"თუ მაინც მომიწია ისტორიაში შესვლა, ჰერმან მეფე ძალიან ადამიანური და ჰუმანური მეფის სახელით შევა" - ვინ არის "გირჩის სამეფოს" მეფე ჰერმან საბო

"ყველაზე იდეალური სიტუაცია ის იქნება, არ დაგვჭირდეს მეტი ეპატაჟის გამოყენება, რომ ადამიანებმა ამ ეპატაჟის გარეშეც შეძლონ ჩვენი გამოყოლა. და თუ მაინც მომიწია ისტორიაში შესვლა, ჰერმან მეფე ძალიან ადამიანური და ჰუმანური მეფის სახელით შევა“, - მეუბნება და იმ გზაზე გვიამბობს, რომელიც "მეფედ კურთხევამდე“ განვლო. ყველაფერს, თუნდაც "გირჩთან“ გზის გადაკვეთასაც მის მიერ შექმნილ ერთ პოპულარულ "ფეისბუკგვერდს" "ასე იტყოდა ზარათუშტრა“ უმადლის. სამეფო კარის ინტრიგებზე არა, მაგრამ გვიყვება იმაზე, რომ 32 წლის განმავლობაში ბევრ სფეროს მოედო, ბოლოს კი თავი პოლიტიკაში იპოვა.

“ვინ, თუ არა გირჩის მეფე უნდა წარუძღვეს გირჩის ლაშქარს ადგილობრივ თვითმმართველობაზე“, - გამოაცხადა და საგანგებოდ ემზადება იმისთვის, რათა რაც შეიძლება მეტმა "გირჩელმა“ მოიყაროს თავი საკრებულოში. ჰერმან საბო და მისი თანაგუნდელები არც იდეებს უჩივიან, არც ორიგინალობა და ეპატაჟურობა აკლიათ და სხვა დანარჩენი პოლიტიკოსებისაგან განსხვავებული, არასტანდარტული იმიჯითა და საინტერესო იდეებით "საკმარისი რაოდენობის გულებამდე“ მიღწევას ცდილობენ.

• "ბავშვობის მოგონებები უფრო დედულეთს უკავშირდება"

ჰერმან საბო ჩემი ნამდვილი სახელი და გვარია, წარმოშობით უნგრელი ვარ. ჩემი წინაპრები მეფის რუსეთის დროს ჩამოსულან საქართველოში. მართალია, ბევრი დოკუმენტი აღარ არსებობს, მაგრამ გადმოცემით ვიცი, რომ ისინი ზაქათალის გუბერნატორები იყვნენ. დედა წარმოშობით სამაჩაბლოდანაა.

1988 წელს დავიბადე თბილისში. ქიაჩელზე ვიზრდებოდი. მამა თეატრის რეჟისორი იყო, დედა - მსახიობი და მოგეხსენებათ, იმ პერიოდში ხელოვან ადამიანებს განსაკუთრებით უჭირდათ. ჩემი და მსახიობი და დიზაინერი გახდა, მე - პოლიტიკურ მეცნიერებათა მკვლევარი, თუმცა აქამდე უამრავი პროფესიით მიმუშავია. ჩემი ბავშვობის მოგონებები უფრო დედულეთს, ცხინვალის რაიონს უკავშირდება - ყოველ ზაფხულს ულამაზეს სოფელ ვანათში ვატარებდი. სამწუხაროდ, იქ ახლა ვეღარ შევდივართ... დედა დღესაც ცხინვალის თეატრში მუშაობს, რომელიც თბილისშია გადმოსული. ბავშვობის ყვლაზე მძაფრი მოგონება იყო აგვისტოს ომი. იმ დროს სოფელში ვიყავით, მანქანები აღარ მოძრაობდა და მახსოვს, ჩვენმა ჯარისკაცებმა "ბეტეერით" გამომიყვანეს. ახლაც თვალწინ მიდგას ის კადრი - ტანკში რომ ვზივარ, გარეთ კი სროლებია. "გუგლმეფზე“ ვნახე და პაპა-ბებიის სახლი დამწვარია.

• "ასე იტყოდა ზარათუშტრა"

