5 მეთოდი, როგორ შეინახოთ ფოტოები, რომ არასოდეს წაგეშალოთ

თუ წლების წინ ფოტოების გადასაღებად საგანგებოდ ვემზადებოდით და უფრო მეტი წლის წინ, ამისთვის სპეციალურ ფოტოსტუდიაში წასვლა იყო საჭირო, დღეს ფოტოებს იმდენად ხშირად ვიღებთ, რომ უკვე აღარც ვიცით, რამდენი ფოტო გვაქვს და ხშირ შემთხვევაში, მათი არსებობაც გვავიწყდება. შედეგად კი მათ ვკარგავთ. ასე შეიძლება დავკარგოთ ბევრი ფოტო, რომელიც ჩვენი ცხოვრების მნიშვნელოვან მომენტებს ასახავს. წლების შემდეგ კი აუცილებად დაგვწყდება გული და აუცილებლად მოგვინდება იმ ფოტოების დაბრუნება, იმის ნახვა თუ, როგორ გამოვუყურებიდით 5–10 წლის წინ, როგორი იყო ჩვენი შვილების პირველი არდადეგები ან პირველი გაჭყუმპალავება ზღვაში, როგორ ვიმოგზაურეთ საოცნებო ქვეყანაში. რეალურად, ამ ყველაფერს იმ მომენტში კი ავსახავთ ჩვენს ფოტოაპარატებსა და მობილურ ტელეფონებში, მაგრამ მათი ისე დალაგება, რომ არ წაგვეშალოს და არ დავკარგოთ, ყველას გვეზარება.

სწორედ ამიტომ ახლა გთავაზობთ 5 მარტივ საშუალებას, რომელთა საშუალებითაც ფოტოებს ისე შეინახავთ, რომ არ წაგეშალოთ.

• ციფრულ სამყაროში პირველი ყველაზე მარტივი და პრაქტიკული საშუალება ფოტოების ღრუბრლოვან სისტემაში შენახვაა. ამისთვის, საჭიროა, რომ ატვირთოთ Google drive–ზე, iCloud–ზე ან თქვენთვის მისაღებ სხვა რომელიმე პლატფორმაზე. თითოეულ ამ სისტემაში რეგისტრაციის შემდეგ თქვენ გარკვეული სივრცე უფასოდ გექნებათ, თუმცა ყოველთვიურად მინიმალური გადასახადის სანაცვლოდ შეგიძლიათ მოცულობა გაზარდოთ და შეინახოთ ყველა ის ფოტო და ვიდეო, რომელიც თქვენთვის მნიშვნელოვანია.
• ფოტოების შესანახად მეტად პრაქტიკულია გარე მყარი დისკის გამოყენება. ერთჯერადად შეძენილი მოწყობილობით მუდმივად შეძლებთ უამრავი ფოტოსა და ვიდეოს შენახვას. მყარი დისკის მოხმარება ძალიან მარტივია. ის შეგიძლიათ ნებისმიერ კომპიუტერთან დააკავშიროთ.
• თუ ფოტოების ნახვა უფრო ხშირად გჭირდებათ, შეგიძლიათ დიდი მოცულობის რამდენიმე ფლეშკა შეიძინოთ და მათზე თემატურად გადაანაწილოთ ვიზუალური მასალა. ფლეშკის თან ტარებას ყოველთვის შეძლებთ და შესაბამისად, ნებისმიერ დროს გექნებათ მათზე წვდომა.
• სოციალურ ქსელში შექმენით ალბომი, რომელსაც მხოლოდ თქვენ ნახავთ ან საკუთარ თავს გაუგზავნეთ ფოტოები. ეს ერთ–ერთი ყველაზე მარტივი და პრაქტიკული საშუალებაა ფოტოების შესანახად, მაგრამ ერთი უარყოფითი მხარე აქვს. სოციალურ ქსელში ატვირთული ფოტოების ხარისხი ფუჭდება.
• თითოეული ეს მეთოდი ფოტოების შესანახად საკმაოდ მოსახერხებელი და პრაქტიკულია, მაგრამ არ დაგავიწყდეთ, რომ ფოტოს ყველაზე მეტი ემოცია მაშინ მოაქვს, როდესაც მას ხელით ეხებით. ამიტომ ციფრული ფოტოების გარდა, მნიშვნელოვანია, რომ ფიზიკური ფოტოებიც შეინახოთ. ამისთვის კი იდეალურია ფოტოწიგნი. ფოტოები, რომელსაც ხელით ეხებით, მართლაც აცოცხლებს ისტორიებს და სასიამოვნო მოგონებებში გამოგზაურებთ. ფოტოწიგნი კი ერთ წიგნად აკინძული თქვენი მოგონებებია. მისი დამზადება და დაბეჭდვა ძალიან მარტივად, ონლაინ არის შესაძლებელი. არსებული შეთავაზებებიდან შეგიძლიათ აირჩიოთ სასურველი დიზაინი, ატვირთოთ ფოტოები და მზა ფოტოწიგნი თქვენს მისამართზე მიიღოთ. ყველაფერი ძალიან მარტივია, ფოტოები და მოგონებები კი გარანტირებულად მუდმივად თქვენთან იქნება.

ფოტოების შენახვამდე კი არ დაგავიწყდეთ მთავარი ეტაპი – ეს მათი დახარისხებაა. წაშალეთ ფოტოები, რომლებიც არ მოგწონთ და შეამცირეთ შესანახი სურათების რაოდენობა. ასე შენახვაც უფრო გაგიმარტივდებათ და საჭირო დროს სასურველ ფოტოსაც უფრო ადვილად მოძებნით.