"კადრები, რომელიც ვნახეთ გვაშინებსო და გააუქმეს ტურისტებმა ჯავშანი... დანარჩენებმა ბოდიშიც არ მოიხადეს" - რას წერს ზურა შევარდნაძე?

ცნობილი მებაღე ზურა შევარდნაძე სოციალურ ქსელში პოსტს აქვეყნებს, სადაც წერს, რომ ბოლო დროს განვითარებული მოვლენების გამო, ტურისტები საქართველოში ჩამოსვლაზე უარს ამბობენ.

ამის მაგალითად მოჰყავს ის ფაქტი, რომ პლეხანოვზე არსებულ მის ბინაში, რომელიც ტურისტებზე ქირავდებოდა, ბოლო დღეების განმავლობაში რამდენიმე ჯავშანი გაუქმდა.

"გაწბილებული ვარ. არც ბოლოთქმას გავუკეთებ, არც თავში ვიტყვი რამეს, უბრალოდ პატარა ამბავს დავწერ. პლეხანოვზე, ძველ თბილისურ ეზოში, ერთი თხუთმეტკვადრატულმეტრიანი ოთახი მაქვს, ლამაზად მოწყობილი, ტურისტებზე ვაქირავებ.

გაგანია პანდემიისას ადამიანი რომ არ ჭაჭანებდა მაშინაც კი გაქირავებული იყო. ბევრი მადლიერი და მადლობელი სტუმარი მყოლია ამ წლების მანძილზე.წლევანდელი ივლისი, აგვისტო, სექტემბერი, ახალ წლამდე დაჯავშნილია სულ.

გუშინ და გუშინწინ ოთხი ჯავშანი გაუქმდა. ახალგაზრდა ოჯახმა ავსტრიიდან, ზალცბურგიდან რომლებმაც 11 მაისს დაგვიკვეთეს ოთახი. მოკლე წერილი გამოგვიგზავნეს, სამი ბოდიშით.

დიასახლისს, რომელთანაც ჰქონდათ ურთიერთობა, წერენ: "ქეთევან, საქართელოში სამოგზაუროდ ჩამოსვლას, დიდი ხანია ვგეგმავდით, ძალიან გვიხაროდა და ვემზადებოდით. კადრები, რომელიც ვნახეთ გვაშინებს და ამ ეტაპზე გადავწყვიტეთ თავი შევიკავოთ. ბოდიში, ბოდიში, ბოდიში. "დანარჩენმა სამმა სტუმარმა ბოდიშიც არ მოიხადა, უბრალოდ გააუქმა ჯავშანი. წერტილი..." - წერს ზურა შევარდნაძე.