29
მარტიდღის ზოგადი ასტროლოგიური პროგნოზი
2020 წლის ტოკიოს ზაფხულის XXXII ოლიმპიადა 23 ივლისს იხსნება, სპორტული შეჯიბრებები კი 24 ივლისიდან დაიწყება. ოლიმპიური თამაშები 17 დღეს გასტანს და ოფიციალურად 9 აგვისტოს დაიხურება. ხოლო პარაოლიმპიადა 25 აგვისტოს დაიწყება და 6 სექტემბერს დასრულდება.
მოგეხსენებათ, ოლიმპიადის ერთი წლით გადადების მიზეზი კორონავირუსული პანდემია გახდა.
ტოკიოში ოლიმპიური თამაშები ჯერ კიდევ 1940 წელს უნდა გამართულიყო. ამის უფლება იაპონიის დედაქალაქმა 1937 წელს მოიპოვა, მაგრამ ის ოლიმპიადა საერთოდ არ ჩატარებულა. 18 წლის შემდეგ იაპონიამ კვლავ წამოაყენა თავისი კანდიდატურა, მაგრამ 1960 წლის თამაშების მასპინძლად რომი არჩიეს. იაპონელებს ფარ-ხმალი არ დაუყრიათ და 1959 წლის 26 მაისს, მიუნხენში გამართულ სესიაზე, საერთაშორისო ოლიმპიურმა კომიტეტმა პირველსავე ტურში ტოკიოს დაუჭირა მხარი.
მოკლედ, ტოკიო უკვე მეორედ მასპინძლობს ოლიმპიადას, პირველად ის იაპონიის დედაქალაქში 1964 წელს ჩატარდა, აღსანიშნავია, რომ სწორედ ამ წლიდან ძიუდო შეიტანეს ოლიმპიური თამაშების პროგრამაში.
1964 წელს, თამაშები გახსნა იმპერატორმა ჰიროჰიტომ. ოლიმპიური ჩირაღდანი სტადიონზე შეიტანა იოსინორი საკაიმ, თუმცა ის არც მაშინ იყო დიდი სპორტსმენი და არც შემდეგ გამხდარა. 19 წლის იაპონელ სტუდენტს ეს პატივი მხოლოდ დაბადების თარიღის გამო ერგო - იგი 1945 წლის 6 აგვისტოს დაიბადა - ზუსტად იმ დღეს, როცა ამერიკელებმა ჰიროსიმაში პირველი ატომური ბომბი გამოცადეს. 1964 წლის ზაფხულის ოლიმპიური თამაშები პირველად ჩატარდა აზიაში.
საქართველოს ოლიმპიელთა შედეგები 1964 წელს:
XVIII ოლიმპიადა, ტოკიო.
18 მონაწილე საქართველოდან, რომლებიც საბჭოთა კავშირის სახელით გამოდიოდნენ.
იმ წელს ქართველების მონაპოვარი 2 ოქროს, 4 ვერცხლისა და 5 ბრინჯაოს მედალი იყო.
- ოლიმპიადაში დოპინგის სკანდალით გამოწვეული დისკვალიფიკაციის გამო მონაწილეობას ვერ იღებს რუსეთი. უფრო სწორედ, რუს სპორტსმენებს აქვთ უფლება მონაწილეობის, თუმცა ისინი ვერ გამოიყენებენ რუსეთის დროშას და გამარჯვების შემთხვევაში, არ აჟღერდება რუსეთის ჰიმნი, რომელიც რუსეთის ოლიმპიურმა კომიტეტმა ჩაიკოვსკის მუსიკით ჩაანაცვლა. რუსი სპორტსმენები გამოვლენ, "რუსეთის ოლიმპიური კომიტეტის (ROC) აბრევიატურით, თუმცა სრული სახელწოდება "რუსეთის ოლიმპიური კომიტეტის" გამოყენება ექნებათ აკრძალული.
ტოკიო პირველი ქალაქია, რომელიც პარაოლიმპიურ თამაშებს მეორედ უმასპინძლებს. შესაბამისად, წელს, ოლიმპიადის დროს, იაპონიის დედაქალაქში პირველი პარაოლიმპიური მუზეუმი ამოქმედდება.
"ტოკიო 2020"-ის ოფიციალური დევიზია "გაერთიანებული გრძნობებით", რომელიც ეხმიანება მრავალფეროვნებისა და ინკლუზიის უნივერსალურ მოწოდებას.
