გიორგი გახარია აშშ-ის სახელმწიფო დეპარტამენტის წარმომადგენელთან, ფილიპ რიკერთან შეხვედრას სოციალურ ქსელში ეხმაურება.
"სტრატეგიულ პარტნიორებთან ერთად - საქართველოსთვის!” - წერს გიორგი გახარია საკუთარ ფეისბუქ გვერდზე და შეხვედრის ამსახველ ფოტოს ავრცელებს. სახელმწიფო დეპარტამენტის წარმომადგენელთან შეხვედრას გახარია ტვიტერზეც ეხმაურება.
"დღეს, ნაყოფიერი შეხვედრა გვქონდა აშშ-ის სახელმწიფო მდივნის მოქმედ თანაშემწესთან ფილიპ რიკერთან და საქართველოში აშშ-ის ელჩ,კელი დეგნანთან. განვიხილეთ საქართველოს წინაშე მდგარი უსაფრთხოების გამოწვევები და მიმდინარე პოლიტიკური პროცესები. ჩვენ ასევე გავაცანით დეტალები ჩვენი პოლიტიკური დღის წესრიგისა და გეგმების შესახებ“, - წერს პარტია „საქართველოსთვის“ თავჯდომარე - გიორგი გახარია საკუთარი "ტვიტერის" გვერდზე.
სახელმწიფო დეპარტამენტის წარმომადგენლის - ფილიპ რიკერისა და გიორგი გახარიას შეხვედრას ესწრებოდნენ ამერიკის შეერთებული შტატების ელჩი კელი დეგნანი და პარტია "საქართველოსთვის“ პოლიტსაბჭოს წევრი - კახაბერ ქემოკლიძე.
კახაბერ ქემოკლიძე უსაფრთხოების სპეციალისტია და გახარიას პარტიის დაფუძნებამდე - წლების განმავლობაში ქვეყნის ძალოვან და უსაფრთხოების სისტემებში სხვადასხვა მნიშვნელოვან პოზიციებზე მუშაობდა.