დავამთავრე მე-7 გიმნაზია, ფიზიკა-მათემატიკური სკოლა და შემდეგ ჩავირიცხე უნივერსიტეტში. სკოლაში ძალიან კარგად ვსწავლობდი, უნივერსიტეტშიც დიდი ენთუზიაზმით ჩავაბარე, მაღალი ქულები მქონდა, თუმცა იმდენად არ მომეწონა სიტუაცია, რომ ლექციებზე არ დავდიოდი. ალბათ რასაც ველოდი, ის არ აღმოჩნდა. რადგან უნივერსიტეტმა ვერ მოახერხა ინტერესის გაღვივება, გამოვიდა ისე, რომ პოლიტიკური იდეოლოგიის მიმართულებით ჩემით გავიღრმავე ცოდნა. როგორღაც დავამთავრე ჯავახიშვილის უნივერსიტეტი. იმ პერიოდში ოჯახში ძალიან გვიჭირდა და სწავლის პარალელურად, მუშაობა დავიწყე - თბილისში იყო ცნობილი იტალიური პიცის ქსელი "პრეგო“ და სამი წელი ოფიციანტად ვიმუშავე. სწავლის დასრულების შემდეგ, ჩემს მეგობრებთან ერთად თავი ბიზნესში ვცადე - პირველი ჰოსტელი თბილისში ჩემი და ჩემი მეგობრების იყო ("თბილის ჰოსტელი“, რომელიც ავლაბარში მდებარეობდა), სადაც ორწელიწადნახევარი გადაბმულად ვიმუშავე. ამასობაში, იქ ბევრ საინტერესო ადამიანს შევხვდი და ბევრი მეგობარი გავიჩინე მსოფლიოს მასშტაბით. მას შემდეგ, რაც თბილისში ბევრი ჰოსტელი გაიხსნა, ასე ვთქვათ, ჩვენ ჩაგვძირეს, მაგრამ მაინც კარგი იყო... შემდგომში ბევრ სფეროს მივედ-მოვედე, 2012 წელს გახსნიდან დახურვამდე, "მეცხრე არხში", შემდეგ "ტაბულაში“ გავაგრძელე მუშაობა.

იმ პერიოდში "ფეისბუქ-გვერდები" გახდა ძალიან პოპულარული და მეც გავაკეთე ერთი ასეთი - "ასე იტყოდა ზარათუშტრა“, რომელმაც ისეთი პოპულარობა მოიპოვა, რომ მისი დახმარებით სამსახური დავიწყე საქართველოში ერთ-ერთ ყველაზე კრეატიულ სარეკლამო სააგენტო Windfor's - ში "ქოფი რაითერად“ და დიდ კომპანიებს ვემსახურებოდი.

• "ასე მოვხვდი "გირჩში“

ერთ საღამოს, ჩემი მეგობარი მწერს, ვიღაცებს შენთან გასაუბრება უნდათო. მივედი დათქმულ დროსა და ადგილზე და დამხვდა "ნაციონალური მოძრაობიდან“ წამოსული ოთხეული, რომლებსაც "გირჩის“ გაკეთება უნდოდათ. მითხრეს, ადამიანი გვჭირდება მედიასთან ურთიერთობისთვის და იქნებ, შენ შეითავსო ეს პოზიციაო. ასე წამოვედი "გირჩში“ და იმ დროიდან, როცა მას ჯერ "გირჩი“ არ ერქვა, 2015 წელს უკვე მათი გუნდის წევრი ვიყავი. "გირჩში“ მოხვედრაც "ფეისბუკგვერდმა" "ასე იტყოდა ზარათუშტრამ“ განაპირობა, აქედან გადაიკვეთა ჩვენი გზები.

"გირჩში“ ჩემი ფუნქცია იყო მედიასთან ურთიერთობა, პიარი და მარკეტინგი. "გირჩის“ ბრენდინგი, ლოგო და გამორჩეული ვიზუალი რაცაა, დიზაინერთან ერთად, ჩემი ჰაიდლაინით არის შექმნილი. ადამიანებმა ბევრი დაპირება ნახეს, ბევრჯერ მოტყუვდნენ და ჩაკეტილი ჰქონდათ ის არხი, რომ შეიძლება ვინმე პოლიტიკოსს მოუსმინო და მისი აზრი გაითვალისწინო, დაუჯერო, რაღაცნაირი ვაკუუმი იყო შექმნილი. და ამ მომენტში გამოჩნდა "გირჩი“, რომელიც ძალიან გულწრფელი იყო, რასაც ფიქრობდა, იმას ამბობდა და იყო თანმიმდევრულიც. ჩვენ რაღაცნაირ მორალურ ჩარჩოში ვზივართ, წინასწარ გვაქვს ნათქვამი, რომ ჩვენ ასე ვფიქრობთ და ეს ასე რჩება. ადამიანებმა თავიდან ფრთხილად, მაგრამ მოსმენა დაგვიწყეს, თან რაღაც არასტანდარტული კომუნიკაცია გვქონდა, პოლიტიკოსს ვითომ რომ არ ეკადრება - ისეთი, ღია, ადამიანური და არატრაფარეტული. ამან გამოიწვია ის, რომ ნელა, მაგრამ გაიზარდა "გირჩის“ რეიტინგი. ჩვენი ზოგი იდეა განხორციელდა და დღესაც მუშაობს, ბევრიც ჯერ კიდევ ჩანასახობრივ მდგომარეობაშია. მართალია, ჯერ ვერ მივაღწიეთ საკმარისი რაოდენობის გულებამდე, მაგრამ აუცილებლად მივალთ.