ესაა პირველი ოლიმპიადა, რომელსაც მაყურებელი ვერ დაესწრება.
კორონავირუსის პრევენციის მიზნით, ოლიმპიადის მედალოსნები, მედლებს საკუთარი ხელით დაიკიდებენ.
ოლიმპიური მედლები შეიცავს ძველი ელექტრონული მოწყობილობების ნაწილებს. იაპონიის მოქალაქეებს აქვთ შესაძლებლობა განსაკუთრებული წვლილი შეიტანონ თამაშებში ძველი ელექტრონული მოწყობილობების გადამუშავებით. იაპონიამ აწარმოა 5000 ოლიმპიური მედალი - გადაამუშავეს 78,985 ტონა ელექტრონული მოწყობილობა (ციფრული კამერები, ლეპტოპები, 6,21 მილიონი მობილური ტელეფონი და სხვ.)
2020 წლის ოლიმპიური თამაშების მასპინძლებმა ოლიმპიური ჩირაღდნის შექმნისას გამოიყენეს იაპონელთა უსაყვარლესი ყვავილის - საკურას მოტივები. საკურას ფურცლები თვალშისაცემადაა ასახული ჩირაღდნის ფორმებში, იგრძნობა იაპონიის კულტურაც. ჩირაღდნის დასამზადებელ მასალად გამოყენებულია იაპონიაში მიწისძვრით დაზარალებულ რეგიონებში დანგრეული სახლების ალუმინის კონსტრუქციები.
ოლიმპიადის თილისმად 2 საყვარელი ფიგურა, რომლებიც იაპონური კულტურისა და თანამედროვე ტექნოლოგების ნაზავს წარმოადგენენ, ოლიმპიური მოძრაობის ისტორიაში პირველად, შეარჩიეს დაწყებითი სკოლების მოსწავლეებმა. ფიგურები შექმნილია პოპულარული იაპონური ჟანრის ანიმეს ყველაზე ცნობილი იტიმაცუს სტილით. მისი ავტორია მხატვარი რინო ტონიგუჩი. თილისმის სახელია MIRAITOWA, რაც ორი სიტყვის - "მომავალი" და "მარადისობა" გაერთიანებაა.
ოლიმპიადის მომსახურე პერსონალში მნიშვნელოვნად გაზრდილია რობოტების რაოდენობა - დამხმარე რობოტები უკვე განლაგდნენ ტოკიოს აეროპორტში. Japan, Times– ის თანახმად, ამ გლუვ, მეგობრულ მანქანებს შეუძლიათ მითითებების მიცემა, ბარგის განაწილებაში დახმარება და ოთხ სხვადასხვა ენაზე ლაპარაკი.
მოგეხსენებათ, ქართველი ჩემპიონი მილიონ ლარს მიიღებს ჯილდოდ, აშშ-მა თითოეული მოგებული ოქროსთვის 25 000 აშშ დოლარი გამოყო, იტალიამ 185000 აშშ დოლარი, იაპონიამ კი, დაახლოებით, 50 000 აშშ დოლარი. რაც შეეხება გაერთიანებულ სამეფოს, ის გამარჯვებულებისთვის ჯილდოდ თანხის გადაცემას არ გეგმავს.
"ტოკიო 2020"-ის ორგანიზატორების თავდაპირველი გათვლით, ოლიმპიადის ღირებულება 730 მილიარდი იენი (დაახლოებით 6,8 მილიარდი დოლარი) იქნებოდა, მაგრამ ცხადი გახდა, რომ ეს ამბიციურად დაბალი ბიუჯეტი იყო. უახლესი შეფასებით, თამაშებთან დაკავშირებული ყველა ხარჯის ღირებულება დაახლოებით 2.16 ტრილიონი იენია (დაახლოებით 20 მილიარდი დოლარი).
ზაფხულის ოლიმპიადის მომავალი მასპინძელი ქალაქებია: პარიზი (2024) და ლოს-ანჯელესი (2028).
მოამზადა ლადო გოგოლაძემ
იმედია მომდევნო ოლიმპიადა ჩატარდება ქუთაისში.
ჩვენი გუნდი 7 საათი ელოდა აეროპოტში ავტობუსსო,ინგლისურად არავინ ლაპარაკობს.