეს გლობალური სოლიდარობის, აქ ერთი ადამიანი, ერთი პრეზიდენტი ან ერთი ხელმძღვანელი ამ საკითხს ვერ წყვეტს, ამას მთლიანად საზოგადოება წყვეტს“, - განაცხადა გამყრელიძემ.

ამასთან, მანვე განმარტა, რომ რეგიონები ვაქცინებით საკმარისად მარაგდება, მაგრამ ეს არ არის საკმარისი.

„ვაქცინები რეგიონებში ძალიან ბევრი მიდის, მე თვითონ ჩამოვიარე ყველა, გარდა რაჭა-ლეჩხუმისა და ახლა პაატა დადის, შემდეგ ჩვენი თანამშრომლები და ჩვენი ქსელი ძალიან აქტიურად მუშაობს, მაგრამ გეთანხმებით, რომ ეს არ არის საკმარისი. კიდევ მეტი გვჭირდება, რომ ადამიანები დავარწმუნოთ. დღევანდელი დღის მონაცემებით 333 ამცრელი ბრიგადაა გამოყოფილი, ეს არ არის ცოტა. ერთ ბრიგადას დღეში 70 აცრის გაკეთება შეუძლია“, - აღნიშნა გამყრელიძემ. გამყრელიძის თქმით, მიზეზი იმისა, თუ რატომ არ მიდის ხალხი ასაცრელად ბევრია, მათ შორის ის, რომ ხალხს ისევ არ სჯერა კორონავირუსის არსებობის.

„ბევრს ჰგონია, რომ ეს არის ჩვეულებრივი გრიპი, გადაიტანს და ექნება იმუნიტეტი. არ უყურებენ იმას, რომ დღეს ქვეყანაში 26 ადამიანი გარდაიცვალა და ეს საშინელებაა. ამიტომ გამოსავალი აქედან მხოლოდ ერთია - აცრა, რათა ხელოვნური იმუნიტეტი შეიქმნას ქვეყანაში. ადრე ვაქცინა არ არისო ამბობდნენ, ახლა არის. ის 4 ვაქცინა: „სინოვაკი“ „სინოფარმი“ „ფაიზერი“ და „ასტრაზენეკა“, რომელიც ქვეყანაში დღეს ადმინისტრირდება, გვიცავს ყველაზე უფრო მძიმე გართულებებისაგან, როგორიცაა ჰოსპიტალიზაცია, რეანიმაციაში მოხვედრა და სიკვდილი“, - აღნიშნა გამყრელიძემ.