სად გაქრა, კრემლთან დაკავშირებული, ჰაკერთა ჯგუფი? - "ისინი დიდი კომპანიების სერვერებს უტევდნენ, შემდეგ კი, გამოსასყიდს ითხოვდნენ"

გავრცელებული ინფორმაციით, რუსეთთან ასოცირებული ჰაკერთა ჯგუფის REvil-ის ვებგვერდები "დარქნეთიდან" გაქრა. მათი ნაწილი საერთოდ აღარ იძებნება, ხოლო ნაწილზე წერია, რომ ამ დროისთვის "მიუწვდომელია."

როგორვ BBC-ი წერს, ამ ეტაპზე უცნობია, გაუჩინარების მიზეზი, მაგრამ არსებობს ვარაუდი, რომ შესაძლოა, მათი გაქრობა რუსეთის ან შეერთებული შტატების ხელისუფლების ჩარევას უკავშირდებოდეს, ვინაიდან ყოველივე დაემთხვა პერიოდს, როცა ამერიკასა და რუსეთს შორის კიბერთავდასხმებთან დაკავშირებულ საკითხზე განსაკუთრებით დაძაბული ურთიერთობაა.

• კიბერთავდასხმების შესახებ აშშ-ის პრეზიდენტი ჯო ბაიდენი რუსეთის პრეზიდენტ ვლადიმერ პუტინსაც ესაუბრა. როგორც ბაიდენმა ჟურნალისტებს განუცხადა, მან ძალიან მკაფიოდ უთხრა რუს კოლეგას, რომ ამერიკა რუსეთისგან კონკრეტულ მოქმედებას ელოდა. გარდა ამისა, ბაიდენმა ისიც თქვა, რომ თუკი რუსეთი არ იმოქმედებდა, ამერიკას ჰქონდა მოქმედების შესაბამისი რესურსი.

სწორედ ამ განცხადების გათვალისწინებით, არსებობს შეხედულება, რომ REvil-ის წინააღმდეგ შესაბამისი ღონისძიებები გაატარა ან შეერთებულმა შტატებმა, ან რუსეთმა, თუმცა აღსანიშნავია, რომ თემაზე ოფიციალური კომენტარი ჯერჯერობით არავის გაუკეთებია.

აღსანიშნავია, რომ ჰაკერთა ჯგუფის საიტების გათიშვის კიდევ ერთი ვერსია არსებობს, რომლის მიხედვითაც, მათ თავად გადაწყვიტეს ასე მოქცევა, რადგანაც თავი აარიდონ ზედმეტ ყურადღებას, ხოლო შემდეგ, სხვა სახელით გამოჩდნენ. ექსპერტთა შეფასებით, ეს საკმაოდ გავრცელებული პრაქტიკაა.

ცნობისთვის FBI ადანაშაულებს REVIL-ს სხვადასხვა კომპანიებზე კიბერშეტევაში, მათ შორის, ერთ-ერთი გახმაურებული საქმე უკავშირდება გასულ თვეში ხორცის გადამამუშავებელი მსხვილი კომპანიის სერვერზე კიბერთავდასხმას. აღსანიშნავია, რომ კომპანია იძულებული გახდა ჰაკერებისთვის 11 მილიონი გადაეხადა.

მათ ჰქონდათ ასევე ვებგვერდი, სადაც განთავსებული იყო სამომავლოდ იმ მსხვერპლი კომპანიების სია, რომლებიც სამიზნეებად შეარჩიეს. აღნიშნული პორტალი ახლა გათიშულია. აღსანიშნავია, რომ ჰაკერები კიბერთავდასხმის შემდეგ გამოსასყიდ თანხას ითხოვდნენ ხოლმე.