"ორჯერ ვიქორწინე და ქორწილი არ მქონია, ალბათ არ განვიხილავდი ამ ქორწინებებს" - სოფო ჭყონია პირადსა და ოჯახურ ბიზნესზე

"Mercedes-Benz-ის მოდის კვირეული - თბილისის" დამფუძნებელმა და ორგანიზატორმა სოფო ჭყონიამ, გადაცემაში "გორგილაძის აუტანელი სიმსუბუქე" ცხოვრების მნიშვნელოვანი ეპოზოდები, მათ შორის "კოკა-კოლასთვის" ლიცენზიის მოპოვების ისტორია გაიხსენა.

"მახსოვს, ახალი ჩამოსული ვიყავი ამერიკიდან და სჭირდებოდათ ინგლისურენოვანი ადამიანი. ინგლისური ენა ოჯახში მხოლოდ მე ვიცოდი, "კოკა-კოლას" გახსნის პროცესი იყო, უნდა შემოსულიყო საქართველოში და ეს შეხვედრა თურქეთში უნდა შემდგარიყო იმ ამერიკელებთან, რომლებსაც ლიცენზია უნდა მიეცათ. მანქანით წავედით, მე ვიყავი თარჯიმანი ბავშვი. გავიარეთ ძალიან ბნელი საქართველო. 1993 წელი იყო, ჩავედით სტამბულში, ისინი იყვნენ შოკში, იმიტომ რომ ჩამოვიდა კაცი საკუთარი მანქანით, თვითონ იჯდა საჭესთან და გვერდით 12 წლის ბავშვი, რომელმაც უნდა ითარჯიმნოს. მემგონი მაგიტომ მისცეს ლიცენზია, რომ მსგავსი შემთხვევა არ ჰქონიათ. მერე საქართველოში ჩამოვიდნენ და ის კაცი ისეთი შეშინებული იყო საქართველო რომ დაინახა, თავისი თვითმფრინავით ჩამოფრინდა და კარგა ხანს არ გადმოდიოდა იქედან. მაშინ ხომ მარტივი იყო ტრაპთან დახვედრა და წარმოიდგინე, ტრაპთან როგორი კონტინგენტი დახვდა", - ყვება სოფო ჭყონია.

გადაცემაში სოფომ პირად ცხოვრებაზეც ისაუბრა.

"ორჯერ მქონდა ქორწინება და ქორწილი არ მქონია, ალბათ არ განვიხილავდი ამ ქორწინებებს. ქორწილი უნდა გქონდეს, როდესაც განიხილავ, რომ ეს იქნება მთელი ცხოვრება".

შეკითხვაზე, თუ რატომ გაბრაზდა თემურ ჭყონია, რონალდონზე, სოფო ამბობს, რომ "ეს სასაცილო იყო, ძალიან პერსონალურად მიიღო, მაგრამ ხალხის რეაქცია იყო უფრო სასაცილო".