"რა ვქნათ ახლა, რას ითხოვთ, პოლიციელებთან ერთად ვიაროთ და ჩვენ ჩავერთოთ გამოძიების პროცესში?" - მიხეილ ყაველაშვილი ჟურნალისტებს
თუ კითხვები დარჩება საზოგადოებაში, პარლამენტი შესაბამისად იმოქმედებს და შინაგან საქმეთა სამინისტროს პასუხს მოსთხოვს, - ამის შესახებ სპორტის კომიტეტის თავმჯდომარე მიხეილ ყაველაშვილმა გუშინ აქციის მონაწილეთა მხრიდან ჟურნალისტებზე განხორციელებულ ძალადობის ფაქტებთან დაკავშირებით განაცხადა.
მისი თქმით, შინაგან საქმეთა სამინისტრო დამნაშავეების იდენტიფიცირებას ახდენს და უნდა დაელოდონ, რამდენად შესაბამისი იქნება რეაგირება.
"თუ საზოგადოებაში კითხვები დარჩება, ამის შემდეგ პარლამენტი თავის როლს შეასრულებს და პასუხებს შინაგან საქმეთა სამინისტროს მოსთხოვს. თუ ვინმეს გაუჩნდება კითხვა, რომ ვინმე არ დაისაჯა, რეაგირება მოხდება. რა ვქნათ ახლა, რას ითხოვთ, პოლიციელებთან ერთად ვიაროთ და ჩვენ ჩავერთოთ გამოძიების პროცესში? - გასაგებად განვაცხადე, რომ მიმდინარეობს პროცესი, მათ აქვთ შესაბამისი ძალაუფლება იმისთვის, რომ გუშინდელი დღე სათანადოდ გამოიძიონ და დამნაშავეები დასაჯონ. თუ ამ ყველაფრის შემდეგ კითხვები დარჩება საზოგადოებაში, პარლამენტი შესაბამისად იმოქმედებს და შს სამინისტროს პასუხს მოსთხოვს. შეიძლება კითხვები არსებობდეს და განსაკუთრებით მედიის მხრიდან, რომლის წარმომადგენლებიც დაზარალდნენ. თუმცა, ასეთი დაპირისპირების პროცესში პოლიცია ყოველთვის არის და ხშირად მათ კისერზე გადადის მთელი ეს დაპირისპირება," - განაცხადა ყაველაშვილმა.