• შიდა წრისთვის - "გირჩის“ უგვირგვინო მეფე

ნამდვილად საპატიო ტიტულია იყო "გირჩის სამეფოს“ მეფე. ეს ამბავი ხუმრობით დაიწყო. ალბათ გახსოვთ, 2019 წელი, სამეფო ოჯახები სასამართლოში ერთმანეთს რომ ედავებოდნენ. მირიან მეფის პორტრეტთან მაქვს ფოტო გადაღებული, რომელიც "ამბასადორში“ ჰკიდია, ძალიან ვგავართ ერთმანეთს და ოფისში ხუმრობით ჩავწერეთ ვიდეო დაახლოებით ასეთი ტექსტით - რა დროს ბაგრატიონებია, როცა მირიან მეფის ნახატთან მაქვს გადაღებული ფოტო, ძალიან ვგავართ ერთმანეთს, აგერ, ეს კაცი ხოსროიდებს ჰგავს და მე ვარ ხოსროიდების შთამომავალი-მეთქი.

ამ პერიოდს დაემთხვა მთაწმინდაზე მაჟორიტარების არჩევნები და "გირჩის“ სახელით იქ ვიყარე კენჭი (სალომე ზურაბიშვილი პრეზიდენტად აირჩიეს და ერთი ადგილი გათავისუფლდა). კამპანიის ნაწილი იყო, რომ საბო მეფეა და ჰეშთეგს ვიყენებდით ფეისბუკზე - "საბო მეფედ“. ნახევრად ხუმრობით, შიდა წრისთვის ვიყავი "გირჩის“ უგვირგვინო მეფე.

• კონსტიტუციური მონარქია "გირჩში“ და მეფის ფუნქცია

მას შემდეგ, რაც "გირჩი“ დაიშალა, ისე გამოვიდა, რომ აქეთ დარჩენილებს, ვინც ზურას არ გავყევით, სერიოზული კრიზისი გვქონდა. მე და ლევან ჯგერენაიამ, რომელიც "გირჩის" ერთ-ერთი პროექტის "ბიბლიური თავისუფლების“ მღვდელმსახურია, გადავწყვიტეთ, რომ აგვეღო მენეჯერობის და "დალაგების“ ფუნქცია. მოხდა ისე, რომ აქეთ, თუ - იქეთ "გირჩი“ გადარჩა და აქეთ მყოფებმა გადავწვიტეთ, რომ საზოგადოებისთვის დავწეროთ კონსტიტუცია. როდესაც ამაზე ვსაუბრობდით, იაგო ხვიჩიას გაუჩნდა იდეა, ის მოდელი, რომელმაც აქამდე მოგვიყვანა, ჩვენს კონსტიტუციაში გადავიტანოთო. გამოვიდა ისე, რომ "გირჩი“ თავისი მოწყობით არის კონსტიტუციური მონარქია, რომელსაც მართავს არჩეული საბჭო. მაშინ, როდესაც რაიმე კრიზისი კიდევ შეგვხვდება, მე და ლევანს გვაქვს ერთადერთი ფუნქცია, ვითავოთ კრიზისმენეჯერობა. სხვა მხრივ, მე და ლევანს სამეფოს შიგნით არანაირი პრივილეგია და ფუნქცია არ გაგვაჩნია. მშვიდობიანობის ჟამს გახლავართ ფორმალური მეფე, ომიანობის დროს მეფე და მთავარი მღვდელმსახური ხდებიან აბსოლუტური მმართველები, მათი სიტყვა კანონია და მათი ფუნქციაა "გირჩის“ საზოგადოება დააბრუნოს კონსტიტუციურ წესრიგში.

ვეცდები ვიყო "გირჩის“ პირველი ნომერი თბილისის თვითმართველობის არჩევნებზე და იმ ცნობადობით და ნდობით, რომელიც მოპოვებული მაქვს, "გირჩის“ რაც შეიძლება მეტი ადამიანი შევიყვანო საკრებულოში.

• "ვერ ვისწავლე უნგრული"

ჩემს გამეფებას ახლობლები ძალიან მხიარულად და პოზიტიურად შეხვდნენ. სხვადასხვანაირად მომმართავენ - მეფეო, ჰერმან... მაგრამ დედა ისევ გოგას მეძახის. ჩემი ვარაუდით, დედას უნდოდა, ქართული სახელი მრქმეოდა. ოფიციალურად ჰერმანი ვარ, მაგრამ დედა მოფერებით თავიდანვე გოგას მეძახდა. მამა გარდაცვლილი მყავს... მან იცოდა ცოტა მშობლიური უნგრული, მეც ვეცადე მესწავლა, მაგრამ ურთულესი ენაა. რაღაც ფრაზები ვიცი, თუმცა საუბარს ვერ მოვახერხებ. ისე, ძალიან ლამაზი ენაა უნგრული.

• ვინ არის მეფის რჩეული ლიბერტარიანელი

კარგა ხანია, რაც ძალიან კარგ, პროფესიონალ და ლამაზ ადამიანს ვხვდები. ეს ურთიერთობა არ გაგვიოფიციალურებია, მაგრამ ყველაფერი კარგად გვაქვს, ერთად ბედნიერად ვცხოვრობთ, შეძლებისდაგვარად. ჩემი რჩეული ერთ-ერთ ტელევიზიაში მუშაობს, ისიც ლიბერტარიანელია იდეოლოგიით და ამჟამად "გირჩის სამეფოს“ წევრი. მისი ვინაობის საჯაროდ გამჟღავნებისგან ამჯერად თავს შევიკავებ...

• პოლიტიკაში მოსვლის ბანალური მიზანი

ძალიან მიყვარს ფიზიკა და კომპიუტერული ტექნოლოგიები. დიდი სურვილი მაქვს და ჩემი მიზანია, რაც მინდა მოვასწრო, ვიყო მასწავლებელი - მიყვარს ბავშვებთან ურთიერთობა და მარტივად გამომდის რთული კონცეფციის ახსნა. მეორე მიზანი, რამაც გადამაწყვეტინა პოლიტიკაში მოსვლა, ბანალურია - მინდა, ისე ვიცხოვრო, როგორც წარმომიდგენია რომ სწორია და არავის ჰქონდეს უფლება, ჩაერიოს ჩემს ცხოვრებაში. ამაში უამრავი რამ იგულისხმება, მაგალითად, ვაკეთო ის ბიზნესი, რაც მინდა, გამოვხატო სიტყვის თავისუფლება ისე, როგორც მინდა. მინდა, მაქსიმალურად მოვიპოვო თავისუფლება და თუ ეს მოვახერხე და მოვიპოვე, იმას ნიშნავს, რომ თქვენთვისაც მოვიპოვებ და ნებისმიერი ქართველისთვისაც. ვცდილობ, პოლიტიკაში ვიაქტიურო, ადამიანებს ავუხსნა, რა არის სწორი და თუ ეს მოვახერხე, ყველანი წამომყვებიან და ყველანი მოვახერხებთ ისეთი საზოგადოების აშენებას, როლის ჩანასახიც დღეს "გიჩის სამეფოა“.

ყველაზე იდეალური სიტუაცია ის იქნება, რომ ჰერმან მეფე არ შევიდეს ისტორიაში და არ დაგვჭირდეს მეტი ეპატაჟის გამოყენება, რომ ადამიანებმა ამ ეპატჟის გარეშეც შეძლონ ჩვენი გამოყოლა. და თუ მაინც მომიწია ისტორიაში შესვლა, ვიქნები ძალიან ადამიანური და ჰუმანური მეფე.

• "გირჩის მეფის“ და "სამეფოს თავკაცის“ მნიშვნელოვანი პროექტი

ბოლო 4 წელია, ფილტვებზე პრობლემების გამო, არ ვარ მარიხუანას მომხმარებელი. მანამდე ჩვეულებრივად განტვირთვის ფარგლებში მოვიხმარდი კვირაში ან თვეში ერთხელ. არ მგონია, მარიხუანას მოხმარება პრობლემა და ტრაგედია. პერიოდულად მიწევს ტომოგრაფიის კეთება, მაგრამ სერიოზული პრობლემა არ მაქვს. ამ ეტაპზე გადართული ვარ წინასაარჩენო კამპანიაზე, ვთარგმნი და ვდებ ვიდეოებს. ამასთანავე, მე და "გირჩის სამეფოს“ თავკაცი ოთო ზაკალაშვილი ერთი მნიშვნელოვანი პროექტის შემქმნელები ვართ და მის ფარგლებში ათასობით ახალგაზრდას სრულიად უფასოდ ვასწავლით პროგრამირებას. ბევრმა მათგანმა უკვე სამსახურიც იპოვა. ამ მომენტში გვყავს 4000-მდე სტუდენტი. რაც შეეხება "გირჩის“ შემოსავლის წყაროს, ამჯერად ორი წყაროა - "ბიბლიური თავისუფლება“ და პარტიის შემომწირველები, მსხვილი შემომწირველი ბიზნესმენები არ გვყავს. ვისაც ჩვენი იდეები მოსწონს და ვინც მიიჩნევს, რომ ჩვენი იდეები მათ ცხოვრებას უკეთესობისკენ ცვლის, გვწირავენ იმდენს, რამდენიც შეუძლიათ, ამით არსებობს "გირჩი“.